Read Mizo Lushai Jeremia 20 Bible Online

Jeremia 20 - Mizo Lushai bible

Jeremia 20

¹Puithiam Pasura, Imera fapa, LALPA ina hotu ber chuan chûng thute chu Jeremian a sawi tih a lo hria a;

²tichuan, Pasura chuan zâwlnei Jeremia chu a vua a, kawl a buntîr a, LALPA in, Benjamin kawngkhâr chhakta zâwk bulah chuan a tântîr a.

³A tûkah Jeremia kawl bun chu a phelhsak a, a chhuah ta a. Jeremia chuan a hnênah, “LALPA chuan i hmingah Pasura ti tawh lovin Magor Misabib a ti tawh zâwk a che,

⁴LALPA chuan heti hian a ti: ‘Ngai teh, i tân leh i ṭhiante zawng zawng tân hlauhawmah ka siam ang che. I mit hmuhah anni chu i hmêlmaten khandaihin an that ang a, Juda mi zawng zawng Babulon lal kutah ka pe ang. Ani chuan Babulon-ah salah a hruai ang a, khandaihin a that ang.

⁵Tin, he khawpui hausakna zawng zawng te, a deh chhuah ro hlu zawng zawng te, Juda lal sum leh pai zawng zawngte pawh an hmêlmate kutah ka hlân ang. Anni chuan an rawk ang a, an lâksak ang a, Babulon-ah an phur hâwng ang.’

⁶Nang pawh, Pasur, i ina awm zawng zawng nên salah an man ang che a, Babulon-ah i kal ve ang. Chutah chuan i thi ang a, an phûm ang che; nang leh i ṭhian dâwt thu i lo hrilhte nên khân,” a ti a.

⁷Aw LALPA, nangin min bum a, bum ka nih tâk hi, Nang chu kei aiin i chak a, min titlâwm ta, Nilêngin min deusawh a, mi tin nuihzatbûr ka ni.

⁸Thu ka sawi apiangin Inpâwngnêkna leh intihchhiatna nasatzia ka aupui ṭhîn, LALPA thu ka hnêna lo thleng avâng chuan Nilênga hmuhsit ka ni ta.

⁹‘Ani chu ka hre reng lo vang a, A hmingin thu ka sawi tawh hek lo vang,’ ka tih pawhin Ruh chhûnga mei sa awm ang maiin Ka thinlungah mi tûr ut ut a. Ka pai hle hle thei ngang lo va ni.

¹⁰Mi tam tak phun ru ka hria, Kil tinah hlauhawmin min hual, ‘Hêk rawh u, keini pawhin kan hêk ang,’ an ti. Ka ṭhenrual zawng zawng, ka tlûk hun châng rengte chuan ‘Thlêm thlûk a nih hunah kan ngam ang a, A chungah phuba kan la ang,’ an ti.

¹¹Mahse, LALPA, mi chak, mi huaisen chu ka hnênah a awm a. Mi tiduhdahtute chu an tlu ang a, min hneh lo vang; An mualpho hle dâwn, an hlawhtling dâwn si lo, An hmingchhiatna chu kumkhuain theihnghilh a ni lo vang.

¹²Rilru leh thinlung hmu vektu, An chunga i phuba lâk lai mi hmuhtîr la, Kei erawh chu i kutah ka inkawltîr tawh si.

¹³ LALPA fak ula, LALPA chu chawimawi rawh u, Mi sualte kut ata chanhaite a chhanhim si a.

¹⁴Ka pian ni chu ânchhedawngin awm se, Ka nuin min hrin ni chu chawimawi ni suh se.

¹⁵Ka pa hnêna, ‘Fapa i nei ta,’ tih thu hrilha, Tilâwmtu pawh chu ânchhedawngin awm rawh se.

¹⁶Lainat hauh lova LALPAN khawpui a tihchhiat angin Chu mi chu awm sela, Zîngah ṭap thâwm, chhûnah râlkhêl thâwm hre rawh se.

¹⁷Chhûlah khân min lo tihlum se, Ka nu chhûl chu ka thlan a ni mai tûr, A chhûlah chuan ka awm reng mai ang.

¹⁸Engah kher nge chhûl ata ka lo chhuah, Thawkrim leh lungngaia awm mai tûr leh Mualpho rêng rênga ka dam chhûng hmang ral tûr hian?