Read Mizo Lushai Jeremia 11 Bible Online

Jeremia 11 - Mizo Lushai bible

Jeremia 11

¹Jeremia hnêna thu lo thleng chu hei hi a ni.

²He thuthlung thute hi ngaithla ula, Juda mite leh Jerusalem-a chêngte hrilh rawh u.

³An hnênah heti hian sawi rawh: “LALPA, Israel-te Pathian chuan heti hian a ti: ‘He thuthlung thu pawisa lote chu ânchhedawngin awm rawh se.

⁴Chu thuthlung chu in thlahtute, Aigupta ram, thîr rawhtuina thuk ata chu ka hruai chhuah nia ka pêk a ni. Ka thu chu zâwm ula, in hnêna ka thupêk apiang in tih chuan ka mite in ni ang a, kei pawh in Pathian ka ni ang,’ tia ka sawi kha.

⁵In thlahtute hnêna ka tiam, ‘khawizu leh hnutetuia luang ram, tûna in awmna hi ka pe ang che u,’ tiin ka lo tiam tawh chu ka hlen ang,” a ti a. Kei chuan, “Amen, aw LALPA,” tiin ka chhâng a.

⁶ LALPA chuan ka hnênah heti hian a ti: “Hêng thu zawng zawng hi Judai ram khawpuiah te, Jerusalem kawtthlêrah te puang rawh. He thuthlung thute hi ngaithla ula, zâwm rawh u.

⁷In thlahtute Aigupta ram ata ka hruai chhuah ni aṭanga vawiin thlengin anni chu ṭhahnemngai takin ka zilh reng a, ‘Ka thu ngaithla ula, zâwm rawh u,’ tiin zîng tak taka thovin ka hrilh ṭhîn.

⁸Nimahsela, an ngaithla duh lo va, an zâwm hek lo. Luhlul takin ni tin an sual zui zêl a. Ka thupêk an zawm loh avângin ka thuthlunga ânchhia an chungah ka thlentîr ta a ni.”

⁹ LALPA chuan heti hian a ti: “Juda mite leh Jerusalem-a awmte chu an inthurual a.

¹⁰An thlahtu, ka thu ngaithla duh lote sualnaah chuan an kîr a, pathian dangte zuiin an rawngte an bâwl a, Israela chhûngte leh Juda chhûngte chuan an thlahtute hnêna thuthlung ka siam chu an bawhchhe ta,” tiin.

¹¹Chuvâng chuan, LALPA chuan heti hian a ti: “Hre rawh u, an pumpelh theih loh tûr chhiatna an chungah ka thlentîr dâwn, anni chuan min au mah sela, ka ngaithla lo vang.

¹²Judai ram khawpuia mite leh Jerusalem-a chêngte chuan, an pathian, rimtui an hlan ṭhinnate chu panin ṭanpuina an dîl ang a; mahse, an chunga chhiatna a lo thlen hun chuan an ṭanpui thei lo vang.

¹³Aw Juda, i khawpui zât zet pathian i nei a, zahthlâk taka Baal pathian hnêna rimtui hâlna tûr maichâm pawh Jerusalem kawtthlêr zât lai i din ta.

¹⁴Chuvângin, hêng mite hi ṭawngṭaisak suh, an tân dîl suh la, ngensak hek suh. An chunga chhiatna a lo thlen hunah min au mah se ka chhâng lo vang.

¹⁵ LALPA chuan heti hian a ti: “Ka duh tak chuan mi tam tak nêna thil sual ti chungin Ka Tempulah chanvo eng nge a neih tawh ang? Inthawina sa a hlante chuan hrem a pumpelhtîr thei ang em? Suahsual bâwl reng chungin a hlim thei dâwn em ni?”

¹⁶‘Oliv thing mawi, rah duh tak,’ LALPA chuan a ti che a, Mahse, thlipui ri hum hum anga nasa mei a kantîr ang che, I zârte pawh a kâng ral vek ang.

¹⁷Israel chhûngte leh Juda chhûngten thil ṭha lo tak tiin Baal hnênah rimtui an hâl a, min tihthinur avângin Engkim LALPA chuan in chhiatna tûr a puang ta.

¹⁸ LALPA chuan mi min phiarna chu min hrilh a, ka hre ve ta, An thil sual tihte chu min hmuhtîr ta si a.

¹⁹Kei zawng berâmno ngam tak, talh tûra an hruai ang ka lo ni, ‘Thing chu a rah chawpin kit ila, Mi nung ram ata i sawn bo daih ang u; Tichuan, a hming pawh an hre tawh dâwn lo nia,’ Ti-a min phiarrûkna chu ka lo hre rêng rêng lo mai.

²⁰Nang zawng, Engkim LALPA, dik taka rorêltu, Rilru leh thinlung enfiahtu i ni. An chunga phuba i lâk chu mi hmuhtîr ang che. I hnênah ka inkawltîr tawh si a.

²¹Anathot mi, nangmah thah tuma, ‘LALPA hmingin thu sawi tawh suh, i sawi chuan kan that ang che,’ titute chungchâng chu LALPA chuan heti hian a sawi:

²²Engkim LALPA chuan heti hian a ti: “Ngai teh, anni chu ka hrem dâwn, an tlangvâlte chu indonaah an thi ang a, an fanu leh fapate pawh ṭâm tuarin an thi ang.

²³Hrem an tuar kumah Anathot mite chungah chuan chhiatna ka thlentîr ang a, thi bâng rêng an awm lo vang,” tiin.