Read Mizo Lushai Jeremia 30 Bible Online

Jeremia 30 - Mizo Lushai bible

Jeremia 30

¹Jeremia hnêna LALPA thu lo thleng chu:

²“LALPA, Israel-te Pathian chuan heti hian a ti: I hnêna ka thu sawi zawng zawng kha lehkhabu-ah ziak rawh.

³Ngai teh, nite a lo thleng mêk e,” tih hi LALPA thuchhuak a ni. “Ka mi Israel-te leh Juda-te chu an saltânna ata ka chhuah ang a, an pute hnêna ka pêk ramah chuan ka hruai hâwng leh ang a; tichuan, ram chu an luah ang,” tiin.

⁴Hêng hi Juda leh Israel chungchânga LALPA thu sawi chu a ni.

⁵LALPA chuan heti hian a ti: “Hlau leh mangang thâwm ka hria, Muanna rêng a awm lo.

⁶Hawiin zâwt vêl teh rêng u, Mipain nau an vei ngai em ni? Engtizia nge hmeichhe nau vei anga, Pachangin a pum a dawma, A hmêl a lo dân tâk?

⁷Chu ni chu a va han râpthlâk dâwn êm! A ang rêng a awm lo vang, Jakoba mangan hun tûr a ni, Mahse, chhan chhuah a ni ang.

⁸Chumi ni chuan a nghâwngkawl bah ka titliak ang a, An phuarna hrui ka phelhsak ang a, Ram dang mite chhiahhlawh an ni tawh lo vang,

⁹An Pathian, LALPA leh an lal atâna ka tun din tûr, Davida thlah zînga mi rawng chu an bâwl tawh zâwk ang.

¹⁰Aw ka chhiahhlawh Jakob, hlau suh, Aw Israel, zâm hek suh,” Tih hi LALPA thuchhuak a ni. “I thlah, ram hla taka saltângte chu ka chhan chhuak dâwn si a, Jakoba chu thlamuang tak leh him takin a awm ang, Tu man an tirâlṭi tawh lo vang.

¹¹Chhan chhuak tûr chein i hnênah ka awm reng e,” Tih hi LALPA thuchhuak a ni. “Ka hnawhdarhna che rama hnam zawng zawng chu, Ka tichimit vek ang a, Nang erawh chu ka tichimit lo vang che. A tâwk lekin ka thunun ang che a, Hrem loh zawngin i chhuak bîk lo vang.”

¹² LALPA chuan heti hian a ti: “I hliam chu tihdam rual a ni lo, I tuar hi a na êm a ni.

¹³I pân tidama i na tidam tûrin Enkawltu rêng i nei lo.

¹⁴I lamṭang zawng zawngten an theihnghilh tawh che a, An ngaihsak tawh lo che. Hmêlma angin ka hliam ta che a, Dim lo takin ka hrem che a ni, I sualna leh i bawhchhiatna a nasat êm avângin.

¹⁵I hliam vângin engah nge i phunnawi? I na hi tihdam rual a ni lo; I khawlohna a nasa a, thil tam tak i tihsual avângin Hêng thil hi i chungah ka ti a nih hi.

¹⁶Eiraltu zawng zawng che chu eiral an ni ang a, I hmêlma zawng zawng salah an hruai ang. Rawktu zawng zawng che u an rawk ang a, Tiramtu zawng zawng che pawh ka tiram ve ang.

¹⁷Ka tidam leh ang che, I hliam tuar pawh ka tidam ang,” Tih hi LALPA thuchhuak a ni. ‘Hnuchhawn, tu ma ngaihsak loh Zion,’ An tih che avângin.

¹⁸ LALPA chuan heti hian a ti: “Ngai teh, Jakob-ho ram chu ka din thar leh ang a, A chênna hmun chu ka lainat ang. Khawpui ram hnu chu ka siam ṭha ang a, Lal inte pawh a hmun ngaiah a ding leh ang.

¹⁹Chûng hmun aṭang chuan lâwmthu sawina leh Hlim thâwm a lo chhuak ang a, Anni chu ka tipung ang a, an kiam leh tawh lo vang, Ka tiropui ang a, an tenau hauh lo vang.

²⁰An fate chu tûn hma ang khân an awm leh ang a, Ka hmaah ngêlnghet takin an awm ang. Anmahni hnehchhiahtute chu ka hrem zêl ang.

²¹Anmahni mi ngei hruaituah an nei ang a, An zîng aṭangin rorêltu an lo chhuak ang, Anni chu min rawn hnaih tûrin ka sâwm ang a; Tichuan, min rawn hnaih ang. Sâwm lohvin tu nge mi rawn hnaih ngam ang?” Tih hi LALPA thuchhuak a ni.

²²Ka mite in ni ang a, in Pathian ka ni ang.

²³Ngai teh, LALPA thinurna thlipui chu na takin a tleh ta, Mi suaksualte lu chu a nuai nek ang.

²⁴A thiltumte a hlena a tih zawh hma loh chuan LALPA thinurna nasa tak chu a reh lo vang, Ni hnuhnûngah hei hi in la hrethiam ang.