Read Mizo Lushai Leviticus 4 Bible Online

Leviticus 4 - Mizo Lushai bible

Leviticus 4

¹ LALPA chuan Mosia chu a bia a,

²“Israel fate hrilh rawh, mi tu pawhin LALPA thupêk an bawhchhiat palh chuan hetia tih tûr hi a ni:

³Thil tisual palhtu chu puithiam lalber a nih a, mipuiin a sual mawh an phurh dâwn chuan, a sual thawi nân bâwngtuai, hmêlhem lo, LALPA hnênah a hlân tûr a ni.

⁴LALPA hmaah, Inbiakna bûk kawtah, bâwngtuai chu a rawn kai ang a, a lu-ah a kut a nghat ang a, a talh tûr a ni.

⁵A thisen ṭhen chu a keng ang a, Inbiakna bûk chhûngah a luhpui ang a,

⁶a kutzungchalin Hmun Thianghlim puanzâr chu thisen chuan vawi sarih a theh ang a;

⁷rimtui hâlna maichâm kila ki-ah chuan thisen ṭhen chu a tât ang a, a bâng zawng chu bûk kawta thilhlan hâlna maichâm bulah a leihbaw vek tûr a ni.

⁸Bâwng thau, a rîlbawh thau zawng zawng te,

⁹a kal te leh a bawhtu thau te, a thin hlâwm ṭha lai hlehte chu

¹⁰puithiam chuan a la ang a, a thaute chu remna thilhlan tih dân ang khân hâlral hlanna maichâmah a hâl ral tûr a ni.

¹¹A vun te, a sa te, a lu te, a ke te, a kawchhûng zawng zawng leh a rîl te nên

¹²riahhmun daipâwnah hmun serh, maichâm vut paih khâwmnaah meipui a chhep ang a, a hâl ral tûr a ni.

¹³“Israel hnam pumin thil sual an tih palh a, hre chhuak mai si lovin LALPA thupêk an bawhchhiat chuan,

¹⁴an thil sual tih chu an hriat chhuah veleh hnam pum chuan sual thawi nân bâwngtuai Inbiakna bûk kawtah an rawn la tûr a ni;

¹⁵hnam hotute chuan a lu-ah kut an nghat zet ang a, talh tûr a ni.

¹⁶Puithiam lalber chuan bâwng thisen chu Inbiakna bûkah a keng lût ang a,

¹⁷Hmun Thianghlim Ber puanzâr chu vawi sarih a zungchalin thisen chu a tât tûr a ni.

¹⁸Bûk chhûnga rimtui hâlna maichâm kila ki-ah chuan a tât bawk ang a; bûk kawta thilhlan hâlna maichâm bulah a bâng zawng chu a leihbaw tûr a ni.

¹⁹A thaute chu maichâmah chuan a hâl ral tûr a ni.

²⁰Sual thawina bâwngtuai a cheibâwl ang khân a ti ve vek ang a, mipui sual thawina chu a hlân tûr a ni; tichuan, an sual chu ngaihdam a ni tawh ang.

²¹Bâwngtuai chu riahhmun daipâwnah, ama sual thawina ang bawk khân a hâl ral tûr a ni. Hei hi hnam pum sual thawina atâna thilhlan ṭhin tûr chu a ni.

²²“Rorêltuin thil sual a tih palh a, LALPA thupêk a bawhchhiat chuan,

²³a thil sual tih chu an hrilh a, a hriat chhuah veleh, a sual thawi nân kêlpa, hmêlhem lo a hlân tûr a ni.

²⁴Kêl lu-ah a kut a nghat ang a, maichâm hmâr lam, hâlral thilhlan an talhna hmunah chuan a talh tûr a ni.

²⁵Puithiamin a thisen chu a la ang a, maichâm kila ki-ahte chuan a tât ang a, a tah bâng chu maichâm bulah chuan a leihbaw tûr a ni.

²⁶A thau zawng zawng chu Remna thilhlan a tih angin maichâmah chuan a hâl ral tûr a ni; chutiang chu rorêltu sual thawina puithiamin a hlan dân tûr chu a ni; tichuan, a sual chu ngaihdam a ni ang.

²⁷“Mi narânin thil sual a tih palh a, LALPA thupêk a bawhchhiat chuan

²⁸a thil sual tih a hriat chhuah veleh kêlnu, hmêlhem lo, a sual thawi nân a rawn hlân tûr a ni.

²⁹Kêl lu-ah a kut a nghat ang a, hâlral maichâm hmâr lamah hâlral thilhlan an talhna hmunah chuan a talh tûr a ni.

³⁰A thisen chu puithiamin maichâm kil kiahte chuan a zungchalin a tât ang a, a tah bâng chu maichâm bulah a leihbaw tûr a ni.

³¹A thau zawng zawng chu remna thilhlan a tih ang chiah khân maichâmah a hâl ral tûr a ni; chu chu LALPA lâwmzâwng tak a ni. Chutiang chuan thil sual titu sual thawina chu a hlân ang a, ngaihdam a ni tawh ang.

³²“Sual thawi nân berâm a rawn ken chu, a nu, hmêlhem lo a ni ngei tûr a ni.

³³Berâm lu-ah chuan a kut a nghat ang a, hâlral thilhlan an talhna hmun, maichâm hmâr lamah chuan a talh tûr a ni.

³⁴A thisen chu hâlral maichâm kila ki-ahte chuan a zungchalin puithiam chuan a tât ang a, a tah bâng chu maichâm bulah a leihbaw tûr a ni.

³⁵Remna thilhlan berâm ang khân a thau zawng zawng chu a la ang a, LALPA tâna buhbâl thilhlan nên khân a hâl ral tûr a ni. Chutiang chuan sual thawina chu puithiam chuan a hlansak ang a, a sual chu ngaihdam a ni tawh ang.