Read Mizo Lushai Jeremia 17 Bible Online

Jeremia 17 - Mizo Lushai bible

Jeremia 17

¹ LALPA chuan heti hian a ti: “Juda-te sualna chu thîr kawlawm leh lunghlu zumin an thinlungah fiah taka ziak a ni, an maichâm kiahte pawh ker a ni.

²Anni chuan an pathian Aseri, tlâng sâng thingbuk hnuaia awmte chu an bia a.

³Nang, daipâwn tlânga milem betu, i hausakna leh i ro hlu zawng zawng chu ram chhûng hmun tina i sualna avângin râllâk sum atân ka sem ral ta.

⁴I chanpual atâna ka pêk che kha i sual avângin i chân ang. I laka ka thinrim mei anga a alh reng avângin i hriat ngai loh ramah i hmêlmate rawng i bâwl ang.”

⁵ LALPA chuan heti hian a ti: “Mihring rinchhana, mihring bân tha chakna ringa, LALPA hmusittu chuan ânchhia dawng rawh se.

⁶Ani chu thlalêr hnim ro rire ang a ni, Thil lo thleng tûr, thil ṭha a hmu lo vang, Thlalêr ram ro, lei al, tu ma luah lohvah chuan a chêng zâwk ang.

⁷ LALPA ringtu, innghah nâna LALPA hmangtu chu,

⁸Chu mi chu tui kianga thing phun, lui kama zung kai, Khaw lum lo thleng pawh hlau lo, a hnah hring reng, khawkhên kum pawh pawisa lo, Rah ṭhulh chuang lo ang hi a ni.

⁹Thinlung hi thil dang zawng aia bumhmang, Siam ṭhat harsa khawpa chhia a ni a, Tu nge hrethiam thei ang?

¹⁰Kei LALPA hi rilru entu, thinlung fiahtu ka ni; Mi tin an thiltih ang zêlin lâwmman ka pe ṭhîn.”

¹¹Kut tling lova hausa chu varung, mahni tui ni lo awp keu ang a ni, A vânglai takin a hausakna chuan a kalsan ang a, A âtzia a la lang mai ang.

¹²Lalṭhutthlêng ropui tak, a tîr ata chawisân chu, Kan Hmun Thianghlim a ni.

¹³Aw LALPA, Israel-te nghahfâk, Nangmah kalsantu zawng zawng chu an mualpho vang, LALPA, nunna tuikhur chu an kalsan che avângin Vaivuta hming ziak angin an boral ang.

¹⁴Aw LALPA, mi tidam la; Tichuan, ka dam viah ang; Mi hum la; tichuan, ka him ngei ang, Nang zawng ka chawimawi ṭhîn che a ni.

¹⁵Ngai teh, ka hnênah heti hian an ti ṭhîn: ‘Khawiah nge LALPA thu chu? Tûnah lo thleng ang hmiang.’

¹⁶Chhiatna thlentîr tûrin ka nawr lo che, Chhiatna thlentîr hi ka duhzâwng a ni lo tih i hria, Ka ṭawngka chhuakte chu nangin i hre vek si a.

¹⁷Ka tân ṭihbaiawm ni suh la, Mangan nia ka inhumhimna i ni si a.

¹⁸Min tiduhdahtute chu mualpho sela, Kei erawh chu mualpho lo ila, Anni chu zâm sela, kei erawh chu zâm lo ila, An chungah chhiatna thlentîr la, Tiboral hmiah ang che.

¹⁹ LALPA chuan ka hnênah heti hian a ti: “Kal la, kulh kawngka lûn ber, Juda lalte an luha an chhuahnaah va ding la, Jerusalem luhna kawngka dang zawng zawngah pawh ding zêl ang che.

²⁰An hnênah heti hian sawi rawh: ‘Nangni Juda lal te, Judai rama chêng zawng zawng te, Jerusalem-a awm, hêng kawngkaa lût ṭhînte u, LALPA thu hi ngaithla rawh u.

²¹LALPA chuan heti hian a ti: Sabat nia thil phur lo tûrin in nun vawng ṭha rawh u, Jerusalem kawngkaahte chuan thil phur chungin lût rêng rêng suh u.

²²Sabat niin in in ata eng mah phur chhuak hek suh u, hna pawh thawk suh u. In pute hnêna ka thupêk ang khân sabat ni hi serh thianghlim ang che u.

²³Anni chuan ka thupêk chu an ngaithla lo va, an ngaihven hek lo. An beng an chhungawng a, zilhna an pawm duh lo va, an ngaithla duh hek lo.

²⁴LALPA thuchhuak chuan heti hian a ti: Tihtakzetin ka thu pawisa ula, Sabat niin he khawpui kawngkaahte hian thil phur lût suh ula, Sabat ni serh thianghlim ang che u;

²⁵tichuan, Davida ṭhutthlênga ṭhu lalte leh hotute chu sakawr-tawlailîr leh sakawr chunga chuangin Juda mite leh Jerusalem-a chêngte nên he khawpui kawngkaah hian an lo lût ang a, he khawpui hi an luah hlen tawh ang.

²⁶Judai ram khawpui aṭang te, Jerusalem chhehvêl khua aṭang te, Benjamin bial aṭang te, thlang lam phaikin aṭang te, tlângram aṭang te leh chhim lam aṭang te chuan hâlral thilhlan leh chhangphut thilhlan te kengin mite chu an rawn inthawi ang a; rimtui te, lâwmthu sawina inthawina te LALPA inah an rawn hlân ang.

²⁷Nimahsela, Sabat hman thianghlim thu-ah te, Sabat nia Jerusalem kawngkaa thil phurh luh khap thu-ah te ka thu in zawm loh chuan Jerusalem kawngkaahte mei mit thei lo ka dah ang a, lal inte nên a kâng ral vek ang,” tiin.