Read Mizo Lushai Jeremia 33 Bible Online

Jeremia 33 - Mizo Lushai bible

Jeremia 33

¹Jeremia chu vêngtu hung chhûnga a la tân laiin a hnênah LALPA thu a lo thleng leh a:

²“Leilung siamtu LALPA, dintu leh tinghettu LALPA, a hming LALPA chuan heti hian a ti:

³‘Min ko la, ka chhâng ang che, i hriat ngai loh thil ropui leh ril tak ka hrilh ang che.’ ”

⁴LALPA, Israel-te Pathian chuan he khaw chhûnga ṭanhmun siam nân in te, Juda lal inte an ṭhiat tâk chungchâng heti hian a sawi:

⁵“Ka thinur nasa tak avângin anni chu ka hrem a, Kaldai-hote an beihlêt avângin an ruangte chuan khawpui hi ka tikhat ang. An sualna nasa tak avângin he khawpui hi ka hawisan tawh si a.

⁶Nimahsela, damna leh hrisêlna ka pe leh thuai ang a, ka mite chu ka tidam ang a, thlamuang tak leh him takin ka awmtîr ang.

⁷Juda leh Israel chu an saltânna ata ka hruai kîr leh ang a, tûnhmaa an awm dân ang khân ka awmtîr leh ang.

⁸Ka laka an sualna leh khawlohna zawng zawng ka sil fai ang a, ka laka an helna te, an sualna leh khawlohna zawng zawngte ka ngaidam vek ang.

⁹He khawpui hi thil ṭha ka tihsak tih hretu khawvêl hnam tinrêng mit hmuhah mi tihlimtu, mi tilâwmtu leh mi chawimawitu a ni ang a, thil ṭha tam tak leh hausakna nasa taka ka vûr avângin chûngho chuan anni chu an hlau vang a, an khûr ang.”

¹⁰ LALPA chuan heti hian a ti: “He hmun ram tawh, mihring leh ran awm tawh lohna tia an sawi ṭhin leh Judai ram khawpui te, Jerusalem kawtthlêr ram tawh, mihring leh ran awm lohna an tihahte chuan,

¹¹hlim leh lâwm ri te, mo leh moneitu thâwm te, LALPA ina lâwmna inthawina rite hriat a ni ang, hetiangin: ‘Engkim LALPA hnênah lâwmthu hril ula, LALPA chu a ṭha a, Kumkhuain ngil a nei dâwn si a,’ tiin. “Tûnhma ang khân ram chu ka dinthar leh dâwn,” LALPA chuan a ti.

¹²Engkim LALPA chuan heti hian a ti: “He hmun leh khawpui ram tawh zawng zawng, mihring leh ran awm tawh lohnaah hian berâmpute chu an berâm rual nên an awm leh ang.

¹³Tlângram khawpuiah te, thlang lam tuipui kam khawpuiah te, chhim lam khawpuiah te, Benjamin bialah te, Jerusalem vêlah te, Judai ram khawpuiah te berâmputen an berâm an chhiar leh mawlh mawlh tawh ang,” LALPA chuan a ti.

¹⁴“Ngai teh, nite a lo thleng mêk e,” tih hi LALPA thuchhuak a ni. “Juda chhûngte leh Israel chhûngte hnêna thu ka tiam tawh chu ka hlen ang.

¹⁵Chûng hunahte chuan Davida thlah aṭangin lal ṭha tak ka chawr chhuahtîr ang a, ani chuan ram pumah dik tak leh fel takin ro a rêl ang.

¹⁶Chûng hunah chuan Juda chu a him ang a, Jerusalem pawh thlamuang takin a awm ang. Chu lal chu a hming atân, ‘LALPA chu kan dikna,’ tih a ni ang.”

¹⁷LALPA chuan heti hian a ti: “Davida chuan Israel chhûngte zîngah a lalṭhutthlênga ṭhu tûr mi a tlachham lo vang.

¹⁸Levia chi, puithiamte pawhin ka hnêna hâlral thilhlan inthawina tûr an tlachham hek lo vang.

¹⁹LALPA thu chu Jeremia hnênah hetiangin a lo thleng a:

²⁰ LALPA chuan heti hian a ti: “Chhûn leh zân awm tûrin thu ka thlung a, An hun bi vawng tlat tûrin thu ka thlung a, Chu thuthlung chu in tihdanglam theih chuan,

²¹Ka chhiahhlawh Davida hnêna ka thuthlung, ‘A thlahte an lal zêl tûr thu’ leh ‘Levia chi puithiamten ka rawng an bâwl zêl ang,’ Ti-a thu ka thlun pawh a thlâwn a ni ang.

²²Ka chhiahhlawh Davida thlahte leh ka rawng min bâwlsaktu Levia chite chu vâna arsi chhiar sên rual loh leh Tuipui kama ṭiau chhiar sên rual loh zâtin ka tipung ang.”

²³ LALPA thu chu Jeremia hnênah hetiang hian a lo thleng a:

²⁴‘Chhûngkaw hnih, LALPA thlante chu paihthlâk an ni ta’ tia hêng miten an sawi chu,

²⁵LALPA chuan heti hian a ti: “Chhûn leh zân awm tûra ka thu thlung hi a ngheh lohva, lei leh vân awm dân tûr ka ruat hi a nghet lo a nih chuan,

²⁶Jakoba thlahte leh ka chhiahhlawh Davida chu ka paihthla ang a, an fate chu Abrahama thlahte, Isaka thlahte, Jakoba thlahte chunga rorêltu atân ka thlang lo vang. Anni chu ka tungding leh ang a, ka khawngaih dâwn si a,” tiin.