Read Mizo Lushai Jeremia 18 Bible Online

Jeremia 18 - Mizo Lushai bible

Jeremia 18

¹Jeremia hnêna LALPA thu lo thleng chuan:

²“Tho la, bêlvawtu inah zu kal la, tah chuan thu ka hrilh ang che,” a ti a.

³Tichuan, bêlvawtu inah ka zu kal a, ani chuan khâwl hmangin bêl a lo vua a,

⁴a bêl siam chu ṭha a tih loh chuan bêl dangah a siam leh mai ṭhîn a.

⁵ LALPA thu chu ka hnênah a lo thleng leh a:

⁶“Aw Israel fate u, he bêlvawtu tih ang hian in chungah ka ti thei lo vem ni? tih hi LALPA thuchhuak a ni. Nangni Israel fate u, bêlvawtu kuta hlum ang mai hian ka kutah in awm a ni.

⁷Eng hunah pawh, hnam emaw, lalram emaw chungthuah, ‘ka pawt chhuak ang a, ka ṭhiat ang a, ka tichhe vek ang’ tiin lo sawi tawh mah ila,

⁸chu hnam chuan an thil tihsual an sim chuan an chunga thil ṭha lo tih ka tum chu ka ṭhulh ang.

⁹Eng hunah pawh hnam emaw, lalram emaw chungthuah ‘ka din ang a, ka siam ang’ lo ti mah ila,

¹⁰ka mit hmuha thil sual an tiha, ka thu an ngaihthlâk loh chuan thil ṭha tihsak ka tum chu ka sût leh ang.”

¹¹Tûnah Juda mite leh Jerusalem-a chêngte hnênah LALPA chuan heti hian a ti: “Ngai teh u, in chungah thil ṭha lo tih ka tum a, ka ruahman mêk a. Chuvângin, mi tinin in thil tihsualte sim ula, in awm dân leh in thiltih ṭha lote hawisan rawh u.”

¹²Anni chuan, “A ho êm mai, kan duh duhin kan awm ang; kan duh leh luhlul kan chhuah ang a, kan duh leh suahsual kan chhuah ang,” an ti a.

¹³Tichuan, LALPA chuan heti hian a ti: “Hnam dangte zâwt teh rêng u, Tu nge hetiang thil hi hre tawh ngai le? Nula, Israel chuan thil râpthlâk tak a tih tâk hi.

¹⁴Lebanon tlâng lungpuite chu vûrin a kiansan ngai em? Tlâng aṭanga tui vâwt tak lo chhuak chu a kang ngai em?

¹⁵Ka mite erawh chuan min theihnghilh a, Milem tlâktlailo hnênah rimtui an hâl. Hmasânga an kal ṭhinna kawng chu an pênsan a, Kawngpui zawh lovin ṭumkawngah an kal.

¹⁶An ram an tirâlṭi zo va, kumkhuaa hmusitawmin a awm ta, Veivâk apiangin mak an ti a, an lu an thinkhum ta.

¹⁷Khawchhak thliin vaivut a lên darh angin, Anni chu hmêlma hmaah ka tidarh ang, An mangan ni-ah ka tukkhum chhah ka chhawn ang.”

¹⁸Mite chuan, “Hawh u, Jeremia hi i phiar ang u, dân min zirtîrtu tûr puithiam te, thurâwn min petu tûr mi fing te, thu min hrilhtu tûr zâwlneite an awm zêl tho vang. Hawh u, sawichhe bawrh bawrh ila, a thu i ngaithla duh lo vang u,” an ti a.

¹⁹Min ngaihsak teh, aw LALPA, Min beitute hi hria ang che.

²⁰Thil ṭha suala thungrûlh tûr em ni? Anni chuan ka tlâk nân khur an lai a, An laka i thinur la kiang tûra I hnêna ka ngensak kha hre reng ang che.

²¹An fate chuan ṭâmpui mitthi tuar sela, Khandaih hriam tawng rawh se, An pate chu hripuiin thi sela, An nute chuan an fa sûn sela, hmeithai rawh se, An tlangvâlte pawh indonaah sah hlum ni rawh se.

²²Ka tlâk nân khur an lai a, Ka kalnaah thang an kam avângin Râlin bei thut sela, an inah ṭap chuah chuah rawh se.

²³Aw LALPA, mi thah tuma min phiar dân zawng zawng i hria a, An bawhchhiatnate ngaidam suh la, I mit hmuha an sualnate thai bo hek suh, I hmaah thehthal dêr la, Thinur ni-ah sawisa hrep ang che.