Read Mizo Lushai Jeremia 32 Bible Online

Jeremia 32 - Mizo Lushai bible

Jeremia 32

¹Juda lal Zedekia lal kum sâwmnaah LALPA thu chu Jeremia hnênah a lo thleng a; chu chu Nebukadnezara lal kum sâwm leh kum riatna a ni.

²Chutih lai chuan Babulon lal sipaite chuan Jerusalem an hual a, zâwlnei Jeremia pawh Juda lal in vêngtute chênna hmunah an tântîr a.

³Juda lal Zedekia chuan chutah chuan a tântîr a, a hnênah, “LALPA chuan, ‘Ngai teh, he khawpui hi Babulon lal kutah ka pe ang a, a la ang.

⁴Juda lal Zedekia pawh Kaldai mite kut ata a chhuak lo vang, Babulon lal ka pe ang. Inhmatawnin an inbia ang a, chiang takin an inen ang.

⁵Zedekia chu Babulon-ah a hruai ang a, amah ka tlawh hma chu chutah chuan a awm reng ang. Kaldai-ho chu do mahsela a hlawhtling chuang lo vang, LALPA thuchhuak chuan a ti,’ tiin engati nge i sawi?” a ti a.

⁶ LALPA chuan heti hian a ti: LALPA thu chu ka hnênah a lo thleng a:

⁷“Ngai teh, i pami, Saluma fapa Hananela chu i hnênah a lo kal dâwn a, ‘Nang chhûngkhat laina hnai i ni bawk a, Anathot-a ka lo hi lei rawh’ a rawn ti ang che,’ tiin.

⁸Tichuan, LALPA thu ang chuan ka pami fapa Hananela chu vêngtu hung chhûngah ka hnênah a lo kal a, ‘Benjamin bial chhûnga Anathot khuaa ka lo chu lei ta che, rokhâwm thei i ni a, i chan tûr a ni, i tân lei mai rawh,’ mi rawn ti ta a. Hei hi LALPA thu kha a ni tih ka hre ta a.

⁹Anathot khuaa ka pami fapa Hananela lo chu ka lei a, a man atân tangka ka han bûk a, tangkarua sekel sâwm leh pasarih lai a ni.

¹⁰Kan thiltih chu lehkhaah kan ziak fel a, kan châr a, hretute kan ko va, tangka chu kan bûk chhuak a.

¹¹Ram leina, inlei dân ziakna chu châr leh châr loh ka siam a.

¹²Ka pami fapa Hananela mit hmuhah leh hretu, ram leina lehkhaa hming ziaktute leh hung chhûnga vêngtu, Juda ṭhuhote mit hmuhah Neria fapa Baruka, Maaseia tupa chu ka pe a.

¹³An beng hriatah Baruka chu hetiangin thu ka pe a:

¹⁴‘Israel-te Pathian, Engkim LALPA chuan heti hian a ti: Hêng lehkha, ram inlei dân chhinchhiahna châr leh châr lohte hi la la, a chhiat theih loh nân hlumbelah dah ṭha rawh.

¹⁵Israel-te Pathian, Engkim LALPA chuan heti hian a ti: He ramah hian in te, lo te, grep huante an la lei dâwn,’ ” tiin.

¹⁶Neria fapa Baruka hnêna ram leina lehkha ka pêk hnu chuan heti hian ka ṭawngṭai a,

¹⁷“Aw Lalpa PATHIAN, i thiltihtheihna nasa tak hmanga bân phar meuhva lei leh vân siamtu, i tân thil tih harsa lutuk eng mah a awm si lo.

¹⁸Nang zawng sâng tam tak chunga khawngaihna lantîra, pate sualna fate thlenga thungrûltu, aw Pathian ropui leh thiltithei, i hming chu Engkim LALPA a ni.

¹⁹Nang, remruattu ropui leh thil tithei tak, mihringte khawsak dân tinrêng i hre reng ṭhîn. Mi tin an awm dân leh an thiltih ang zêla rûltu,

²⁰Aigupta rama thil mak leh chhinchhiahnate tia, vawiin thlenga Israel ramah leh hnam dang zînga ti zêltu, tûn thlengin i hming i chher a ni.

²¹Thil makte leh chhinchhiahnate, kut chak tak leh bân phar meuhva thil râpthlâk takte tiin i mi Israel-te Aigupta ram ata i hruai chhuak a.

²²He ram, khawizu leh hnutetuia luang ram hi an thlahtute hnêna pêk i lo tiam tawh angin i pe ta a.

²³An lo kal a, an luah a; nimahsela, i thu an awih lo va, i Dân an zâwm hek lo. Tih tûra i thupêk rêng rêng eng mah an ti lo va. Chuvângin, hêng thil ṭha lo hi an chungah i thlentîr ta a ni.

²⁴En teh, khawpui lâk nân lei an chhûn pâwn tâk hi. Khandaih te, ṭâm te, hripui te an tuar avângin khawpui pawh a rawn rûntu Kaldai-hovin an la ta a ni. I hmuh ang hian i lo hrilh lâwk kha a lo thleng ta a nih hi.

²⁵Aw Lalpa PATHIAN, nang lahin ka hnênah, ‘Lo chu tangkain lei la, thuhretute ko vang che; khawpui erawh zawng Kaldai-ho kutah pêk a ni ta,’ i ti si a,” tiin.

²⁶ LALPA thu chu Jeremia hnênah heti hian a lo thleng a.

²⁷‘Ngai teh, kei LALPA hi mi zawng zawng Pathian ka ni a, ka tâna tih harsa lutuk eng nge awm?’ tiin.

²⁸Chuvângin, LALPA chuan heti hian a ti: “Ngai teh, he khawpui hi Kaldai-ho leh Babulon lal kutah ka pe ang a, an la ang.

²⁹He khawpui beitu Kaldai-ho chu an lo lût ang a, khua hi an hâl vek ang. Min tithinur tûra an in chunga Baal hnêna rimtui an hlanna te, pathian dang hnêna in tûr thilhlan an leih buakna zawng zawngte chu a kâng vek ang.

³⁰An tleirâwl chhuah ata Israel fate leh Juda mite chuan ka mit hmuhah thil ṭha lo hlîr an ti si a. Israel fate chuan an thilsiamte chuan min tithinur a ni,” tih hi LALPA thuchhuak a ni.

³¹He khawpui hi, an din tirh ni aṭanga tûn thlengin min tithinurtu leh min tihlim lotu a ni reng a, ka hmuh loh tûrin ka sawn bo dâwn a ni.

³²Israel mite leh Juda mite chuan thil ṭha lo an tih avângin min tithinur a, an lal te, hruaitu te, puithiam te, zâwlnei te leh Jerusalem-a chêng zawng zawngte nên min tithinur a ni.

³³Ka lam hawi lovin tukkhum chhah min chhawn a, ṭhahnemngai taka ka zirtîr chungin an ngaithla duh lo va, ka zilhna an pawm duh hek lo.

³⁴An milem tenawm chu ka in thianghlimah an dintîr a, an tibawlhhlawh ta.

³⁵Baal biak nân Ben-Hinom ruamah hmunsâng, an fanu te, an fapate, Moleka hnêna an hlanna tûr chu an siam a. Juda-ho hruai sual tûra he thil tenawm an tih hi ka thupêk a ni lo va, an tih duh pawh ka rin ngai loh a ni.

³⁶Israel-te Pathian, LALPA chuan heti hian a ti: “He khawpui hi Babulon lal kutah pêk a ni ang a; ‘ṭâm te, khandaih te, hripui te a tuar ang,’ tih a lo ni tawh a.

³⁷Mahse, ngai teh, thinur takin lungnilo leh thinrim chungin anni chu ka hnawt darh a; mahse, ka hnawh chhuahna ram zawng zawng ata ka hruai khâwm leh ngei dâwn. He hmunah hian ka rawn thlen ang a, thlamuang takin ka awmtîr ang.

³⁸Ka ta an ni ang a, kei hi an Pathian ka ni ang.

³⁹Thinlung hmun khat puin ka awm hotîr ang a, kumkhuain min ṭih ang a, chu chu an tân leh an thlah zêlte tân a ṭha ang.

⁴⁰Kumkhaw thuthlung ka siampui ang a, an tân thil ṭha tih ka bâng lo vang; min ṭih nachâng ka hriattîr ang a, min pên bosan tawh lo vang.

⁴¹An tâna thil ṭha tih chu ka lawmzâwng tak a ni ang a, he ramah hian ngêlnghet taka awmtîr ka tum tlat ang.”

⁴²LALPA chuan heti hian a ti: “Hêng mite chungah chhiatna nasa tak ka thlentîr ang khân an tâna thil ṭha pêk ka lo tiam tawh chu ka thlentîr ang,

⁴³‘ram ruak, mihring leh ran awm lohna, Kaldai-hovin an lâksak tawh hnu’ tia miten an sawi ṭhin he ramah hian lote in lei ang.

⁴⁴Benjamin bialah te, Jerusalem chhehvêl khuaah te, Judai ram khuaah te, tlângram khuaah te, thlang lam tuipui kamah te, chhim lamah te, tangkain lote in lei ang; an ziak fel ang a, an chhinchhiah tlat ang. Anni chu ka tungding leh dâwn a ni,” tih hi LALPA thuchhuak a ni.