Read Mizo Lushai Jeremia 10 Bible Online

Jeremia 10 - Mizo Lushai bible

Jeremia 10

¹Israel mite u, In hnêna LALPA thu sawi hi lo ngaithla teh u:

² LALPA chuan heti hian a ti: “Hnam dangte awm dân zir suh ula, Vâna chhinchhiahnate hlau hek suh u, Hnam dangten chûng thil chu hlau mah se, Hlau ve suh ang che u.

³Hêng mite sakhua hi eng mah a ni lo, Ngawa thing an lâk chu, themthiamin hreiin a tuk a,

⁴Tangkarua leh rangkachakin a cheimawi a, A tlâk loh nân thîrkilhnain a kilh nghet a.

⁵Thlai hmuna ṭihkhai an siam ang chauh hi a ni, An ṭawng thei lo va, an kal thei hek lo, Lâk sawn an ngai a ni. Chûng chu hlau suh u, Thil sual an ti thei lo va, thil ṭha an ti thei hek lo.”

⁶Aw LALPA, nang ang tu mah rêng an awm lo; I chak a, i hming a ropui a, thil i tithei bawk,

⁷Aw hnamte Lalber, tu nge ṭih lo vang che? Ṭih chu i phu rêng a ni. Hnam dang mi fingte zîngah leh an lal zawng zawng zîngah Nang ang tu mah rêng an awm lo.

⁸An chhawih a, an â hle mai, Thing milim, engmahlo chu an zirtîrtu a ni.

⁹Tarsis aṭangin tangkaraw den phêk an rawn la a, Upaz aṭangin rangkachak, Kut themthiamte leh rangkachak chher thiamte siam chu, Puan dumpâwl leh senduk an sintîr a, Chûng zawng zawng chu mi themthiam kutchhuak mai a ni.

¹⁰ LALPA erawh chu Pathian dik, Pathian nung, chatuan lal a ni. A thin a ur chuan lei a nghîng a, Hnamten a thinur an tuar zo lo.

¹¹(An hnênah heti hian sawi rawh u: Hêng pathian, lei leh vân siamtu ni lote hi lei ata an la bo vang a, vân hnuai ata an boral ang. )

¹²A thiltihtheihnain lei a siam a, A finnain khawvêl a din, A hriatnain vân a kai pharh ta.

¹³Thu a pe a, vâna tuite chu a ri hum hum a, Kâwlkil aṭangin chhûm a chhohtîr a, Ruah leh kâwlphe a siam a, A dahna hmun ata thli a tlehtîr ṭhîn.

¹⁴An za-in an mâwl a, hriatna rêng an nei lo, Rangkachak chhertuten an milim an zahpui ang a; an milim chhûn chu a lem, nunna nei lo a ni si a.

¹⁵Hlutna nei lo, hmuhsitawm mai an ni, Hrem an nih hunah an boral vek ang.

¹⁶Jakoba Pathian chu hêngte ang hi a ni ve lo, Ani zawng engkim siamtu a ni, Israel pawh a rochan hnam an ni, A hming chu Engkim LALPA a ni.

¹⁷In ram chhuahsan tûrin in thawmhnaw tel fel rawh u, An hual reng tawh che u a ni.

¹⁸ LALPA chuan heti hian a ti: “Chutih hunah chuan ram chhûnga awmte hi ka pawt chhuak ang a, Chek tlawk tlawk khawpin ka tihrehawm ang.”

¹⁹Jerusalem mite chu, “Kan nâ avângin kan va rethei êm! Kan hliam hi tihdam rual a ni lo. Kan tuar chhuak zo dâwn emaw kan lo ti ṭhîn.

²⁰Kan puan in a chhia a, a kaihna a chat vek a, Kan faten min kal bosan a, tu mah an awm tawh lo. Kan puan in kaihtu tûr leh A puante kai pharhtu tûr an awm ta lo,” tiin an au va.

²¹Berâm vêngtute an ngawng a, LALPA râwn nachâng an hre lo, Chuvângin, an hmuingîl lo va, an berâm rual zawng zawng an darh zo ta.

²²Ngai teh u, thu a lo thleng a, Hmâr lam mite inpun khâwm thu chu, Judai ram khawpuite tirama, Sihal chênna hmuna siamtu tûrte chu.

²³Aw LALPA, tu mah mahni nun chunga thunei an awm lo tih ka hre ta. Tu man mahni awm dân tûr an rêl thei hek lo.

²⁴Aw LALPA, min thunun la; mahse, a tâwk têin, Thinur lovin; chutilo chu, kan bo hlauh dah ang e.

²⁵Hnam dang, nangmah hre ngai lote leh I hming lam ngai lote chungah i thinurna leihbua ang che, Jakoba chu an ei a, an ei zo va, an ei fai ta vek a, A chênna pawh an tiram ta.