Read Mizo Lushai Jeremia 22 Bible Online

Jeremia 22 - Mizo Lushai bible

Jeremia 22

¹ LALPA chuan heti hian a ti: “Juda lal inah zu kal la; tah chuan he thu hi sawi ang che.

²‘Aw nang, Juda lal, Davida ṭhutthlêng luahtu, i ṭhuihruai, he kawngkhâra lût ṭhînte leh i mite nên LALPA thu hi ngaithla rawh u.

³LALPA chuan heti hian a ti: Dik tak leh fel takin ro rêl ula, rawk tuarte chu tiduhdahtu kut ata chhan rawh u. Mikhual te, fahrah te, hmeithai te chungah dik lo taka tiin tharum thawh suh u, he hmunah hian pawi sawi lo thisen in chhuah tûr a ni lo.

⁴Hêng thute hi ṭha taka in zawm chuan Davida lalṭhutthlênga ṭhu lalte chu an chhiahhlawhte leh an mite nên sakawr-tawlailîrah te, sakawr chungahte chuangin he in kawngkhârah hian an vei tlang ang.

⁵Amaherawhchu, hêng thute hi in zawm loh chuan he in hi a ram vek ang, tiin mahni hming chhâlin ka tiam a ni,’ ” tih hi LALPA thuchhuak a ni.

⁶LALPA chuan Juda lal chhûngkaw chungchâng heti hian a sawi: “Nang chu ka tân Gilead ang, Lebanon tlângchhîp ang i ni; Mahse, thlalêrah ka siam ang che a; Luahtu awm lo khawpui ram ang mai i ni ang.

⁷Nangmah tichhetu tûr hriamhrei keng ka rawn tîr ang, I sidar thing chhuante an kit ang a, Meiah an paih lût ang.

⁸“Hnam dang miten he khawpui hi an paltlang ang a, ‘Engati nge he khawpui ropui tak chungah he thil hi LALPA chuan a tih le?’ an ti ang a.

⁹‘LALPA, an Pathian thuthlung an hawisan a, pathian dangte biain an rawng an bâwl vang a ni,’ tiin an chhâng ang.”

¹⁰Thi ta chu ṭah suh ula, sûn hek suh u, Kal bo ta tân erawh chuan lungchhe takin ṭap ula, a lo kîr leh dâwn tawh lo. A pianna ram a hmu leh dâwn tawh si lo.

¹¹Juda lal, Saluma, a pa Josia aiawha rorêltu, he hmun ata kal bo ta chungchâng thu chu LALPA chuan heti hian a ti: “A lo kîr leh tawh lo vang.

¹²Sala an hruaina hmunah a thi ang a, he ram hi a hmu leh tawh lo vang,” tiin.

¹³Dik lo taka thil tia in satu, Thil ṭha lo tia in chhâwng siamtu, Mite chhawra, an thawhhlawh pe duh lotu chu A chung a pik e.

¹⁴‘In ropui tak, chhâwng zau tak nei ka tân ka sa ang a, Tukverh zau tak tak ka hawng ang a, Sidar thingin ka thuah chhuak ang a, Rawng sen ka hnawih vek ang,’ a ti a.

¹⁵Sidar thinga in i sak theih avângin Lal ṭha zâwk i ni em ni? Sidar thing i ngah avâng khân Lal ta viauvah i inngai maw? I pa kha chuan dik tak leh fel takin thil a ti a, A duh tinrêng a eiin a in a, Tichuan, a lo hmuingîl ta hle a ni lâwm ni?

¹⁶Rethei leh chanhaite a ngaihsak a; Tichuan, a lo hmuingîl ta a ni. Chutiang chu nang pawhin min hriat dân tûr a ni lâwm ni? Tih hi LALPA thuchhuak a ni.

¹⁷Mahse, dik lo taka hlêp tumin i mit i lên a, Pawi sawi lote thisen i chhuah a, Mi dang i hnehchhiah a, thil i phût ṭeuh ṭeuh va.

¹⁸Chuvângin, Juda lal, Josia fapa, Jehoiakima chungthua LALPA thu chhuak chu hei hi a ni. ‘Aw ka pu, aw ka nuṭapa,’ tiin ani chu an ṭah lo vang. ‘Aw ka pu, chhuanawm ber,’ an ti hek lo vang.

¹⁹An hnûk ang a, Jerusalem kulh pâwnah an theh chhuak ang a, sabengtung ang lekin an phûm ang.

²⁰Lebanon-ah chho la, Basan-ah hriat khawpin au chiam rawh, Abarim aṭangin ṭap chiam rawh, Lainattu che an chhe ta si a.

²¹I hmuingîl laiin i hnênah thu ka sawi a, Mahse, ‘Ka ngaithla lo vang,’ i ti a. Hei hi i tleirâwl lai ata i awm dân a ni, Ka thu i awih loh hi.

²²In hotute thliin a lên bo vang a, lainattu che pawh salah an tâng ang a, I sualna avângin mualpho leh mangang takin i awm ang.

²³Nang, Lebanon-a chêng, sidar ina khawsa, Nauvei nâ ang natna i chunga a lo thlen hun chuan I va rûm nasa dâwn êm!

²⁴ LALPA thuchhuak chuan heti hian a ti: “Mi nung ka nih hi. Nang Juda lal Konia, Jehoiakima fapa, lal atân ka kut ding lamin lo chhinchhiah tawh che mah ila, chuta ta chu ka pawt chhuak ang che.

²⁵Nangmah thah tumtu, i hlauh êm êm Babulon lal Nebukadnezara kutah leh Kaldai-ho kutah ka pe ang che.

²⁶Hringtu che i nu nên i pianna ram ni lo, ram dangah ka theh chhuak ang che u; tah chuan in pahnihin in thi ang.

²⁷Kîr leh an châkna ramah chuan an kîr leh tawh lo vang.”

²⁸Kei chuan, “He Konia hi bêl keh, hmusitawm tak a ni lo vem ni? Tu man an ngaihsak loh hi. Engati nge amah leh a fate an paih chhuaha, An hriat loh rama theh chhuah an nih le?” ka ti a.

²⁹Aw ram, aw ram, aw ram, LALPA thu hi ngaithla rawh.

³⁰ LALPA chuan heti hian a ti: “ ‘He mi hi fa nei lo tûr, dam chhûnga hlawhtling lo tûr a ni. A thlahte tu mah an hmuingîl lo vang a, Davida lalṭhutthlênga ṭhu tûr leh Judai rama rorêltu tûr an awm leh tawh lo vang,’ tiin ziak rawh,” min ti a.