Read Mizo Lushai Jeremia 3 Bible Online

Jeremia 3 - Mizo Lushai bible

Jeremia 3

¹“Miin a nupui ma sela, A nupui chuan pasal dang nei sela, Chu hmeichhia chu a pawm leh duh dâwn em ni? Ramin a bawlhhlawh phah vek dâwn lâwm ni? Nang chuan tlangvâl tam tak nei tawh mah la, ka hnênah i lo kîr leh duh lâwm ni?” LALPA thuchhuak chuan a ti.

²Tlâng kawlh vel vul lam khi hawi la, en vêl teh, An mutpui lohna che hmun a awm em? Arab tleirâwlhovin mi an châng angin Tlangvâl nghâkin kawng sîrah i ṭhu reng ṭhîn; I nawhchi zawrh avâng leh i suahsualna avângin Ram i tibawlhhlawh zo ta.

³Hêng avâng hian ruah a sûr lo va, Ruah hnuhnûng a sûr hek lo; Nawhchizuar hmêl i pu a, i zak duh hauh si lo.

⁴‘Ka pa, ka tleirâwl lai ata min kaihruaitu,’ Mi ti zo chauh a ni lâwm ni?

⁵‘A thinur reng ang maw? A thinrim kumkhua dâwn em ni?’ ti reng chung siin Ngai teh, a sual thei ang berin thil i ti ta si a.”

⁶Josia lal laiin LALPA chuan ka hnênah heti hian a ti: “Mi rinawm lo Israel-te thiltih hi i hmu em? Tlâng sâng tinah te chhovin, thingbuk tin hnuaiah te chuan thil sual an ti a.

⁷Hêng zawng zawng hi an tih hnuah ka hnênah an lo kîr ang chu ka ti a; mahse, an lo kîr chuang lo. An laizâwn Juda, mi bumhmangte pawhin an hmu a.

⁸Mi rinawm lo Israel-te chu an uirena sual ka hmuh vek avângin inmâkna lehkha ka pe a, ka hnawt chhuak a. A laizâwn, bumhmang Juda-te pawhin hlauh nachâng an hre lo va; an chhuak a, nawhchi an zuar ve ta a.

⁹Eng mah pawisa lova nawhchi an zawrh avângin ram chu an tibawlhhlawh zo ta a. Thingbulah te, lung bulah te chuan an uire ta a ni.

¹⁰Chuti chung pawhin an laizâwn, hel hmang Juda-te chu thinlung takin an lo kîr lo va, a der maiin a ni an lo kîr,” tih hi LALPA thuchhuak a ni.

¹¹ LALPA chuan ka hnênah heti hian a ti: “Mi rinawm lo Israel chu bumhmang Juda ai chuan fel zâwkah an inngai a.

¹²Kal la, hêng thu hi hmâr lamah va sawi rawh: ‘Rinawm lo Israel, lo kîr rawh, Tih hi LALPA thuchhuak a ni; Thinrimin ka en reng lo vang che, Zahngai thei tak ka ni si a, Tih hi LALPA thuchhuak a ni; ka thinur reng dâwn si lo.

¹³ LALPA, in Pathian laka in hel hi Thil sual in ti a ni tih hre rawh u. Thingbuk tin hnuaiah ram dang mite lakah in inphalrai a, ka thu in zâwm si lo, LALPA thuchhuak chuan a ti.

¹⁴Aw, mi rinawm lote u, lo kîr leh rawh u, LALPA thuchhuak chuan a ti; In pasal ka ni a, khawpui tin aṭangin mi pakhat, Hnam tin zîng ata mi pahnih, Ka thlang chhuak ang a, Zion-ah ka hruai ang che u.’

¹⁵“Ka lungdum zâwng tak berâmpute ka pe ang che u a, annin hriatna te, hriatthiamna tein an châwm ang che u.

¹⁶Chûng ni-ahte chuan in lo pung ang a, ram chhûngah in tam hle ang,” tih hi LALPA thuchhuak a ni. Mite chuan LALPA Thuthlung Bâwm an lam tawh lo vang a, an ngaihtuah tawh lo vang a, an hre reng tawh hek lo vang; an mamawh tawh lo vang a, a dang an siam tawh hek lo vang.

¹⁷Chumi hunah chuan Jerusalem chu LALPA lalṭhutthlêng an vuah ang a, Jerusalem-ah chuan hnam tinrêng LALPA hming fak tûrin an kal khâwm ang a, rilru sual puin luhlul takin eng mah an ti tawh lo vang.

¹⁸Chûng ni-ahte chuan Juda chhûngte leh Israel chhûngte chu an inzawm ang a, in pute hnêna rochan atân ka pêk ramah chuan hmâr lam aṭangin an lo haw ho vang.

¹⁹Ti hian ka ngaihtuah a, “Ram nuam tak, hnam tin rochan zînga ram ṭha ber pe chein, Fa atân neih che ka duh a; ‘Ka pa,’ tia min kohva, Min hawisan loh ka lo beisei tehlul nên,

²⁰Pasal laka rinawm lo hmeichhia ang hian Israel chhûngte u, Ka lakah in rinawm lo a ni,” Tih hi LALPA thuchhuak a ni.

²¹Tlâng kawlh vul lamah au thâwm a awm e, Israel fate ṭap thâwm leh dîlna au thâwm chu, An Pathian, LALPA chu an theihnghilh a, An pênsan tâk avâng a ni.

²²Fa rinawm lote u, lamlêt ula, In rinawm lohna chu ka tireh ang a, “En teh, i hnênah kan lo kal hi, Nang, LALPA chu kan Pathian i ni si a,

²³A ni, tlânga milem biak te hi a sâwt lo va, Tlâng chunga rîk bûng bûng te hi bumna mai a ni; LALPA, kan Pathian chauh hi a ni Israel-te chhandamtu chu.

²⁴Mahse, kan tleirâwl lai ata kan pate thawhrim rah, an berâm rual te, ran rual te, an fanu leh fapate chenin, hêng thil zahpuiawm, milem biak nân te hian an hmang zo va.

²⁵Zak takin i mu mai teh ang u, kan mualpho tâwpkhâwk ta a nih hi, kan Pathian lakah thil sual kan ti a. Keini leh min thlahtute nên, kan tleirâwl lai ata vawiin thlengin LALPA kan Pathian aw kan pawisa duh si lo,” in ti a.