Read Mizo Lushai Jeremia 16 Bible Online

Jeremia 16 - Mizo Lushai bible

Jeremia 16

¹ LALPA thu chu ka hnênah heti hian a lo thleng a:

²“Nupui i nei tûr a ni lo va, he hmunah hian fanu fapa i nei tûr a ni hek lo.”

³Hemi hmuna fanu fapa piangte leh anmahni hringtu nu leh pate chungthu chu heti hian LALPA chuan a sawi:

⁴“Râpthlâk takin an thi ang a, tu man an ṭah lo vang a, phûm lohvin bawlhhlawh angin an awm phung ang. Khandaih leh ṭâm tuarin an thi ang a, an ruangte chu chunglêng savate leh ramsate chaw a ni ang,” tiin.

⁵ LALPA chuan heti hian a ti: “Khawhar inah lêng suh la, sûnpui tûr leh ṭanpui tûrin kal hek suh. Ka thlamuanna te, ka khawngaihna te, ka lainatna te hêng mite lak aṭang hian ka la kiang tawh si a,” tih hi LALPA thuchhuak a ni.

⁶“He rama mi hausa leh retheite chu an thi ang a, tu man an phûm lo vang. Anmahni sûnin tu mah an inzai lo vang a, an inziat kawlh hek lo vang.

⁷Lusûn chhûngte chu thlamuan tûrin tu man ei tûr an hlui lo vang; an nu leh pate hnêm tûrin tu man in tûr an pe hek lo vang.

⁸Ruai ṭhehna inah lût suh la, an zîngah eiin in hek suh.”

⁹Engkim LALPA, Israel-te Pathian chuan heti hian a ti: “Ngai teh, in dam chhûng ngei hian in mit hmuhah hlim leh lâwm thâwm te, mo leh a pasal hlim thâwm te he hmun ata hi ka titâwp vek ang.

¹⁰“Hêng thil zawng zawng hi hêng mite i hrilh hunah annin, ‘Engati nge hetiang chhiatna nasa tak hi LALPA chuan kan chunga a thlentîr le? Thil dik lo eng nge kan tiha, kan Pathian chungah eng nge kan tihsual?’ an tih chuan

¹¹heti hian hrilh ang che: ‘In pate chuan min hawisan a, pathian dang biain an rawng an bâwl a, min theihnghilh a, ka dânte an zâwm hek lo.

¹²Nangni phei chu in pate aiin in la sual sauh va, tu man ka thu in zâwm lo va, luhlul takin in thu thuin in awm tâk hi.

¹³Chuvângin, nangni leh in pate hriat loh ramah ka hnawt chhuak ang che u; tah chuan a chhûn a zân pathian dangte rawng in bâwl ang a, ka duhsak tawh dâwn lo che u a ni,’ tiin,” a ti a.

¹⁴ LALPA thuchhuak chuan heti hian a ti: “ ‘Aigupta ram ata Israel-te hruaichhuaktu LALPA chu a nung alâwm,’ an ti tawh lo vang.

¹⁵‘A tihdarhna hmun, hmâr lam ata hruaikhâwmtu LALPA chu a nung alâwm,’ an ti tawh zâwk ang. An pate ka pêk ram ngeiah ka hruaikîr leh ang.”

¹⁶“Ngai teh, sangha man mi tam tak anmahni man tûrin ka tîr dâwn e,” tih hi LALPA thuchhuak a ni. “Chumi hnuah chuan tlâng tin leh mual tin lung keh kâr chen khawrh chhuak tûr sapêl mi tam tak ka tîr ang.

¹⁷An awm dân zawng zawng ka hmu reng a, hmuh loh rêng rêng ka nei lo; an sualnate ka hmuh phâk loh a awm hek lo.

¹⁸Ka ram chu milem pathian, nunna nei lo leh pathian lemtein an tihbawlhhlawh avângin an khawlohna leh an sualnate chu a lehhnihin ka thungrûl ang.”

¹⁹Aw LALPA, mi tichaktu leh mi hum ṭhîntu, Mangan nia ka phen tûr, Hnamte chu kâwlkil ata i hnênah an lo kal ang a, Kan pate chuan pathian lem, Hlutna leh ṭangkaina rêng nei lo milem An rochung a.

²⁰Mihringin pathian a siam thei dâwn em ni? Chutiang pathian chu Pathian tak a ni lo vang.

²¹“Chuvângin, tûn ṭum na na na chu ka thiltihtheihzia leh chakzia anni chu ka han hriattîr leh teh ang; tichuan, ka hming chu LALPA a ni tih an hria ang.”