Read Mizo Lushai Jeremia 21 Bible Online

Jeremia 21 - Mizo Lushai bible

Jeremia 21

¹Lal Zedekian Malkia fapa Pasura leh Maaseia fapa puithiam Zefania te chu Jeremia hnênah a kaltîr a, chutih laia LALPA thu lo thleng chu:

²“LALPA chu thu min zawhsak teh, Babulon lal Nebukadnezara chuan min bei ta si a. LALPA chuan kan tân thil mak tiin a hnawtkîr dâwn em?” an va ti a.

³Jeremia chuan an hnênah, “Zedekia chu heti hian va hrilh rawh u.

⁴LALPA, Israel-te Pathian chuan heti hian a ti: ‘Ngai teh, Babulon lal leh in kulh hualtu Kaldai-ho i dona hriamhrei hman lai chu ka chelhbehsak ang che a. Khawpui chhûngah chuan hmêlmate ka hruai lût ang.

⁵Keimah ngeiin ka bân chak tak pharin thinrim tâwpkhâwk leh diriam tak chungin ka bei ang che u.

⁶He khawpuia chêng, mihring leh ran zawng zawng ka nghaisa ang a, hripuiin an thi ang.

⁷Chumi hnuah chuan, he khawpuia chêng Juda lal Zedekia leh a chhiahhlawhte hripui leh khandaihte leh ṭâm tuartea thi bâng zawng zawng chu Babulon lal Nabukadnezara kutah te, anmahni thah tumtu, an hmêlmate kutahte ka pe ang. Anni chuan khandaih hriamin an that ang a, an khawngaih lo vang a, an lainat hek lo vang,’ LALPA thuchhuak chuan a ti.

⁸“Hêng mite hnênah heti hian va sawi rawh: LALPA chuan heti hian a ti: ‘Ngai teh u, thihna kawng emaw, nunna kawng emaw, in duh zâwk thlan tûr ka siam a che u.

⁹He khawpuia awm reng duh chu ṭâm te, khandaih te, hripui te tuarin an thi ang. Amaherawhchu, kal chhuaka, nangmahni hualtu Kaldai-ho hnêna inpete chu râlin an man ang; mahse, an nun chu a him ang.

¹⁰He khawpui hi a ṭhat nân ni lovin a chhiat nân ka hawisan tawh,’ tih hi LALPA thuchhuak a ni. Babulon lal kutah ka pe ang a, anin meiin a hâl chhe vek ang,” a ti a.

¹¹“Juda lal chhûngte chuan hei hi hre rawh se;

¹²Davida chhûngte u, LALPA chuan heti hian a ti: ‘Tûk tin dik takin ro rêl ula, Rawk tuar chu a tiduhdahtu kut ata chhan rawh u; Chutilo zawng, in thil sual tihte avângin Ka thinrim mei angin a alh dah ang e, Tu ma tihmih theih a ni lo vang.

¹³Nangni tlângchhîp zâwl, lungpui chunga chêngte u, ‘Tu nge min bei tûr lo kal anga, Kulh chhûngah lo lût ang?’ tite u, Ka ngei hle che u a ni,” tih hi LALPA thuchhuak a ni.

¹⁴“In thil tih ang zêlin ka hrem ang che u,” Tih hi LALPA thuchhuak a ni. “An ram ngaw chu ka hâl ang a, A chhehvêl ram zawng zawng a kâng chhia ang,” a ti a.