Read Mizo Lushai Jeremia 19 Bible Online

Jeremia 19 - Mizo Lushai bible

Jeremia 19

¹ LALPA chuan heti hian a ti: “Kal la, bêlvawtu hlum bêl va lei la, mipui zînga puipa te, puithiam zînga puipate hruai ang che.

²Harsit kawngkhâra chhuakin Ben-Hinom ruamah chuan kal la; tah chuan, thu ka hrilh tûr che chu puang ang che.fate an hlanna hmun hi ngaisâng tawh lovin a nihna tak ‘inthahna ruam’ an ti dâwn a ni.

³Heti hian sawi ang che: ‘Juda lalte leh Jerusalem-a awmte u, LALPA thu hi ngaithla rawh u. Israel-te Pathian, Engkim LALPA chuan heti hian a ti: Ngai teh, he hmunah hian chhiatna râpthlâk tak ka thlentîr dâwn, a hria apiang an khûr ang.

⁴Mite chuan min kalsan a, hemi hmun hi ram dang pathian biak nân an hmang a, anmahni leh an thlahtu te, Juda lalte pawhin an hriat ngai loh pathian lem hnênahte rimtui an hâl a, pawi sawi lo thisenin he hmun hi an tikhat ta.

⁵Baal hnêna hâlral thilhlana an fate an hlanna tûr, Baal hmunsâng an siam a; chûng thil chu ti tûrin thu ka pe lo va, ka hrilh hek lo, ngaihtuah pawh ka ngaihtuah ngai hek lo.

⁶Chuvângin, ngai teh, ni te a lo thleng dâwn e, tih hi LALPA thu chhuak a ni. He hmun hi Tofet ruam an ti tawh lo vang a, Ben-Hinom ruam an ti tawh hek lo vang, inthahna ruam an ti tawh zâwk ang.’

⁷“Hemi hmunah hian Judai ram leh Jerusalem-a mite remruatte chu ka tichhia ang a, an hmêlma, anmahni thah tumtute chuan khandaihin an sât hlum ang. An ruang chu chunglêng savate leh ramsate ei atân ka pe ang.

⁸He khawpui hi mite hmuhsit atân ka tichhe vek ang a, a kal apiangin a chhiat nasatzia an hmuhin mak tiin an chek tlawk tlawk ang.

⁹Thah tumtu, an hmêlmate chuan an hualbet tlat ang a; tichuan, an fanu leh fapate sa an ei hial ang. Anmahni ngei pawh an sa an ineisak ang.”

¹⁰I kalpuite mit hmuhah hlumbêl chu tikeh la, an hnênah:

¹¹“Engkim LALPA chuan heti hian a ti: ‘He hmun leh he khawpui hi he bêl ang hian ka tichhia ang a, siam ṭhat theih rual a ni tawh lo vang. Phûmna tûr hmun dang a awm loh avângin mitthite chu Tofet-ah an phûm ang.

¹²He hmun leh a chhûnga chêngte chungah he thil hi ka ti dâwn,’ tih hi LALPA thuchhuak a ni. He khawpui hi Tofet angin a siam ang.

¹³Jerusalem in te, Judai ram lal inte leh vân arsite hnêna rimtui hâla; pathian dangte hnêna thil an hlanna ṭhin hmun zawng zawng chu Tofet hmun anga tenawm an ni ang.”

¹⁴Jeremia chu LALPAN thu sawi tûra a tirhna hmun Tofet aṭang chuan a lo kîr a, LALPA in hung chhûngah a ding a, chuta awm zawng zawng hnênah heti hian a ti a:

¹⁵“Israel-te Pathian, Engkim LALPA chuan heti hian a ti: Chhiatna lo thleng tûr ka sawi zawng zawng kha he khawpui leh a chhehvêl khuaahte hian a thleng dâwn e, ka thu in ngaithla duh lo va, luhlul in chhuah luih tlat avângin,” a ti a.