Read Mizo Lushai Leviticus 6 Bible Online

Leviticus 6 - Mizo Lushai bible

Leviticus 6

¹ LALPA chuan Mosia hnênah,

²“Israel mi tu pawhin a chipui hnêna thil a kawltîr te, a dahkham te pe kîr duh lo ta se, rûk ṭhensakin emaw, bum emaw ta sela;

³tin, thil bo a chhar si chhar lo angin chhia a chham chuan,

⁴hetiang thil sual, a eng a pawh hi ti sela; LALPA laka thil tisual a ni a; a rûk te, a bum te, a dahkham kîr duh loh te, thil bo a chhar te, dâwta chhia a chham hnan thil te chu a rûl kim vek tûr a ni; chu bâkah chuan hmun ngaa ṭhena hmun khat a pêk belh tûr a nî; thil sual a ti tih hmuh chhuah niah a neitu hnênah a pe tûr a ni.

⁶Bawhchhiat man LALPA hnêna hlan atân puithiam hnênah berâm emaw, kêl emaw, a pa, hmêlhem lo, a rawn kai tûr a ni; a man chu Hmun Thianghlima hman lai tangka hisâpa chhût tûr a ni.

⁷Puithiam chuan LALPA hnênah sual thawina chu a hlansak ang a, a sualna chu ngaihdam a ni tawh ang.” a ti a.

⁸ LALPA chuan Mosia a bia a:

⁹“Arona leh a fate chu hâlral thilhlan chungchânga tih dân tûr hi hrilh rawh. Hâlral thilhlan chu zankhuain maichâmah chuan dah tûr a ni a, mei chu tihnun reng tûr a ni.

¹⁰A tûkah puithiam chuan a puan zai sîn kawr leh kekawr hnuai ha-in thuka thil rawh vâpte chu a rût ang a, maichâm sîrah chuan a dah tûr a ni.

¹¹A thawmhnaw chu a thlâk ang a, riahhmun daipâwn hmun serhah vut chu a paih tûr a ni.

¹²Maichâma mei chu chhawm nun reng tûr a ni, a mit tûr a ni lo. Puithiam chuan tûk tin thing a tuah belh ang a, hâlral thilhlan tûrte chu a hâl ang a; remna thilhlan thaute pawh chu a hâl ral nghâl ang.

¹³Maichâma mei chu chhawm nun reng tûr a ni; a mit hauh tûr a ni lo.

¹⁴“Hetiang hi buhbâl thilhlan tih dân tûr chu a ni: Arona thlah puithiamin buhbâl thilhlan chu maichâmah LALPA hmaah a hlân tûr a ni.

¹⁵Hriak leh chhangphut veikhat a la ang a, beraw nên maichâmah a hâl ang; chu chu a vaiin LALPA hnêna hlan a ni tih entîrna a ni, LALPA lâwmzâwng tak chu a ni.

¹⁶Hlan bâng chu puithiamho ei tûr a ni. Inbiakna bûk tual hmun thianghlimah dawidim tel lova ei tûr a ni.

¹⁷Dawidim nêna hmeh pawlha kan tûr a ni lo. Buhbâl thilhlan aṭanga an chanpual atân ka pêk a ni. Sual thawina leh bawhchhiat man thilhlan anga thil serh, serh hran tlat tawh chu a ni.

¹⁸Arona thlah mipa tawh phawt chuan an ei thei ang. LALPA hnêna ei tûr hlan kumkhuaa an chanpual tûra ruat a ni. Mi dang tu pawhin ei tûr thilhlan chu an khawih ve chuan an thiang lo nghâl ang,” a ti a.

¹⁹ LALPA chuan Mosia hnênah,

²⁰“Arona leh a fate hriak thih ni chuan LALPA hnênah chhangphut ṭha chi kg. khat, ni tina buhbâl thilhlan hlan tel zât, zîngah kg. chanve, tlaiah kg. chanve rawn hlân ṭheuh rawh se.

²¹Oliv hriak nên hmeh pawlha chhang ur thlênga ur hmin tûr a ni a, sih sawma buhbâl thilhlan anga hlan tûr a ni.

²²Arona thlah, a aiawhtu tûra hriakthih, Puithiam lalber chuan he thilhlan hi a hlân ṭhîn tûr a ni; hei hi kumkhuaa tih dân tûr a ni, LALPA tân hâl ral vek tûr a ni.

²³Puithiamin buhbâl thilhlan a hlan hi ei tûr a ni lo, hâl ral vek tûr a ni,” a ti a.

²⁴ LALPA chuan Mosia hnênah,

²⁵“Arona leh a fate chu hrilh rawh: ‘Hetiang hi sual thawina thilhlan hlan dân tûr chu a ni: hâlral thilhlan tûr talhna hmunah sual thawina thilhlan chu LALPA hmaah talh tûr a ni, thil serh tlat a ni.

²⁶A hlântu puithiam chuan a sa hi Inbiakna bûk tual hmun thianghlimah a ei tûr a ni.

²⁷‘He sa hi a khawih apiang an thiang lo nghâl ang. Thawmhnaw eng pawh a thisenin a per chuan hmun thianghlima sûk tûr a ni.

²⁸A sa chhumna bêl chu hlumbêl a nih chuan tihkeh tûr a ni; dârbêl a nih erawh chuan nawh fai hliauva tuia sil tûr a ni.

²⁹Puithiam thlah mipa tawh phawt chuan a sa hi an ei thei ang, thil serh a ni.

³⁰Inbiakna bûk hung chhûng hmun thianghlimah thisen chu sual thawina atân lâk luh a nih chuan a sa chu hâl ral vek tûr a ni.