Read Mizo Lushai Jeremia 29 Bible Online

Jeremia 29 - Mizo Lushai bible

Jeremia 29

¹Nebukadnezaran Jerusalem aṭanga Babulon-a a hruai, saltâng zînga hruaitu te, puithiam te, zâwlnei te leh mi zawng zawng hnêna zâwlnei Jeremia thu thawn chu hei hi a ni:

²Chu chu lal Jekonia leh a nu te, mi tilreh te, Judai ram leh Jerusalem-a hotu te, themthiam te leh thîrdêng ten Jerusalem an chhuahsan hnu khân a ni.

³Juda lal Zedekian Babulon lal Nebukadnezara hnêna a mi tirh, Safana fapa Elasa leh Hilkia fapa Gemaria te kutah chu lehkha chu a thawn a ni. Heti hian a ti:

⁴“Israel-te Pathian, Engkim LALPA chuan heti hian a ti: ‘Saltâng zawng zawng, Jerusalem aṭanga Babulon-a ka kaltîr tâkte u,

⁵in te sa ula; tah chuan chêng ang che u; huante siam ula, in thlai tharte chu ei ang che u.

⁶Nupui nei ula, fanu fapate nei ang che u. In fapate nupui neihsak ula, in fanute pawh pasal neihtîr ang che u. Tichuan, fanu fapa neiin in lo pung ang a, kiam lam pan suh u.

⁷Sala ka tirhna che u khawpui ṭhatna zawnsak ula, LALPA hnênah dîlsak rawh u. Chu ram hmuingîlna zâr chu nangni pawhin in zo ve dâwn si a.’

⁸Engkim LALPA, Israel-te Pathian chuan heti hian a ti: ‘In zînga zâwlnei te, aienthiam te chuan bum che u suh se. An mumangte pawh ngaithla suh u.

⁹Ka hmingin dâwt an hrilh che u a, anni chu ka tirh an ni hauh si lo,’ tih hi LALPA thuchhuak a ni.

¹⁰“LALPA chuan heti hian a ti: ‘Kum sawmsarih a tlin hunah Babulon ramah chuan ka rawn tlawh ang che u a, in hnêna ka thutiam nghet tak chu ka hlen ang a, he hmunah hian ka hruai kîr leh ang che u.

¹¹In tâna ka remruat chu keimah chauhvin ka hria,’ tih hi LALPA thu chhuak a ni. ‘Chhiatna ni lo, thil ṭha in beisei chu in chan theih nân ka ruahman a ni.

¹²Min lam ang a, ka hnênah in rawn ṭawngṭai ang a, ka lo ngaithla ang che u.

¹³Min zawng ang a, tihtakzeta min zawn hunah min hmu ang.

¹⁴In hmuh tûrin ka awm ang,’ tih hi LALPA thuchhuak a ni. Sal ata ka chhuah ang che u a, ka hnawhdarhna ram hnam zawng zawng leh hmun tinrêng aṭangin ka hruai khâwm leh ang che u,’ tih hi LALPA thuchhuak a ni.

¹⁵“ ‘LALPA chuan Babulon-ah pawh zâwlneite min siamsak a,’ in ti vei a.

¹⁶LALPA chuan Davida lalṭhutthlênga ṭhu tûr lal chungchâng te, he khawpuia chêng mipui chungchâng te, in unau, in hnêna sala tâng ve lote chungchâng thu heti hian a sawi:

¹⁷‘Ngai teh, an chungah khandaih te, ṭâm te, hripui te ka lêntîr dâwn e. Anni chu theipui ṭawih, ei tlâk loh khawpa chhia ang hian ka siam ang.

¹⁸Anni chu khandaih te, tâm te, hripui te nên ka ûmzui ang. Ka hnawhdarhna hnam tin zîngah leia lalram zawng zawngten thil râpthlâk leh ânchhia, mak an tiha an chek khum tlawk tlawkah leh an nuihzat huai huaiah ka siam ang.

¹⁹In hnêna zing tak taka ka tirh, ka chhiahhlawh zâwlneite thu in pawisa lo va, in ngaithla duh si lo,’ tih hi LALPA thuchhuak a ni.

²⁰Nangni, saltâng zawng zawng, Jerusalem aṭanga Babulon-a ka hruaite u, LALPA thu hi ngaithla rawh u.

²¹Israel-te Pathian, Engkim LALPA chuan Kolaia fapa Ahaba leh Maaseia fapa Zedekia, ka hminga dâwt thu puang ṭhînte chungchâng heti hian a sawi: ‘Ngai teh, anni chu Babulon lal Nebukadnezara ka mantîr ang a, in hmuh lai ngeiin a that ang.

²²Judai ram aṭanga Babulon-a saltâng zawng zawngte chuan, ‘Babulon lalin Zedekia leh Ahaba meia a rawh ang khân, LALPA chuan i chungah ti ve rawh se,’ tiin chûng mite hming chuan ânchhia an inlawh ang.

²³Israel ramah â takin thil an ti a, an ṭhenawmte nupui an uiresak a, ka hmingin dawt an sawi a, an hnênah thu ka pe si lo. Kei hi hrechiangtu thuhretu ka ni,’ LALPA thuchhuak chuan a ti,” tiin.

²⁴Nehelam mi, Semaia hnênah heti hian thu sawi rawh:

²⁵“Israel-te Pathian, Engkim LALPA chuan heti hian a ti, Jerusalem mipui zawng zawng hnênah te, Maaseia fapa Zefania, puithiam hnênah te, puithiam dang zawng zawng hnênah te nangma hmingin lehkha i thawn a, hetiangin i ti a:

²⁶‘Nang Zefania, LALPA chuan puithiam Jehoiada aiawhtu atân a ruat che a, LALPA ina â taka thu puang ṭhînte chu kawl te, thîrkawl te buntîrtu atân ruat i ni a.

²⁷Tûnah, Jeremia, Anathot khaw mi, in hnêna thu puangtu hi engtizia nge i zilh loh?

²⁸Babulon-a awmte chu, ‘Saltân chhûng a rei dâwn a, in leh lote bêngbel ula, huante pawh siam ula, in thlaite ei rawh u,’ tiin thu a thawn hi,” tiin.

²⁹Puithiam Zefania chuan he lehkha hi zâwlnei Jeremia hriatah a chhiar a.

³⁰LALPA thu chu Jeremia hnênah hetiangin a lo thleng a:

³¹“Hêng hi saltâng zawng zawng hrilh rawh: LALPA chuan Nehelam mi Zefania chungchâng heti hian a sawi: Semaia hian in hnênah thu a hril a, ani chu ka tirh a ni lo, dâwt a rintîr che u a ni.

³²Chuvângin, LALPA chuan heti hian a ti: Nehelam mi Semaia leh a thlahte chu ka hrem dâwn. In zîngah thlah pakhat mah a nei lo vang a, ka mite tâna thil ṭha ka tih tûr pawh a chang ve hek lo vang, LALPA laka hel thu a puan avângin, tih hi LALPA thuchhuak a ni,” a ti a.