Read Mizo Lushai Jeremia 14 Bible Online

Jeremia 14 - Mizo Lushai bible

Jeremia 14

¹Khawkhêng chungchânga Jeremia hnêna LALPA thu lo thleng chu hei hi a ni:

²Judai ram chuan a tuar a, A kulh kawngkhârte a chhe rem rum mai. Mite chu lungngaiin leiah an bawk a. Jerusalem-ah an ṭap chuah chuah e.

³An mi ṭhaten an chhiahhlawh tuichawi tûrin an tîr a, Tuikhuah an pan, tui an hmu lo, Tuibêl ruak an hâwnpui, zak tak leh beidawng takin An lu an khuh.

⁴Ramah ruahtui a tlâk loh avângin lei a khichat ta, Lo neitute an mangang a, an lu an khuh.

⁵Ramhnuaia zukpuiin no a nei a, Hnimhring awm loh vângin a tlânsan a,

⁶Tlâng chârah ramsabengtung a ding, Sihal angin a thaw hlawp hlawp; Hnimhring peh tûr a awm loh avângin An mit a vai.

⁷Kan sualnaten min timualpho mah se, I hming avângin, aw LALPA min pui teh, Nasa takin kan hnungtawlh a, i chungah kan lo sual ta a ni.

⁸Aw nang, Israel-te nghahfâk, mangan laia chhantu, Engtizia nge he ramah hian khualzin, Zan khat riak ang leka i awm le?

⁹Engati nge phâwk hmêl i puta, Mi dang hum thei lo mi chak ang mai i nih tâk le? Mahse, aw LALPA, kan hnênah i awm a, I hming putu kan ni a, min kalsan suh ang che.

¹⁰ LALPA chuan hêng mite chungchâng hetiang hian a sawi: ‘Vah bo an châk hle a, an insûm thei hauh lo.’ Chuvângin, LALPA chuan anni chu a lâwm lo va, An thil sual tih a hre reng a, An sual avângin a hrem ang.

¹¹ LALPA chuan ka hnênah, “Hêng mite ṭhatna tûr hi dîlsak suh.

¹²Chaw nghei mah sela an au ka ngaithla lo vang. An hâlral leh an thilhlante chu ka pawm lo vang a; anni chu khandaih te, ṭâm te leh hripui tein ka tiboral zâwk ang,” a ti a.

¹³Kei chuan, “E, Lalpa PATHIAN, zâwlneiten ‘khandaih leh ṭâm in tuar lo vang, hemi hmunah hian muanna kumhlun in nei zâwk ang,’ tiin an sawi si a!” ka ti a.

¹⁴LALPA chuan ka hnênah: “Chûng zâwlneite chuan ka hmingin dâwtin thu an hril ṭhîn a ni; anni chu ka tîr lo va, thu ka pe lo va, an hnênah thu ka sawi hek lo. Inlârna lem te, aien rin tlâk loh te, an rin thu phuahchawp te in hnênah an puang zâwk ṭhîn a ni.

¹⁵Chuvângin, LALPA chuan heti hian a ti: Ka hminga thu sawia, ‘he ramah hian indona leh ṭâm a thleng dâwn lo’ titu zâwlneite chu ka tirh an ni lo. Chûng zâwlneite chu khandaih leh ṭâmin ka tiboral ang.

¹⁶An thu hril lo dawngsawngtute pawh chu Jerusalem kawtthlêrahte chuan khandaih leh ṭâm tuarin an tlu phung ang a, tu man an phûm lo vang. Chutiang thil chu an nupui te, an fapa te, an fanute chungah pawh a lo thleng ang. An sual avângin chhiatna nasa tak an chungah ka thlentîr dâwn a ni,” a ti a.

¹⁷He thu hi an hnênah hrilh rawh mi ti a: A chhûn a zân ka mittui luang se, hul lai rêng nei suh se; Ka mi, ka fanu, nula thianghlim chuan Hliam a tuar e, hliam na tak chu.

¹⁸Daipâwna ka kal leh khandaiha thah mi tam tak ka hmu a, Khaw chhûnga ka luhin ṭâmpui tuara thi ka hmu bawk si; Zâwlnei leh puithiamte meuh pawhin An hriat ngai loh ram an pan.

¹⁹Juda chu i paihthla ta dêr em ni? Zion pawh i ten ta em ni? Dam rual lovin engati nge min hliam le? Muanna kan beisei a, thil ṭha eng mah a thleng lo, Tihdam hun kan nghâk a; mahse, thlaphânna kan tawng si.

²⁰Aw LALPA, kan sual tih kan hria e, Min thlahtute bawhchhiatna pawh kan hria, I lakah kan lo sual takzet a ni.

²¹I hming a chhiat loh nân min hmusit lo la, I lalṭhutthlêng ropui chu timualpho suh, Kan hnêna i thuthlung hre reng la, bawhchhe suh ang che.

²²Hnam dang pathiante zîngah Ruah tisûr thei an awm em ni? A nih, vânte pawh khian ruah an titla thei em ni? Aw LALPA, kan Pathian, nang chauh hi kan innghahna i ni a, Hêng thil zawng zawng titu hi nang hi i ni.