Read Mizo Lushai Jeremia 2 Bible Online

Jeremia 2 - Mizo Lushai bible

Jeremia 2

¹ LALPA thu chu ka hnênah heti hian a lo thleng a:

²“Kal la, Jerusalem mite hriat theih tûrin thu sawi rawh; LALPA chuan heti hian a ti: ‘I tleirâwl laia mi ngainatzia te, I mo thar laia mi hmangaihzia te, Eng mah chîn lohna ram thlalêra min zui dânte kha ka hre reng a ni.’

³Israel chu LALPA tân a thianghlim a, A rah thar hmasa a ni. A rawn eichhetu apiang chuan thiam loh an chang ang a, An chungah chhiatna a lo thleng ang,” LALPA thuchhuak chuan a ti.

⁴Aw Jakoba chhûngte leh Israel hnam zawng zawngte u, LALPA thu hi ngaithla rawh u.

⁵ LALPA chuan heti hian a ti: “In thlahtuten ka lakah thil ṭha lo eng nge an hmuha, Hla taka min kalsan tâk daih le? Milem, eng mah ni lo an bia a, engmahlo an nih tâk hi.

⁶‘Aigupta ram ata min hruai chhuak a, Thlalêr, ram ro, khuarkhurum hmun, Tui vânna leh ram thim tak, tu ma kal ngai lohna, Tu ma chên ngai lohna hmuna min hruai tlangtu, LALPA chu, ‘Khawi lamah nge a awm?’ tih nachâng an hre hek lo.

⁷Ram ṭha takah, a rah eia, a ṭhatna tlân tûrin Ka hruai thleng che u a. Mahse, in han luh chuan ka ram chu in tibawlhhlawh a, ka ram pêk che u chu in tibawrhbâng zo ta.

⁸Puithiamten LALPA chu lam nachâng an hre lo va, Dân vawngtuten min hre lo va, Rorêltute ka lakah an hel a. Zâwlneiten Baal hmingin thu an puang a, Milem, hlutna nei lo, an ûm ta zâwk a.”

⁹“Tichuan, ka khing ang che u a, In tute thlengin ka khing zêl ang,” Tih hi LALPA thuchhuak a ni.

¹⁰“Kupra thliarkârahte va kal ula, en teh u, Kedar hmunahte mi tîr ula, ngun takin thlîr vêl rawh u, Hetiang thil hi a awm tawh ngai em? Ngun takin chhui teh u.

¹¹Pathian tak ni lo mah se, Hnamten an pathian chu an thlâk ngai em ni? Ka mite erawh chuan anmahni tiropuitu chu, Milem, hlutna nei lovin an thlâk ta.

¹²Aw vânte u, he thil hi mak ti ula, Hlauvin mangang rawh u,” LALPA thuchhuak chuan a ti.

¹³“Ka miten thil pahnih an tisual: Kei, nunna tuihnâr hi, min kalsan a, Tuikhur an inhiah chawp a, tuikhur khi, Tui tling thei lo tûr chu.

¹⁴“Israel chu chhiahhlawh a ni lo, Sal atân rênga piang pawh a ni hek lo, Engati nge mi kut a tuar tâk si le?

¹⁵Sakeibakneiten an rûm khum a, ring takin an hâhum a, A ram an tichhe zo vek a, A khawpuite pawh luahtu awm lovin a ram zo ta.

¹⁶Nof mite leh Tapanhes mite chuan I lu an tikawlh zo ta.

¹⁷ LALPA, i Pathianin kawnga a hruai lai che I nawrhsan avângin, He thil hi i chungah a thlentîr a ni lâwm ni?

¹⁸Nail tui in tûra Aigupta pan i hlâwkpui em? Eufretis tui in tûra Asuria i pan pawh a hlâwk em ni?

¹⁹I suahsualna avângin hrem i ni a, I hnungtawlh avângin thiam loh i chang ang a, LALPA, i Pathian mi hawisan hi A sualzia leh ṭhat lohzia Ngaihtuah la, i hre chhuak ang. Mi ṭihna rêng i nei si lo,” LALPA thuchhuak chuan a ti.

²⁰“Hmânah khân i nghâwngkawl ka titliak a, An phuarna che ka tichat a, Mahse, ‘I rawng ka bâwl lo vang,’ i ti a, Tlâng sângah te, thingbuk hnuaiah te I mu vei a, nawhchizuar ang mai i ni.

²¹A chi dik tak, grep ṭha chi chu ka phun che a, Engtizia nge min inlehsana, Grep suak, eng maha tlâk lo i nih tâk le?

²²Chingal leh sahbawnin insil chiam mah la, I sual hnuhma chu ka hmu reng tho a ni,” Tih hi Lalpa PATHIAN thuchhuak a ni.

²³“ ‘Ka bawlhhlawh lo va, Baal-te pawh ka ûm hek lo,’ Engtin nge i tih theih le? Ruama i chet dânte kha ngaihtuah la, I thil tih ṭhinte kha hre reng rawh, Sanghâwngsei hur, awm ngaihna hre lo anga i zat ruai kha.

²⁴Thlalêra sabengtung hur, a hnâr lên ruai ṭhîn chu, A châkna tu nge dang zo vang? Pan hah a ngai lo va, Hmuh mai theihin a awm ṭhîn.

²⁵Dang ro hial khawpa pathian dang panin I ke rap na suh; Nang chuan, ‘Bei a dawng ta, ram dang mite ka ngaina a, Anni chu ka zui dâwn,’ i ti si a.

²⁶“Rûkru man angin Israel chhûngte an zak ang, An lal te, an hotu te, an puithiam te leh An zâwlnei te chuan:

²⁷Thingbul hnênah, ‘Ka pa i ni,’ an ti a, Lung hnênah, ‘Mi hringtu i ni,’ an ti a; Ka lam hawi lovin an tukkhum chhah min chhawn a, An manganin, ‘Tho la, min chhan rawh,’ an ti leh si a.

²⁸In siam chawp, in pathiante chu khawiah nge? Lo tho sela, in manganna ata An chhan thei mahna che u, Aw Juda, i khawpui zât zet pathian i neih hi.

²⁹Engtizia nge ka chungah in vui fo le? In vaiin ka lakah in hel hi,” LALPA thuchhuak chuan a ti.

³⁰“In fate ka hrem a, a sâwt lo, An ṭhat phah chuang lo; Sakeibaknei nghal angin zâwlneite khandaihin in that ta.

³¹Nangni tûnlai mite u, LALPA thu hi ngaithla teh u. Thlalêr leh ram thim tak ang, Israel-te tân ka lo ni em ni? Engtizia nge ka miten, ‘Kan zalên ta, i hnênah kan lo kal tawh lo vang,’ an tih hial le?

³²Nulain a incheina a theihnghilhin Movin a inneih thawmhnaw a theihnghilh thei em ni? Ka miten min theihnghilh chhûng nite erawh chu Chhiar sên rual a ni lo.

³³Ngaihzâwngte lêm dân i va thiam êm? Hmeichhe suaksualte pawhin i tih dân an zir tâk hi,

³⁴I puanah pawisawilo, mi retheite thisen a kai e, Rawk tum che i lo that pawh a ni si lo, Nimahsela, hêng zawng zawng ti chung hian

³⁵‘Pawi ka khawih lo va, Ka lakah a thinur hek lo vang,’ i ti a. ‘Ka sual lo ve,’ i ti tlat a, Ngai teh, i chungthu ka rêl dâwn e.

³⁶Engtizia nge i awm dân i thlâk zung zung mai le? Asuria i mualpho phah ang khân Aigupta pawh i mualpho phah ang.

³⁷Kut khumin chuta ṭang pawh chuan i chhuak ang a, I innghahna ṭhinte chu LALPA chuan a paihthla tawh a, Chûngho chuan an pui hauh lo vang che.