Read Mizo Lushai Jeremia 1 Bible Online

Jeremia 1 - Mizo Lushai bible

Jeremia 1

¹Benjamin ram chhûnga Anathot khaw puithiam pakhat, Hilkia fapa Jeremia thute chu:

²Judai ram lal Amona fapa Josia lal kum sâwm leh pathumna kumin a hnênah LALPA thu a lo thleng a.

³Josia fapa Jehoiakima lal lai pawhin a lo thleng ṭhîn, Josia fapa Zedekia lal kum sawm leh pakhat kum, a thla nganaa Jerusalem mite sala an hruai thleng khân LALPA thu chu a hnênah a lo thleng a ni.

⁴ LALPA thu chu ka hnênah hetiang hian a lo thleng a:

⁵“Pum chhûnga ka siam hma chein ka hria che a, Chhûl ata i chhuah hma pawhin ka serh hrang tawh che, Hnamte hnêna zâwlnei atân ka ruat che a ni,” tiin.

⁶Kei chuan, “E khai, Lalpa PATHIAN, naupang mai ka ni a, Thu sawi pawh ka thiam lo,” ka ti a.

⁷ LALPA chuan ka hnênah: “Naupang mai ka ni ti suh, Ka tirhna che apiang hnênah kal la, Thu ka pêk che apiang i sawi tûr a ni.

⁸Anni chu hlau suh, i hnênah ka awm ang a, Ka chhanhim zêl ang che,” LALPA thuchhuak chuan a ti.

⁹Tin, LALPA chuan a han ban a, a kutin ka kâ a khawih a, LALPA chuan ka hnênah: “Ngai teh, i kâah ka thute ka dah ta.

¹⁰Vawiinah hian hnamte leh lalram chungah te Thu ka pe a che: Pawt chhuak tûr te, ṭhiat tûr te, tichhe tûr te, paih tûr te, siam ṭha tûr te, phun tûr tein,” a ti a.

¹¹ LALPA thu chu ka hnênah a lo thleng a: “Jeremia, eng nge i hmuh?” a ti a. “Theite ṭang ka hmu,” ka ti a.

¹² LALPA chuan ka hnênah, “I hmu fuh hle mai, ka thute hlen chhuah a nih theih nân ka mitmei reng asin,” a ti a.

¹³ LALPA thu chu ka hnênah a lo thleng leh a, “Eng nge i hmuh?” a ti a. “Hmâr lamah bêl so bawrh bawrh ka hmu, he lamah a lo liam ṭêp a ni,” ka ti a.

¹⁴LALPA chuan ka hnênah, “Ram chhûng mi zawng zawng chungah hmâr lam aṭangin chhiatna ka thlentîr dâwn.

¹⁵Hmâr lam ram hnam zawng zawng ka khâwm ang,” tih hi LALPA thuchhuak a ni. “An lalte an lo kal ang a, Jerusalem kulh bang hualin Kawngkaahte an lalṭhutthlêng an hûng ang a, Judai ram khawpui dangte pawh an hual ang.

¹⁶Ka miten pathian dang an bia a, Inthawina hlânin min phatsan a, An kutchhuakte an bia a, thil sual an tih tâk avângin Anni chu ka hrem dâwn tih thu ka puang ang.

¹⁷“Tûnah i kâwng hrêng la, inring rawh. Tho la, thu ka pêk apiang che chu hrilh rawh. An hmaah zâm suh; chutilo chu, an hmâah ka tizâm ang che.

¹⁸“Judai ram lal te, hotute, puithiam te, ram mipuite leh ram pum pui ep tûrin khawpui kulh nghet tak nei, thîr ban leh ngên bang nei angah ka siam ang che.

¹⁹An bei ang che a; mahse, an hneh lo vang che. I hnênah ka awm a, ka chhan zêl ang che,” tih hi LALPA thuchhuak a ni.