Read Mizo Lushai Jeremia 12 Bible Online

Jeremia 12 - Mizo Lushai bible

Jeremia 12

¹Aw LALPA, i chungah phunnawi fo mah ila, Nang zawng i dik ṭhîn a ni. Mahse, i rorêl dân hi ka zâwt a che, “Engati nge mi suaksualte an hmuingîl viauva, Mi rinawm lote nuamsa taka an khawsak le?”

²Anni chu i phun a, zung an kai a, An ṭhang lian a, an lo rah ṭhîn. An awkain an fak che a, An thinlung erawh chuan a hlat si che.

³Aw LALPA, nangin kei chu mi hria a, I chunga ka rilru put dânte i hre vek a, Anni erawh chu berâm talh tûr angin hnûkchhuak la, Talh hun tûr ruatsak ang che.

⁴Eng chen nge ram chuan a tuar anga, Hmun tina hnimte chu a vuai ang? A chhûnga chêngte sualna avângin Ramsate leh savate chu an boral a, Chûng mite chuan, “Kan awm dân hi a hmu hlei nem,” an ti ṭhîn.

⁵Mihring pawhin an ûm chauh hle che chuan, Engtin nge sakawrte chu i tluk tehlul ang? Hmun râlmuangah pawh i him loh chuan Jordan ngawah engtin nge i awm ang?

⁶I unau, in chhûngkaw zînga mi ngei chuan an bum che a, Ring takin an aukhum che, Ṭha taka an biak che pawhin anni chu ring suh.

⁷Ka in ka chhuahsan a, ka rochan chu ka hnâwl, Ka duh tak chu a hmêlmate kutah ka pe ta e.

⁸Ka rochante chu ka tân ngawa sakeibaknei ang an ni, Mi rûmkhum a; chuvângin, ka hua a ni.

⁹Ka rochante chu sava ang mai an ni, Muin a hêl a hêl mai; Ramsa kawlhte ko khâwm ula, an sa rawn ei zo rawh se.

¹⁰Berâmputen ka grep huan an tichhia a, An chîl hrep a, Ka lo ṭha tak chu ram rovah an chantîr ta.

¹¹Ram hluihlâwnah an siam zo va, a ro vawng vawng mai, Ram pum pui chu an tiro zo va, tu man pawi an ti lo.

¹²Thlalêr tlâng kawlh vel vulahte chuan Tichhetu an lo pung khâwm a, LALPA khandaih chuan ram dung leh vânga mite a that ang a, Tu mah him an awm lo vang.

¹³Buh an tuh ang a, hlîng an seng ang, Thawk tam hle mah se, hlâwkna eng mah an hmu lo; LALPA thinurna nasa tak avâng chuan, Buh an seng chhunte chu an zahpui ang.

¹⁴Ka mi Israel-te hnêna rochan tûr ka pêk lâksaktu, ka ṭhenawma mi sualte chungthu chu LALPA chuan heti hian a ti: “An ram aṭangin ka pawt chhuak ang a, Juda chhûngte chu an zîng ata ka la chhuak ang.

¹⁵Anni chu ka pawh chhuah hnuah chuan ka khawngaih leh ang a, mi tin an rochan ṭheuh ka pe leh ang a, anmahni ram ngeiah ka hruai kîr leh ang.

¹⁶Ka mite chu Baal hming chhâlin thutiam an lo zirtîr ṭhîn a, chutiang bawkin ‘LALPA, mi nung hming chhâla thutiam’ an zir ve hunah ka mite awm dân an la ang a, an zîngah an tel ve ang.

¹⁷Nimahsela, ngaithla duh lo hnam apiang chu ka pawt chhuak ang a, ka tiboral ang,” tih hi LALPA thuchhuak a ni.