Read Mizo Lushai Jeremia 15 Bible Online

Jeremia 15 - Mizo Lushai bible

Jeremia 15

¹ LALPA chuan ka hnênah, “Mosia leh Samuela pawh ka hmaah hêng mite tân lo ding mah se, ka ngaihsak chuang lo vang. Ka hma ata hnawt chhuak ula, kal botîr rawh u.

²‘Khawiah nge kan kal ang?’ an tih chuan hei hi an kalna tûra LALPA sawi chu a ni tih hrilh rawh u: Ṭhenkhat hripuiin an thi ang a, Ṭhenkhat indonaah an thi ang a. Ṭhenkhat tâm tuarin an thi ang a, Ṭhenkhat salah an man ang.

³Tichhetu tûr thil pali ka ruat chu hêng hi a ni, tih hi LALPA thuchhuak a ni: Thattu tûr khandaih te, an sa pu bo tûr ui te, chunglêng sava te leh ramsa, anmahni tihluma an sa ei zotu tûr te.

⁴Jerusalem-a Juda lal Hezekia fapa Manasea thiltih avângin khawvêl lalramten râpthlâk an tih atân anni chu ka siam ang,” a ti a.

⁵“Aw Jerusalem, tu nge khawngaih ang che? Tu nge ṭah ang che? ‘Eng nge i chanchin?’ tiin tu nge chiauau ang che?

⁶Nangin min duh lo va, min hawisan ta,” Tih hi LALPA thuchhuak a ni. “Chuvângin, i chungah kut ka thlâk ta a ni, ka tiboral ang che.

⁷An ram chhûng khaw tin aṭangin ka zâp darh ang a, Ka mite chu ka tiboral ang, an fate pawh ka tihlum ang, An nun sual an sim loh avângin.

⁸Tuipui kama ṭiau aia tam hmeithai ka awmtîr ang a, An vânglaiin an tlangvâlte ka tihlum a, An nuten an tuar. Lungngaihna leh manganna an chungah ka thlentîr thut ang.

⁹Fa pasarih hringtu nu chu a chau va, A thidang a, chhûn laiin a ni a liam a, A mualpho va, a chan a chhe hle, A dam chhunte pawh an hmêlmaten khandaihin an that ang,” Tih hi LALPA thuchhuak a ni.

¹⁰Ram puma mi tin hnialkalhtu leh dodâltu atân ka nuin mi lo hring hi ka va han vânduai tak êm! Ka pûktîr lo va, ka batsak hek lo; mahse, an za-in ânchhia min lawh si.

¹¹LALPA chuan, “Chhan ṭha tak avângin ka hum ngei ang che. Mangan ni leh chhiatna ni a lo thlen hunin i hmêlmate chu i hmaah ka kûntîr ang a ti.

¹²Thîr, hmâr lam thîr ngên pawlh chu a tihtliah theih em?

¹³Ram puma in suahsualna avângin in hausakna te, in ro hlu zawng zawngte chu râllâk sumah a thlâwnin ka pe vek dâwn.

¹⁴I hmêlmate sal atân ka siam ang che, i hriat ngai loh ramah chuan. Ka thinur chu mei angin a alh ang a, a kâng ang che,” a ti a.

¹⁵Aw LALPA, nangin i hria a, Min hre reng la, min ngaihsak ang che, Min tiduhdahtute chungah phuba la la, I dawhtheih êm avângin min tiboral suh se. Nangmah avângin hau ka tuar tih hria ang che.

¹⁶I thu lo thleng chu ka zâwm a, I thute chu ka tân hlimna, ka thinlung tilâwmtu ber a ni, Aw LALPA, Engkim PATHIAN, i hming chu ka lam ṭhîn.

¹⁷Nuam tâwlho zîngah ka tel lo va, ka hlimpui hek lo, Mahni chauhvin ka awm hi nangin min chelh tlat si a, Min tithinur hle a ni.

¹⁸Engtizia nge ka na a dam theih loh? Ka hliamte pawh tihdam rual loh a nih tâk hi? Ka tân kawrte rin tlâk loh, ṭhâla kang leh mai ang hi i ni em ni?

¹⁹Chuvângin, LALPA chuan heti hian a ti: “I lamlêt chuan ka tungding leh ang che a, Ka rawng i bâwl ang, Dâwt sawi lova thutak i sawi ṭhin chuan Ka thu puangtu i ni ang a, Miten an rawn pan ang che a, I pan a ngai lo vang.

²⁰He mite hmaah hian ngên kulh bangah ka siam ang che, An bei ang che; mahse, an hneh lo vang che. Chhan tûr leh humhim tûr chein i hnênah ka awm,” Tih hi LALPA thuchhuak a ni.

²¹“Mi sualte kut ata ka chhan ang che a, Mi nunrâwngte lakah ka humhim ang che.”