Read Mizo Lushai Jeremia 25 Bible Online

Jeremia 25 - Mizo Lushai bible

Jeremia 25

¹Juda lal Jehoiakima, Josia fapa a lal kum linaa Juda mi zawng zawng chungchâng thu-a Jeremia hnêna thu lo thleng chu: he hun hi Babulon lal Nebukadnezara lal kum khatna a ni.

²Zâwlnei Jeremia chuan Juda mi zawng zawng leh Jerusalem-a awm zawng zawng hnênah heti hian a ti:

³“Kum sawmhnih leh pathum chhûng, Amona fapa Josia, Judai rama a lal kum sâwm leh pathumna aṭanga vawiin thlengin LALPA thu ka hnêna lo thleng ṭhîn chu zîng taka thovin ka hrilh ka hrilh che u a; mahse, in ngaithla duh si lo.

⁴LALPA chuan a rawngbâwltu zâwlneite chu zîng tak takah a tîr fo va, in pawisa lo va, hriat tumin in beng in dawh hek lo.

⁵Mi tinin in awm dân sual te, in thil chin ṭha lote bânsan ula; tichuan, in pate leh in hnêna LALPA pêk ramah hian kumkhuain in awm thei ang.

⁶Pathian dangte rawngbâwl tûr leh chibai bûk tûrin kal suh u. In kuta in thil siam chuan min tithinur lo ula; tichuan, ka hrem lo vang che u, tiin.

⁷Mahse, mi ngaithla lo va, in kuta in thil siamte chuan min tithinur a, nangmahni in intichhe ta zâwk a ni, tih hi LALPA thuchhuak a ni.

⁸Tichuan, Engkim LALPA chuan heti hian a ti: “Ka thu in ngaihthlâk duh loh avângin

⁹hmâr lama hnamte chu ka ko dâwn,” tih hi LALPA thuchhuak a ni. “Babulon lal Nebukadnezara, ka chhiahhlawh chu, he rama chêngte leh a chhehvêl rama awm zawng zawng bei tûrin ka rawn hruai ang,” tih hi LALPA thuchhuak a ni. “Anni chu ka tichhe vek ang a, miin mak an ti ang a, râpthlâk an ti hle ang, an chhe hlen hlauh dâwn a ni.

¹⁰An hlim thâwm te, an lâm ri te, moneitu aw leh mo aw te, buh dêng thâwm te, khâwnvâr êngte ka titâwp ang.

¹¹He ram hi a pumin a ram ang a, a chhe vek ang a; hêng hnamte hian kum sawmsarih chhûng Babulon lal rawng an bâwl ang.

¹²“Kum sawmsarih hu a ral hnuah Babulon lal chu a mite nên an sual avângin ka hrem ang a, Kaldai ram chu ka tichhe hlen ang,” tih hi LALPA thuchhuak a ni.

¹³“Anmahni dema thu ka sawi zawng zawng, he lehkhabua chuang zawng zawng, Jeremian hnam zawng zawng kalha thu a lo puan tawhte chu he ram chungah hian ka thlentîr ang.

¹⁴Hnam tam tak leh ram ropui tak takte chuan anni chu salah an siam ang a, an thil lo tih tawh leh an kut hnathawh ang zêlin ka thungrûl ang.”

¹⁵ LALPA, Israel-te Pathian chuan ka hnênah heti hian a ti: “He uain no, ka thinurnaa khat hi, ka kut ata la la, ka tirhna che hnam zawng zawng intîr ang che.

¹⁶An in ang a, an pai an pai ang a, an â zo vang; an hnênah khandaih ka lêntîr dâwn avângin,” tiin.

¹⁷Tichuan, LALPA kuta no chu ka la a, LALPA mi tirhna hnam zawng zawng chu ka intîr a.

¹⁸Tûna a awm ang hian Jerusalem leh Judai ram khawpuite chu a ram vek ang a, an lalte leh hruaitute chu hmuhsit leh nuihzat an ni ang a, ânchhia an dawng ang.

¹⁹Aigupta lal Farawa leh a chhiahhlawh te, a rorêltute leh a mi zawng zawngte leh hnam dang awmte;

²⁰Uz rama lal zawng zawng te, Filistia rama lal, Askelon lal te, Gaza lal te, Ekron-a lal te leh Asdod-a hnutchhiaha awm lal te;

²¹Edom mi te, Moab mi te, Amon mi te;

²²Tura leh Sidon lal te, tuifinriat kama awm zawng zawng lal te;

²³Dedan te, Tema te, Buz-a chêngte leh lumêt zawng zawng te;

²⁴Arabia lal zawng zawng te, thlalêra chêng hnam inpawlh lal te;

²⁵Zimri lal zawng zawng te, Elam lal zawng zawng te; Media lal zawng zawng te;

²⁶Hmâr lam lal, hmun hla leh hnaia awm zawng zawng te leh lei lalram tinrêng te pawh chuan a indawt zêlin an in ang. Chumi zawhah chuan Babulon lal pawhin a in bawk ang.

²⁷Engkim LALPA, Israel-te Pathian chuan in hnênah heti hian sawi rawh min ti: ‘In ula, luak ula, tho thei lo khawpin tlu rawh u. In zîngah khandaih ka lentîr dâwn si a,’ tiin.

²⁸I kut ata no chu an lâk duh loh chuan heti hian hrilh ang che: Engkim LALPA chuan, ‘In in ngei tûr a ni, a ti,’ tiin.

²⁹“En teh u, ka hming chuanna khawpuiah chhiatna ka thlentîr ṭan ta a, nangni pawh hrem in tuar lo vang em ni? In pumpelh bîk hauh lo vang. Leia awm zawng zawng chungah khandaih ka lek dâwn si a,” tih hi Engkim LALPA thuchhuak a ni.

³⁰Tûnah, anni hi hetiang hian au khum rawh: “Vân sâng aṭangin LALPA chuan aw a chhuah ang a, A chênna Hmun Thianghlim aṭangin awrâwl a chhuah ang. A ram demin aw a chhuah ang a, Grep sâwrtute angin a au vang, Leia mi zawng zawng an khûr ang.

³¹A thâwm chuan kâwlkil a thleng ang, Hnamte chungah LALPA a thinur a ni. Mi zawng zawng ro a rêlsak ang, Mi suaksual chu khandaih a tuartîr ang,” Tih hi LALPA thuchhuak a ni.

³²Engkim LALPA chuan heti hian a ti: “En teh u, hnam tin chungah chhiatna a thleng ta, “Kâwlkil ata thlipui na tak a lo thawk dâwn,” tiin.

³³Chutih hunah chuan LALPA mi thahte chu Kâwlkil aṭanga a lehlam thlengin Tu man an ṭah lo vang a, an ruang te pawh an hlâwm hek lo vang, An phûm lo vang a, leia bawlhhlawh tling khâwm ang lek an ni ang.

³⁴Berâmpute u, ṭap ula, chiau vawng vawng rawh u, Nangni ran rual vêngtute u, Vaivutah let tawp tawp rawh u, An thah hun che u a thleng dâwn ta, In tlu ang a, hlumbêl ṭha tak keh ang maiin in keh darh vek ang.

³⁵Berâmpute chuan tlânchhiatna tûr rêng an hre lo, Ranrual vêngtute tân pawh pumpelh theih a ni hek lo.

³⁶Berâmpute ṭap thâwm leh ranrual vêngtute rûm thâwm chu, Ngaithla rawh u, LALPA chuan an ran tlatna hmun a tichhe tawh si a.

³⁷ LALPA thinurna nasa tak avâng chuan, Thlamuang taka an awm ṭhinna ram chu a ṭhing ta ṭhuap mai.

³⁸Hnehchhiahtu ngûnhnâm avâng leh Pathian thinurna nasa tak avâng chuan An chênna ram chu an chhuahsan ta, Sakeibakneiin a pûk a rauhsan ang maiin.