Read Mizo Lushai Jeremia 13 Bible Online

Jeremia 13 - Mizo Lushai bible

Jeremia 13

¹ LALPA chuan heti hian min hrilh a, “Kal la, hrênpuan zai sîn lei la, i kâwngah vêt la, tuiah chiah suh ang che,” tiin.

²Tichuan, LALPA thupêk angin puan zai sîn chu ka lei a, ka kâwngah ka vêt ta a.

³LALPA thu chu ka hnênah a lo thleng leh a,

⁴“Tho la, i hrênpuan ven lai kha keng la, Eufretis luiah kalpui la, chuta lung keh kârah chuan thukru rawh,” tiin.

⁵Tichuan, LALPA min hrilh ang chuan Eufretis luiah ka kal a, ka thukru ta a.

⁶Ni rei tak hnuah chuan LALPA chuan ka hnênah, “Tho la, Eufretis luiah kal la, hrênpuan ka thuhrûktîr che kha la leh rawh,” a ti a.

⁷Tichuan, Eufretis luiah chuan ka kal a, ka han hai a, ka thuhrûkna hmun ata puan chu ka la chhuak a; mahse, a lo mawih vek a, eng atân mah hman tlâk a ni tawh lo.

⁸LALPA thu chu ka hnênah a lo thleng leh a;

⁹LALPA chuan heti hian a ti: “Hetiang tak hian Juda-te chapona leh Jerusalem inchhuanna chu ka tichhia ang.

¹⁰Hêng mi suaksual, ka thu ngaithla duh lova, luhlul taka khawsa ṭhîn, pathian dang rawngbâwla be ṭhînte hi he hrênpuan, eng maha tlâk lo ang hi an ni ang.

¹¹Miin hrênpuan an kâwnga an vêt reng ṭhîn ang hian, Israel chhûngkua leh Juda chhûngkua zawng zawng chu ka hnêna awm tlat tûr leh min faka min chawimawia ka mi ni tûrin ka ruat a; mahse, an ngaithla duh lo,” tih hi LALPA thuchhuak a ni.

¹²Hetiangin an hnênah thu sawi rawh: “LALPA, Israel-te Pathian chuan heti hian a ti: ‘Uain bûr zawng zawngah uain thun khat rawh u.’ Anni chuan i hnênah, ‘Bûr zawng zawng uaina thun khah tûr tih kan hre ve lo vem ni?’ an tih chuan,

¹³heti hian hrilh ang che, ‘Ngai teh u, he rama chêng, Davida ṭhutthlêng luahtu lal te, puithiam te, zâwlnei te leh Jerusalem-a chêng zawng zawng te chu ka hrai rui hnêp dâwn, LALPA chuan a ti.’

¹⁴Anni chu ka inchaltauhtîr ang a, pa leh fate pawh an intauh ang,” tih hi LALPA thuchhuak a ni. “Khawngaihna te, lainatna te, hmangaihnate tel hauh lovin ka tiboral ang,” tiin.

¹⁵ LALPA thu sawi hi ngaithla ula, pawisa rawh u, Inchhuang suh u.

¹⁶ LALPA, in Pathian hi chawimawi ula, Khua a tihthima, tlâng hliah thimah in tlûk hma hian, êng in nghâkhlel a; Mahse, khawdur thim chhah mup a ni ang.

¹⁷Hei hi in ngaihthlâk duh loh chuan In chapo avângin a rûkin ka ṭap ang, Ka mittui a far zawih zawih ang, LALPA berâmte sala an man dâwn avângin.

¹⁸ LALPA chuan heti hian a ti: “Lal leh lalnu heti hian hrilh rawh u. ‘In lalṭhutthlêng ata chhuk rawh u, In lallukhum ropui chu in lu ata hlih thlâk a ni dâwn e,’ tiin.

¹⁹Chhim lam ram khawpui zawng zawng an hual tlat ta, Chhuahna rêng rêng a awm tawh lo; Juda mi zawng zawng salah an man ang a, An hruai fai vek ang.”

²⁰Dâk ula, hmâr lam ata hmêlma lo kalte saw, I ranrual vên lai, i berâm duhawm takte kha khaw nge an awm tâk?

²¹Ṭhian ṭhaa i ngaihin a rawn rûn thut che chuan Eng nge i sawi tâk ang? Hmeichhe nau vei angin na i ti hle ang.

²²‘Eng vângin nge hêng hi ka tuar?’ I ti rilru a nih chuan, i sual vâng a ni, I pawnfên an hlihsak che a, an sawisa che a nih kha.

²³“Ethiopia mi hângin a vun a tidanglamin Keitein a zia a thup thei em? Nangni thil sual tiṭhangte hian thil ṭha in ti thei ang maw?

²⁴Thlalêr thliin buhsi a lên darh angin Ka tidarh ang che u.

²⁵Min theihnghilh a, dâwta in innghah avângin, Hei hi i chan ve, i tâna ka ruat chu a ni,” Tih hi LALPA thuchhuak a ni.

²⁶Keimah ngeiin i pawnfên chu i hmai khuh vek khawpin ka hlîm ang a, I lang fai vek ang.

²⁷I uire hrâtzia te, i nuamtâwl ri te, Zah nachâng hre lova i inphalraizia te ka hria. Daipâwna tlângah te i chêt bawlhhlawhzia pawh ka hmu, Aw Jerusalem, i chung a pik e, Eng hunah tak thianghlim leh ang che maw?