Read Mizo Lushai Jeremia 31 Bible Online

Jeremia 31 - Mizo Lushai bible

Jeremia 31

¹“Chumi hnuah chuan kei hi Israel chhûngkua zawng zawng Pathian ka ni ang a, Anni pawh ka mite an ni ang,” LALPA thuchhuak chuan a ti.

² LALPA chuan heti hian a ti: “Khandaiha thah bângte chuan thlalêrah khawngaih an hlawh ang.” Israel-ten chawlhna ram an pan lai khân,

³Hmâna ka hnêna lo lang LALPA chuan, “Hmangaih tâwp lovin ka hmangaih che a, Ngilnei takin ka hruai zêl ang che,” a ti.

⁴Aw nula Israel, ka din thar leh dâwn che, Din ngheh i lo ni ang. Benchhekte kengin hlim taka lâm tûrin i chhuak leh ang.

⁵Samaria tlâng tluanin grep huan i siam leh ang a, Phuntute chuan a rah chu an ei ang.

⁶Râlvêngtuten Efraim tlângah mi an auh ni a thleng dâwn, ‘Tho teh u, LALPA kan Pathian hnênah, Zion-ah i chho vang u,’ tiin.

⁷ LALPA chuan heti hian a ti: “Jakoba tân hlim takin zai ula, Hnam azawnga ropui ber tân au chiam rawh u, Hril vêl ula, chawimawi rawh u, ‘Aw LALPA, Israel la damte chu humhim ang che,’ tiin.

⁸Ngai teh, anni chu hmâr lam aṭangin ka hruai dâwn, Lei hmun kil tin aṭangin ka hruai khâwm ang a, Mitdelte leh kebaite pawh an tel ve ang, Nau paite leh vei laite nên, Hnam ropui tak chu he hmunah hian an lo kîr leh ang.

⁹Ṭap chungin lo kîr mah se, Ka thlamuan ang a, ka hruai hâwng ang. Lui kamah te, kawng tluang an tlûk lohna tûrah te chuan ka hruai ang. Israel-te tân pa ka ni ang, Efraim chu ka fa tîr a ni si a.”

¹⁰Aw hnamte u, LALPA thu hi ngaithla ula, Tuifinriat kam ram hla takahte hril rawh u. ‘Israel tidarhtu chuan a hruai khâwm leh ang a, Berâmpu angin anni chu a enkawl dâwn,’ tiin.

¹¹ LALPA chuan Jakoba chu a tlan chhuak ang a, A aia chakte kut ata a chhan chhuak ang.

¹²Hlim taka auvin Zion tlângchhîpah an lo lâwn ang a, LALPA ṭhatna avâng chuan an hmêl a hlim êm êm ang. Buh te, uain te, hriak te, berâm leh ran rual note avâng chuan an lâwm ang, Anni chu hneh taka tuia châwm huan ang an ni ang a, An lungngai tawh lo vang.

¹³“Nulate chu hlim takin an lâm ang a, Tlangvâl leh tarte pawh an lâwm ang. An lungngaih lâwmah ka chantîr ang a, An lungchhia chu ka thlamuan ang.

¹⁴Puithiamte chu chaw tui takin ka hrai ang a, Ka mite chu ka ṭhatnain an tlai bawk ang,” Tih hi LALPA thuchhuak a ni.

¹⁵ LALPA chuan heti hian a ti: Rama khuaah thâwm an hria, Lungchhe taka ṭap tlawk tlawk thâwm chu; Rakili chuan a fate a ṭah a, An awm tawh loh avângin hnem theih a ni lo.

¹⁶ LALPA chuan heti hian a ti: “Insûm la, ṭap tawh suh, i mittui pawh hul rawh se, I thawh rah i seng dâwn e,” Tih hi LALPA thuchhuak a ni. “Râl ram aṭangin an lo hâwng dâwn.

¹⁷Nakinah chuan i chan a la ṭha hle ang, Mahni ram ngeiah i fate chu an lo kîr dâwn,” Tih hi LALPA thuchhuak a ni.

¹⁸“Efraim rûm thâwm chu ka hre reng a, ‘Nangin bâwngtuai la sâwi loh angin mi sâwi a, Min thunun tâk hi. Min hawi kîrtîr la, ka lo kîr ang, Min hruai la, Ka Pathian, LALPA chu i ni si a.

¹⁹Min hawi kîrtîr hnuin ka inchhîr a, Ka hriatthiam hnuin ka sim ta. Ka tleirâwl lai hmingchhiat phurin, Mualpho leh zak takin ka awm a ni.’

²⁰Efraim chu ka fapa duh tak, Ka duat êm êm chu a ni lâwm ni? Han khak ṭhîn mah ila ka thinlungah a châm reng a, Ani chu ka hre reng a, ka lainat takzet a ni,” Tih hi LALPA thuchhuak a ni.

²¹Kawng chhinchhiahna siam la, Kawng chin hriatna tûr ban phun rawh, I kawngpui zawh chu chhinchhiah ngun rawh. Nula Israel, lo kîr la, I khawpuiah hian lo kîr leh rawh.

²²Aw nang, fanu lepchiah, Eng chen nge i vah rawlai dâwn le? LALPA chuan leiah thil a siam thar ta em ni? Hmeichhiain mipa a rîm tâk hi!

²³Engkim LALPA, Israel-te Pathian chuan heti hian a ti: “An saltânna ata ka hruai kîr leh hun chuan Judai ram leh a khawpuiahte chuan hetiang ṭawngkam hi an hmang leh ang: ‘Aw, mi dikte chênna hmun, Aw, tlâng thianghlim, LALPA chuan malsâwm che rawh se,’ tiin.

²⁴Judai ram leh a khawpuiahte chuan loneitute leh berâm vêngtute an chêng ho vang.

²⁵Mi chaute chu ka tiharh ang a, ṭâmchhâwlte chu ka hrai tlai ang.”

²⁶Ka mu chu ka han ṭhanharh chuan ka han hawi vêl a, ka lo mutui hle a lo ni a.

²⁷“Ngai teh, nite a lo thleng dâwn e, Israel chhûngte zîngah leh Juda chhûngte zîngah mihring leh ran ka tipung ang,” tih hi LALPA thuchhuak a ni.

²⁸Anmahni pawtchhuaka tichhe tûr te, tithlua tiboral tûr te leh timangang tûr tein ka châng reng ṭhîn a; mahse, tungding leh tinghet tûrin ka ngaihven ta reng zâwk a ni, tih hi LALPA thuchhuak a ni.

²⁹Chûng ni-ahte chuan miten ‘Paten grep thûr an ei a, An fate hâ a ṭim e,’ An ti tawh ngai lo vang.

³⁰Mi tinin mahni sualna an thihpui ang a, Tu pawh grep thûr ei apiang an hâ a ṭim ang.

³¹“Ngai teh, nite a lo thleng dâwn e,” tih hi LALPA thuchhuak a ni. “Israel chhûngte leh Juda chhûngte nên thuthlung thar ka siam ang,” tih hi LALPA thuchhuak a ni.

³²“An thlahtute Aigupta ram aṭanga hruai chhuak tûra an kut ngeia ka chelh laia ka thuthlung ang kha a ni lo vang. An tân hotu ka ni chungin ka thuthlung chu an bawhchhe si a,” tih hi LALPA thuchhuak a ni.

³³“Chûng ni hnua Israel chhûngte nêna ka thu thlun tûr chu hei hi a ni: An rilruah ka Dân ka dah ang a, an thinlungah ka ziak bawk ang. Kei hi an Pathian ka ni ang a, anni chu ka mite an ni ang.

³⁴‘LALPA chu hre rawh u,’ tiin tu mahin an ṭhenawmte leh an unaute an zirtîr tawh lo vang. A tê ber aṭanga a lian ber thlengin min hre dâwn si a,” tih hi LALPA thuchhuak a ni. “Tichuan, an bawhchhiatnate ka ngaidam ang a, an sualnate ka hre reng tawh lo vang.”

³⁵LALPA chuan heti hian a ti: “Chhûn tiêngtu atâna ni daha, zân tiêngtu atâna thla leh arsite ruattu, ri hum hum tûra tuifinriat tichetu chu a hming Engkim LALPA a ni.

³⁶Hêng thil awmphung ruatte hi ka tihtâwp hma loh chu Israel hnamte pawh an ral lo vang,” tih hi LALPA thuchhuak a ni.

³⁷LALPA chuan heti hian a ti: “Chung lam vân khi in tehchhuah theiha, hnuai lama lei nghahchhante in zawn chhuah theih hunah, Israel thlahte chu an thil lo tih zawng zawng avângin ka paih ve ang,” tih hi LALPA thuchhuak a ni.

³⁸Ngai teh, nite a lo thleng mêk e, Hananela in sâng aṭanga kulh kil kawngka bul thlengin khawpui chu LALPA tân din thar a ni ang,” tih hi LALPA thuchhuak a ni.

³⁹A ramri chu Gareb tlâng thlengin ngîl takin a kal ang a, Goa lamah a kawi ang.

⁴⁰Mitthi phûmna leh bawlhhlawh paihna ruam pum pui leh a vêl ram zawng zawng, Kidron lui thlengin, chhak lam panga sakawr kawngka kil thleng chu LALPA tân tihhran a ni. Chu chu engtikah mah tihdarh leh tihchhiat a ni tawh lo vang.