Read Mizo Lushai Leviticus 7 Bible Online

Leviticus 7 - Mizo Lushai bible

Leviticus 7

¹‘Hei hi Bawhchhiat man thilhlan tih dân tûr chu a ni:

²Hâlral thilhlan ran talhna hmunah ran chu talh tûr a ni a, a thisen chu maichâma theh tûr a ni.

³A mei thau te, a rîlbawh thau te,

⁴a kal te leh a bawhtu thau te, a thin hlâwm ṭha lai hleh te chu

⁵Puithiamin maichâmah a hâl ral tûr a ni, bawhchhiat man thilhlan a ni.

⁶Puithiam chi, mipa tawh phawt chuan a sa chu an ei thei ang, serh hran tlat a nih avângin hmun thianghlima ei tûr a ni.

⁷‘Sual thawina thilhlan leh bawhchhiat man thilhlan hi a hlan dân a inang reng tûr a ni; a hlântu puithiam hian a sa hi a nei tûr a ni.

⁸Hâlral thilhlana hman ran vun chu a hlântu puithiam neih tûr a ni.

⁹Buhbâl thilhlan thuka hem hmin te, chhang ur thlênga ur hmin te, thîrbêla kan te chu a hlântu puithiam neih tûr a ni.

¹⁰Buhbâl thilhlan la tihhmin loh, hriak telh pawh, telh loh pawh Arona thlah puithiamte ta tûr a ni: an insem zêl tûr a ni.

¹¹‘LALPA hnêna remna thilhlan chu hetianga hlan tûr hi a ni.

¹²Remna thilhlan chu Pathian hnêna lâwmthu sawina atân miin a rawn hlan chuan, ran hlan rualin chhang, dawidim telh loh leh oliv hriak nêna hmeh emaw, chhang pan oliv hriaka tâl emaw, oliv hriaka kan emaw a rawn hlân tel tûr a ni.

¹³Chûng bâkah chuan dawidim telh chhang tlang ur hmin a pe tel tûr a ni.

¹⁴Chhang chi hrang hrang a hlan zînga pakhat zêl chu LALPA tân a pe tûr a ni, maichâma ran thisen thehtu puithiam neih tûr a ni ang.

¹⁵A sa chu a hlan nia ei zawh vek tûr a ni; a tûk atân dah tûr a ni lo.

¹⁶‘Remna thilhlan chu thutiam hlawhtlinna avâng emaw, mahni duh thu-a thilhlan hrim hrim emaw a nih chuan, a sa chu a hlan niâ ei vek kher tûr a ni lo, a tûkah pawh ei theih a la ni ang.

¹⁷Ei sên loh, a ni thum ni pawha la awm ta cheu chu hâl ral tûr a ni.

¹⁸A ni thum nia an la ei chuan Pathianin a thilhlan chu a pawm lo vang, a hlântu thil tih ṭhatah chhiar ahnêkin bawlhhlawhnaa ngaih a ni ang a, a eitu chuan a mawh a phur ang.

¹⁹A sa-in thil bawlhhlawh a khawih chuan ei tûr a ni lo, hâl ral tûr a ni. Mi bawlhhlawh lai lo chuan a sa chu an ei thei ang.

²⁰Mi bawlhhlawh laiin remna thilhlan sa hi a ei ve chuan ensan tûr a ni.

²¹Mihring emaw, ran aṭangin emaw thil bawlhhlawh chhuak khawihtu chuan he sa hi a ei ve chuan ensan tûr a ni,’ ” a ti a.

²² LALPA chuan Mosia hnênah,

²³“Israel fate chu hrilh rawh: Berâm te, bâwng te, kêl te, a eng thau mah an ei tûr a ni lo.

²⁴Ran tlaw emaw, sa seh emaw thau chu ei tûr a ni lo; thil dangah erawh chuan hman theih a ni ang.

²⁵Ei tûr thilhlan LALPA hnêna a thau hlan tawh ei chu ensan tûr a ni.

²⁶Israel fate chu khawiah pawh awm se ran thisen emaw, sava thisen emaw an ei tûr a ni lo.

²⁷He dân hi bawhchhia apiang ensan tûr an ni,” a ti a.

²⁸ LALPA chuan Mosia hnênah,

²⁹“Israel mite chu hrilh rawh. Remna thilhlan LALPA hnêna hlântu chuan a ṭhen LALPA hnêna thilpêkah an pe tûr a ni.

³⁰Amah ngeiin ei tûr thilhlan chu a rawn hlân tur a ni. Ran thau leh a irno chu a thên ang a, LALPA hnênah a rawn hlân tûr a ni.

³¹Puithiamin a thau chu maichâmah a hâl ang a, a irno erawh chu puithiam neih tûr a ni.

³²Remna thilhlanah chuan a bawp ding lam chu puithiam pêk tûr a ni.

³³Remna thilhlan thau leh thisen hlântu puithiam chuan a bawp ding lam chu a nei ang.

³⁴Israel-ten LALPA hnêna remna thilhlan an hlanin a irno an thên leh a bawp hi puithiamte kumkhaw chanpual tûr a ni,” a ti a.

³⁵Hei hi ei tûr LALPA hnêna pêk aṭanga Arona leh a fate, puithiama ruat ngheh hnua an chanpual atâna pêk tûr chu a ni.

³⁶Chumi ni chuan a ni LALPA chuan Israel mite hnênah he thên thilhlan hi an hnêna pe ṭhîn tûra thu a pêk ni. He dân hi Israel miten kumkhuain an zâwm tûr a ni.

³⁷Tichuan, hâlral thilhlan te, buhbâl thilhlan te, sual thawina thilhlan te, bawhchhiat man thilhlan te, Puithiam nemngheh thilhlan te leh remna thilhlante chu chutianga hlan ṭhin tûr chu a ni.

³⁸Thlalêra Sinai tlângah Israel-te thilhlan dân tûr a hrilh ṭuma Mosia hnêna LALPA thupêkte chu chûng chu a ni.