Read Mizo Lushai Leviticus 9 Bible Online

Leviticus 9 - Mizo Lushai bible

Leviticus 9

¹Ni riat ni chuan Mosian Arona leh a fate chu Israel upate nên a ko va,

²Arona hnênah, “Bawngpatuai leh berâmchal hmêlhem lo kai la, bâwng chu sual thawina thilhlanah LALPA hnênah hlân la, berâm chu hâlral thilhlanah hlân ang che.

³Israel mite chuan sual thawina thilhlanah kêlpa rawn kai sela; bâwngno leh berâmno, kum khat vêla upa, hmêlhem lo, hâlral thilhlan atân rawn kai bawk rawh se.

⁴Bâwngchal leh berâmchal, remna thilhlan atân rawn kai sela, buhbâl thilhlan hriak nêna pawlh LALPA hnênah rawn hlân bawk rawh se. Vawiin hian kei, LALPA hi, in hmaah ka rawn inlan dâwn a ni,” a ti a.

⁵Mosia thupêk ang chuan Inbiakna bûk kawtah chûng chu an rawn kai a, hnam pum chu LALPA chibai bûk tûrin an pung khâwm a.

⁶Mosia chuan an hnênah, “Hei hi ti tûrin LALPA chuan thu a pe che u a ni: LALPA ropuina êng chu a lo lang dawn si a,” a ti a.

⁷Tin, Arona hnênah chuan, “Maichâmah i sual thawina tûr leh hâlral thilhlan hlân ang che, mipui sual thawina tûr pawh hlân bawk ang che, LALPA thupêk angin mipui sual thawina chu hlansak rawh,” a ti a.

⁸Arona chu maichâmah a kal a, ama sual thawina bâwngpatuai chu a talh a.

⁹A fate chuan a thisen an rawn lâksak a, a zungchal a chiah a, maichâm kila ki-ah chuan a tât a, a tah bâng chu maichâm bulah a leihbua a.

¹⁰A thau te, a kal te, a thin hlâwm ṭha lai hleh te chu Mosia hnêna LALPA thupêk ang khân maichâmah chuan a hâl a.

¹¹A vun leh a sa erawh chu riahhmun pâwnah a hâl ral a.

¹²Ama puala hâlral thilhlan pawh chu a talh a, a thisen chu a faten an rawn lâksak a, maichâm a theh kual chhuak a.

¹³A lu leh a sa dangte pawh an rawn la a, maichâmah a lo hâl a.

¹⁴A rîlte leh a bawp chu a sil fai a, maichâmah chuan a dang chunga dahin a hâl ta bawk a.

¹⁵Chumi hnu chuan mipui thilhlan chu a hlân ve ta a. Mipui sual thawina thilhlan chu a talh a, ama sual thawina a hlan ang chiah khân a ti a.

¹⁶Hâlral thilhlana hlan tûr ran pawh chu a tih dân tûr tuk angin a ti a.

¹⁷Buhbâl thilhlan chhangphut chu a ṭhâm a, maichâmah chuan ni tin hâlral thilhlan zîngah chuan a hâl tel a.

¹⁸Remna thilhlanah bâwngpa leh kêlchal mipuiin an rawn ken chu a talh a, ran thisen chu a faten an rawn la a, maichâm chu a lo theh kual chhuak a.

¹⁹Arona chuan bâwng leh berâm thau, berâm mei thau tak leh a rîlbawh thau te, a kal te, a thin hlâwm ṭha lai hleh te chu,

²⁰a irno chungah a dah a, maichâmah a rawn hlân a.

²¹Mosia sawi angin a irno leh a bawp chu LALPA hmaah a thên a.

²²Aronan hêng hi a hlan zawh chuan mipui chungah a kut a phar a, malsâwmna a sawi a, maichâm ata chu a lo chhuk a.

²³Mosia leh Arona chu Inbiakna bûkah chuan an lût a, an lo chhuah chuan mipui tân malsâwmna an sawi a. LALPA ropuina êng chu mite hmuhah a lo lang ta a.

²⁴LALPA hnên aṭang chuan mei a lo chhuak a, maichâma hâlral thilhlan leh sathaute chu a rawn kâng ral ta a. Mipuiin chu chu an hmuhin an au va, an hmaia lei siin an bawkkhup ta a.