Read Mizo Lushai Jeremia 28 Bible Online

Jeremia 28 - Mizo Lushai bible

Jeremia 28

¹Chumi kum vêk, Judai ram lal Zedekia lal tirh lam, a kum lina, thla nganaah chuan zâwlnei Hanania, Azura fapa, Gibeon mi chuan puithiamte leh mipui zawng zawng hriatin LALPA inah chuan ka hnênah hetiangin thu a sawi a.

²“Engkim LALPA, Israel-te Pathian chuan heti hian a ti: ‘Babulon lal thuneihna chu ka tichhe ta.

³Babulon lal Nebukadnezaran hemi hmun aṭanga LALPA ina bungbêl a lâk, Babulon-a a phurh hâwn zawng zawng kha kum hnih chhûng ngeiin he hmunah hian ka rawn thlen leh vek dâwn.

⁴Juda lal Jekonia, Jehoiakima fapa leh Juda saltâng, Babulon-a kal zawng zawngte pawh he hmunah hian ka hruai kîr leh vek ang, Babulon lal thuneihna chu ka tichhia ang,’ tih hi LALPA thuchhuak a ni,” a ti a.

⁵Zâwlnei Jeremia chuan puithiamte leh LALPA ina ding mipui zawng zawng hmaah chuan zâwlnei Hanania hnênah hetiangin a sawi a:

⁶“Amen, LALPA chuan chutiang tak chuan ti rawh se, LALPA chuan thu i puan ang chuan thlentîr sela, Babulon-a bungbêlte leh saltâng zawng zawng he mi hmunah hian rawn thlen leh ngei rawh se.

⁷Amaherawhchu, nang leh mipui zawng zawngin in hnêna ka thu sawi hi lo hre teh u;

⁸Hmâsâng ata, nang leh kei kan pian hma aṭangin zâwlneiten, ‘indona te, ṭâm te, hripui te ram tam tak leh lalram ropui tak tak chungah a thleng dâwn,’ an ti ṭhîn a.

⁹‘Muanna a lo thleng dâwn,’ tih puangtu zâwlnei thu sawi chu a lo thlen hunah chu zâwlnei chu LALPA tirh a nih leh nih loh a hriat mai ang chu,” a ti a.

¹⁰Tichuan, zâwlnei Hanania chuan zâwlnei Jeremia nghâwngkawl bah lai chu a la a, a titliak ta a.

¹¹Hanania chuan mi zawng zawng hriatah heti hian a ti a: “LALPA chuan heti hian a ti: Hetiang tak hian Babulon lal Nebukadnezaran hnam zawng zawng a awpbehna thuneihna chu kum hnih chhûngin ka tichhe dâwn a ni,” tiin. Zâwlnei Jeremia chuan a kalsan ta a.

¹²Zâwlnei Hananian zâwlnei Jeremia nghâwngkawl bah a tihtliah hnuah LALPA thu chu Jeremia hnênah a lo thleng a

¹³“Kal la, LALPA chuan heti hian a ti, tiin Hanania chu va hrilh rawh: thing nghâwngkawl i titliak a, a aiah thîr nghâwngkawl i siamsak zâwk a nih hi,

¹⁴Engkim LALPA, Israel-te Pathian chuan heti hian a ti: Babulon lal Nebukadnezara rawngbâwl tûrin hêng hnam zawng zawng hi thîr nghâwngkawl ka bahtîr ta a ni. Tichuan, a rawng an bâwl ang a. Ramsa hlauhawm pui puite pawh a hnênah ka pe bawk a ni,” tiin.

¹⁵Zâwlnei Jeremia chuan zâwlnei Hanania hnênah, “Hanani, hre rawh, LALPA chuan a tîr lo che; hêng mite hi dâwt i rintîr mai mai a nih hi.

¹⁶Chuvângin, LALPA chuan heti hian a ti: ‘Ngai teh, lei ata ka la bo daih dâwn che, LALPA laka hel thu i puan avângin kuminah ngei i thi ang,’ a ti,” a ti a.

¹⁷Chumi kum, thla sarihnaah chuan zâwlnei Hanania chu a thi ta a.