Read Mizo Lushai Jeremia 23 Bible Online

Jeremia 23 - Mizo Lushai bible

Jeremia 23

¹“Ka ran tlatna hmuna berâmte tidarha tiboraltu berâmpute chung chu a pik e,” tih hi LALPA thuchhuak a ni.

²Chuvângin, LALPA, Israel-te Pathian chuan ka mite enkawltu, berâmpute chungthu chu hetiangin a sawi: “Ka ran rual in ngaihsak lo va, in tidarh a, in ûm bo zo ta. Ngai teh u, in thil sual tih avâng hian ka hrem dâwn che u a ni!” tih hi LALPA thuchhuak a ni.

³“Ka ran rual la dam chhunte chu ka hnawh darhna ram tin aṭangin keiin ka hruai khâwm ang a, an huangah ka khalh khâwm ang a, fa an ngah ang a, an chak hle ang.

⁴Anmahni enkawltu tûr berâmpu ka dah ang a, hlau leh mangangin an awm tawh lo vang a, pakhat mah an bo tawh lo vang,” tih hi LALPA thuchhuak a ni.

⁵“Ngai teh, nite a lo thleng mêk e,” Tih hi LALPA thuchhuak a ni. “Davida thlah aṭangin lal dik tak a lo chawr chhuak ang a, Chu lal chuan fing takin ro a rêl ang. Ram pumah dik tak leh fel takin thil a ti ang.

⁶A lal chhûng chuan Juda chu a him ang a, Israel pawh thlamuang takin a awm ang. A hmingah, ‘LALPA, kan dikna’ tih a ni ang.

⁷“Tichuan, ngai teh, nite a lo thleng mêk e,” tih hi LALPA thuchhuak a ni. Mite chuan, ‘Aigupta ram ata Israel fate hruaichhuaktu LALPA chu a nung alâwm,’ an ti tawh lo vang a,

⁸‘Israela thlahte hmâr lam ram ata leh a ûm darhna ram tin aṭanga hruai chhuaka hruai hâwngtu LALPA chu a nung alâwm,’ an ti tawh zâwk ang. Tin, anmahni ram ngeiah an chêng ang.

⁹Zâwlneiho chung thu chu: Ka rilru a va na êm; Tirilah ka khûr, LALPA leh a thu thianghlim avâng hian Zu rui ang mai ka ni, rui hnêp ang mai hi.

¹⁰Ram chu uirenain a khat a, Ânchhia avângin a ngui zo ta. Kawng dik lo an zawh a, Dik lo takin an thiltihtheihna an hmang.

¹¹“Zâwlneite leh puithiamte chuan serh leh sâng an nei lo va, Ka in chhûngah ngei pawh an sualna ka hmu,” Tih hi LALPA thuchhuak a ni.

¹²“Chuvângin, an kawng chu zân thim kawng nâl ang a ni ang a, Tah chuan an tlânchhia ang a, an tlu ang a. Anmahni ka tlawh hunah An chhûngah thil ṭha lo ka thlentîr ang,” Tih hi LALPA thuchhuak a ni.

¹³Samari khaw zâwlneite zîngah thil tenawm tak ka hmu, Baal hmingin thu an puang a, Ka mi Israel-te an hruai bo ta.

¹⁴Jerusalem-a zâwlneite zîngah pawh thil râpthlâk tak ka hmu, An uire a, dâwt an sawi a, thil sual titute an thlâwp a, Tu man an sual sim an tum loh phah a, A chhûnga chêngte chu ka tân Sodom khua leh Gomora khaw mite ang maia sual an ni.

¹⁵Chuvângin, zâwlneite chungchângah Engkim LALPA chuan heti hian a ti: “Ngai teh, anni chu thil kha ka eitîr ang a, Tui kha ka intîr bawk ang. Jerusalem-a zâwlneite avângin ram pumah serh leh sâng pawisak lohna a punlun ta si a.”

¹⁶ LALPA Engkimtitheia chuan heti hian a ti: “In hnêna thupuangtu zâwlneite thu chu ngaithla suh u. Engmahlo mai mai an hrilh che u a, LALPA thu sawi ni lo, an thu phuahchawp an sawi ṭhîn.

¹⁷ LALPA thu ngainêptute hnênah chuan, ‘In ti ṭha e,’ an ti châmchi a; mahni thuduhte hnênah pawh ‘In chungah thil ṭha lo a thleng chuang lo vang,’ an ti.”

¹⁸ LALPA remruatnaah tute nge tela, A thu hre tûra ngaithla le? Tu nge a thu hriatthiam tuma ngaichâng?

¹⁹Ngai teh, LALPA thinur thli chu a tleh dâwn, Thli na tak chuan mi sualte lu chu a nuai ang.

²⁰ LALPA thinur chu a reh dâwn lo, A thiltumte a hlena a tih zawh hma chu, Nakin hnuah hei hi in la hria ang.

²¹“Ka tirh ni lo zâwlneite chu an vâk vêl a, Eng mah ka hrilh lo va, ka hrilh ni âwm takin an puang si a.

²²Ka remruatnaah tel ve ni sela, Ka mite hnênah ka thu an puang tûr; Tichuan, an awm dân sualte an bânsan ang a, An thil tihsualte an sim ngei ang.

²³Hla taka awm Pathian ni lovin hnai têa awm Pathian ka ni lâwm ni?” Tih hi LALPA thuchhuak a ni.

²⁴“Ka hmuh loh tûra hmun rilah tu nge biru thei?” Tih hi LALPA thuchhuak a ni. “Lei leh vân ka awh khat lo vem ni?” Tih hi LALPA thuchhuak a ni.

²⁵“Ka hming chhâla dâwt sawi zâwlneite chuan, ‘Mumangah kan mang a, mumangah min hrilh a ni,’ an tih chu ka hria.

²⁶Hêng zâwlnei dawthei, mahni phuahchawpa mi bum ṭhînte hian eng chen nge an bum zêl dâwn?

²⁷An paten Baal an bia a, ka hming an theihnghilh ta ang khân, ka hming an theihnghilh thei mahna tiin mite chu an mumangte an hrilh ṭhîn.

²⁸Mang nei zâwlnei chuan a mumang a ni tih sawi sela, chutiang bawkin ka thuchah dawngtu pawhin dik takin sawi rawh se. Buhpâwl leh buhfang an inang em ni?” tih hi LALPA thuchhuak a ni.

²⁹“Ka thu chu mei ang a ni a, lung chhutkehna tuboh ang hi a ni lo vem ni?” tih hi LALPA thuchhuak a ni.

³⁰“Chuvângin, ngai teh, zâwlnei, ka thu anga an ṭhiante thu sawi chhâwngte chu ka hua a ni,” tih hi LALPA thuchhuak a ni.

³¹“Ngai teh, zâwlnei, mahni phuahchawp sawia, ‘LALPA chuan heti hian a ti’ titute chu ka hua a ni,” tih hi LALPA thuchhuak a ni.

³²“Ngai teh, an mumang, dâwt thu puangtu chu ka hua a ni,” tih hi LALPA thuchhuak a ni. “Eng mah pawisa lovin dâwt an sawi an sawi a, ka mite an hruai bo ta. Anni chu ka tirh an ni lo va, ka ruat an ni hek lo. Hêng mite tân hian ṭangkaina rêng rêng an nei lo,” tih hi LALPA thuchhuak a ni.

³³“Hêng mite hian emaw, zâwlneiin emaw, puithiamin emaw, ‘LALPA phurrit chu eng nge ni?’ tia an zawh che chuan, ‘Nangni hi phurrit chu in ni, ka paih bo dâwn che u,’ tih hi LALPA thuchhuak a ni, tiin hrilh rawh,

³⁴Zâwlnei emaw, puithiam emaw, tu pawhin, ‘Hei hi LALPA phurrit a ni,’ an tih chuan chu mi leh a chhûngte chu ka hrem ang.

³⁵Mi tinin mahni ṭhenawmte leh unaute hnênah, ‘LALPA chuan eng nge a hrilh che? LALPA chuan eng nge a lo sawi?’ tiin an zâwt ang.

³⁶‘LALPA phurrit chu,’ in ti tûr a ni lo, in tih chuan ka thu chu in tân phurrit a ni takmeuh vang. Pathian nung, Engkim LALPA, kan Pathian thu chu in kailek zo ta si a.

³⁷Zâwlnei hnênah chuan, ‘Eng nge LALPA chuan a hrilh che? LALPA chuan eng nge a sawi?’ ti ang che.

³⁸‘Hei hi LALPA phurrit chu a ni,’ in tih chuan hetiangin LALPA chuan a ti, ‘Hei hi LALPA phurrit chu a ni, ti lo tûra ka hrilh che u pawhin, hei hi LALPA phurrit chu a ni,’ in la tih cheu avângin

³⁹ngai teh u, ka pawt chhuak ang che u a, ka hnên ata ka paih chhuak dâwn che u a ni, he khawpui, in pate leh in tâna ka lo pêk tawh nên hian.

⁴⁰Tichuan, kumkhuaa zahna leh mualphona, theihnghilh rual loh in chungah ka thlentîr ang.”