Read Mizo Lushai Jeremia 26 Bible Online

Jeremia 26 - Mizo Lushai bible

Jeremia 26

¹Juda lal Josia fapa, Jehoiakima a lal ṭan tirh kumin he thu hi LALPA hnên aṭangin a lo thleng a.

²Hetiangin: “LALPA chuan a ti, ‘LALPA in kawtzâwlah ding la, Juda khawpui zawng zawng aṭanga Pathian be tûra LALPA ina lo kalte hnênah thu sawi rawh. Thu ka pêk zawng zawng chu hmaih lovin puang ang che.

³Mite chuan an awm dân sual bânsanin an ngaithla mial mahna. Tichuan, an thil sual tihte avânga an chunga chhiatna thlentîr ka tum pawh ka sût leh ang.

⁴LALPA chuan heti hian a ti a ni,’ tiin anni chu hrilh rawh: In hnêna ka pêk, ka thu in pawisa lo va, ka dân in zâwm hek lo.

⁵In hnêna ka tirh fo ṭhin ka chhiahhlawh zâwlneite thu in pawisak loh avângin

⁶he in hi Silo angin ka tichhia ang a, he khawpui hi leia hnam tinrêng ânchhe dawngtu atân ka siam ang,” tiin.

⁷Tichuan, puithiam te, zâwlnei te, mipui zawng zawngte chuan hêng thu, LALPA ina Jeremia sawi chu an hria a.

⁸Mipui hrilh tûra LALPA thupêk zawng zawng a sawi zawh veleh puithiam te, zâwlnei te, mipui te chuan Jeremia chu an man a, “I thi ngei tûr a ni.

⁹Engati nge LALPA hming chhâla, ‘He in hi Silo ang a ni ang a, he khawpui pawh hi luahtu awm lovin a ram ang,’ tia i sawi?” an ti a. LALPA inah chuan mipui zawng zawngin Jeremia chu an bâwr ta huai huai a.

¹⁰Hêng thu hi Juda rorêltuten an hriat chuan lal in aṭangin LALPA inah an chho va, LALPA in kawngka thar luhnaah chuan an ṭhu a.

¹¹Puithiamte leh zâwlneite chuan rorêltute leh mipuite hnênah, “He mi hi thi tlâk a ni, in hriat angin ‘he khawpui hi a chhe dâwn’ tiin a sawi a ni,” an ti a.

¹²Jeremia chuan rorêltute leh mipui zawng zawng hnênah chuan heti hian a ti a: “In ngaihthlâk tâk ang khân he khawpui leh he in chhiat tûr thu hi sawi tûrin LALPA chuan mi tîr a ni.

¹³In awm dân te, in chetzia te siam ṭha ula, in Pathian, LALPA thu chu zâwm rawh u. Tichuan, in chunga chhiatna lo thleng tûr a lo puan tawh chu LALPA chuan a sût dâwn nia.

¹⁴Kei chu, hei, in kutah ka awm a, dik leh ṭha nia in hriat angin ka chungah ti mai rawh u.

¹⁵Min thah chuan he khawpui leh a chhûnga chêngte hian pawi sawi lo thisen mawh in phur ang tih hi hria ang che u. Hêng thu hi in beng hriata sawi tûrin LALPA chuan min tîr a ni e,” a ti a.

¹⁶Rorêltute leh mipuite chuan puithiamte leh zâwlneite hnênah chuan, “He mi hi tihhlum tûr a ni lo; LALPA, kan Pathian hmingin kan hnênah thu a sawi si a,” an ti a.

¹⁷Chumi rama upa tute emaw an lo ding chhuak a, mipui pung khâwm hnênah chuan,

¹⁸“Moreset mi, Mika chuan Juda lal Hezekia hun lai khân thu a hril a, Juda mi zawng zawng hnênah: ‘Engkim LALPA chuan heti hian a ti: Zion chu lo anga leh phut vek a ni ang a, Jerusalem pawh thil chhe vawm khâwm mai a ni ang, LALPA in tlângte chu a ngaw khung ang,’ a ti a.

¹⁹“Ani chu Juda lal Hezekia emaw, Juda mi dangten emaw an that em? Hezekia chuan LALPA a ṭih a, a tilâwm a. Tichuan, LALPA chuan an chunga thil ṭha lo tih a tum chu a sût ta a ni lâwm ni kha? Keini zawng keimahni chungah thil ṭha lo tak kan thlentîr dâwn ta a nih hi le!” an ti a.

²⁰(Mi dang, Semaia fapa Uria, Keriat-jearim mi chuan LALPA hmingin thu a puang a.

²¹Lal Jehoiakima leh a milian te, rorêltute chuan a thu sawi an hria a, lal chuan thah a tum ta a. Uria chuan a hriatin a hlau va, Aigupta ramah a tlân ta a.

²²Lal Jehoiakima chuan Akbora fapa Elnathana chu mi dangte nên Aigupta ramah a tîr a.

²³Uria chu Aigupta ram aṭangin an rawn hruai a, lal Jehoiakima hnênah an rawn thlen a. Ani chuan khandaihin a sât hlum a, a ruang chu vântlâng thlânmualah an phûm ta a ni.)

²⁴Amaherawhchu, Safana fapa Ahikama chuan Jeremia chu a ṭan tlat a, tihhlum tûrin mipui hnênah an pe ta lo va.