Read Mizo Lushai Leviticus 5 Bible Online

Leviticus 5 - Mizo Lushai bible

Leviticus 5

¹“Hetiang thilah hian sual thawina hlan a ngai. Rorêlna hmuna thuhretua koh chuan a thil hmuh emaw, a thil hriat emaw puang tûra tih a nih a, a puan duh loh chuan thil sual a ti a ni, a mawh a phur tûr a ni.

²Miin thil thiang lo, ran ruang te, a lian emaw, a te emaw, ramsa tlaw ruang te emaw a khawih palh chuan thil sual a ti a ni a; a hriat chhuah chuan a mawh chu a phur tûr a ni, a bawlhhlawh ve ang.

³Mihring aṭanga chhuak, thil thiang lo rêng rêng a khawih palh chuan a thiltih chu a dik lo tih a hriat veleh a thiang lo ve nghâl a ni.

⁴“Miin thil ṭha emaw, ṭha lo emaw ti tûrin ngaihtuah chiang lovin chhia chham sela, a thiltih chu a ngaihtuah chian hnuah chauh a tihsual mawh chu a phur tawh ang.

⁵“Miin thil sual a tih chuan, a thil sual tih chu a inpuang ang a,

⁶a thil sual tih hrem nân LALPA hnênah berâm emaw, kêl emaw, a nu a rawn hlân tûr a ni. Puithiam chuan chu mi sual thawina chu a hlansak tûr a ni.

⁷Berâm emaw, kêl emaw a neih loh chuan a sual mana pêkah LALPA hnênah ṭhuro pahnih emaw, pârva pahnih emaw a rawn hlân tûr a ni. Pakhat chu sual thawina thilhlan a ni ang a, pakhat chu hâlral thilhlan atân a ni ang.

⁸Puithiam hnênah a rawn dah ang a, sual thawina chu a hlân hmasa tûr a ni. Ṭhuai bung lovin a ring a elh tliak ang a,

⁹a thisen ṭhen chu maichâm pangah a theh ang a, maichâm bulah a thisen chu a far kang tûr a ni. Hei hi sual thawina thilhlan a ni. Pakhat chu dân angin hâlral thilhlanah a hlân tûr a ni.

¹⁰Chutiangin Puithiam chuan mi thil sual tih thawina chu a hlân ang a, ngaihdam a ni tawh ang.

¹¹“Ṭhuro pahnih emaw, pârva pahnih emaw pawh a nei zo lo a nih chuan sual thawina thilhlan chhangphut ṭha chi kg. khat a rawn hlân tûr a ni. Oliv hriak emaw, beraw emaw a rawn telh tûr a ni lo; hâlral thilhlan a ni lo va, sual thawina thilhlan a ni.

¹²Puithiam hnênah a rawn dah ang a, ei tûr thilhlan angin LALPA hnêna hlan vek a nih entîr nân a ṭhen a lo ṭhâm ang a, maichâmah ei tûr thil hlan angin a hâl ral ang. Sual thawina thilhlan a ni.

¹³Chutiang chuan thil sual titu tân puithiam chuan a lo hlansak ang a, ngaihdam a ni ang. Buhbâl thilhlan ang bawk khân a hâl bâng chhangphut chu puithiam chanpual tûr a ni,” a ti a.

¹⁴ LALPA chuan Mosia hnênah:

¹⁵“Miin LALPA chanpual thil serh chu pe lo palh sela, a sual a ni. A sual manah thilhlan LALPA hmaah berâm emaw, kêl emaw, a pa, hmêlhem lo a rawn keng tûr a ni, ran man zât chu biakbûk dân hman lai anga chhût tûr a ni.

¹⁶A pêk loh zât hu chu a pe ang a, chu bâkah hmun ngaa ṭhena hmun khat a pêk belh tûr a ni. Puithiam hnênah a pe ang a, berâmno chu anin bawhchhiat man thilhlanah a lo hlansak ang a, ngaihdam a ni ang.

¹⁷“Tih loh tûr thu-a LALPA thupêk lo ti palh chuan thil sual a ti a ni, a mawh chu a phur ang.

¹⁸Puithiam hnênah bawhchhiat man thilhlan atân berâm emaw, kêl emaw a pa, hmêlhem lo a rawn kai tûr a ni, ran man bi zât chu biakbûka dân hman lai anga chhût tûr a ni. Puithiam chuan bawhchhiat man thilhlan chu a thiltih sual palh thawi nân a lo hlansak ang a, a sual chu ngaihdam a ni ang.

¹⁹LALPA laka a bawhchhiat man thilhlan a ni,” a ti a.