Read Mizo Lushai Jeremia 34 Bible Online

Jeremia 34 - Mizo Lushai bible

Jeremia 34

¹Babulon lal Nebukadnezara leh a sipai rual zawng zawngte leh a ṭhuihruaia awm, lalram chhûnga hnam tin chi tinten Jerusalem leh a vêl khawpuite an beih laiin LALPA thu Jeremia hnênah hetiang hian a lo thleng a:

²LALPA, Israel-te Pathian chuan heti hian a ti, “Kal la, Juda lal Zedekia chu heti hian va hrilh rawh: LALPA chuan heti hian a ti: Ngai teh, he khawpui hi Babulon lal hnênah ka pe ta, ani chuan meiin a hâl ang.

³An man ang che a, a hnênah an pe ang che, a kut ata chu i chhuak lo vang. Babulon lal nên hmaichhanah in inbia ang, Babulon-ah a hruai ang che.

⁴Aw Juda lal Zedekia, LALPA thu hi ngaithla teh: I chungthuah chuan LALPA chuan heti hian a ti: ‘Khandaihin i thi lo vang.

⁵Thih ṭhatin i thi ang a, in thlahtu, tûnhma lalte rimtui an hâlsak ṭhin angin nang pawh an hâlsak ang che. ‘A va pawi êm, ka pu!’ tiin an ṭah ang che.’ He ka thu sawi hi LALPA thuchhuak a ni.”

⁶Hêng thu zawng zawng hi Jeremian Jerusalem-a Juda lal Zedekia a hrilh a.

⁷Babulon lal sipaiten Jerusalem leh Judai ram khawpui zawng zawng an beih lai chuan Judai rama khaw kulh nei awm chhun chu Lakis leh Azeka khua chauh hi an ni.

⁸Lal Zedekia leh Jerusalem mi zawng zawngin bawih chhuah thu an puan hnuin LALPA thu chu Jeremia hnênah a lo thleng a.

⁹Mi tinin an Hebrai bawih, mipa pawh hmeichhia pawh an chhuah tûr a ni. Tu man a Juda-pui bawihah a nei tûr a ni lo.

¹⁰Tichuan, hotute leh mipui, thuthlung pawmtu zawng zawng chuan an bawihnu te, an bawihpate chu chhuaha hrên reng loh an remti tlâng a; an chhuah ta a.

¹¹Mahse, a hnu lâwkah an lamlêt a, an bawihnu leh bawihpa an chhuah tawhte chu la kîrin bawihah an siam leh ta a.

¹²LALPA thu chu Jeremia hnênah a lo thleng leh a.

¹³LALPA, Israel-te Pathian chuan heti hian a ti: “In saltânna, Aigupta ram ata ka hruai chhuah lai che u khân in thlahtute nên thu kan thlung a.

¹⁴Tu pawhin, kum sarih dan zêlah, a Hebrai-pui bawiha a lei chu a chhuah tûr a ni. Kum ruk rawng a lo bâwl tawh chuan chhuah ngei ngei tûr a ni; in pate khân ka thu an ngaithla lo va, min pawisa hek lo.

¹⁵Tûn hnai mai khân in inchhîr a, ka mit hmuha thil dik in ti a, mi tinin mahni chipuite in chhuah tâk thu in puang a. Ka hming chuanna inah, ka hmaah thu in thlung a.

¹⁶Mahse, in lamlêt leh a, ka hming in tichhia a, mi tinin in bawihnu leh bawihpate in chhuah chauh va, in bawiha awm leh tûrin in la lui leh ta a ni.”

¹⁷Chuvângin, LALPA chuan heti hian a ti: “Ka thu in zâwm lo va, in chipuite tân zalênna thu in puang lo va, kei erawh chuan in tân zalênna thu ka puang ta: khandaih te, hripui te, ṭâm tea in thihna tûr zalênna chu. Khawvêl ram tin tân ṭihkhaiah ka siam ang che u.

¹⁸Ka thuthlung bawhchhiaa ka hmaa thuthlung an siam bawhchhiaa, thuthlung zâwm lo chu bâwngno zai bun, a kâra an kal tlang ṭhinna angin ka siam ang.

¹⁹Juda hruaitute, Jerusalem-a hruaitute, rorêltute, puithiamte, ram chhûng mipui, bâwngno tan bun kâra kalte chu,

²⁰an hmêlma, thah tumtute kutah ka pe ang. An ruang chu chunglêng savate leh ramsate chaw a ni ang.

²¹Juda lal Zedekia leh a upate chu an hmêlma, anmahni thah tumtute leh Babulon lal sipai, anmahni ṭinsantute kutah ka pe ang.

²²He khawpuia lo lût leh tûrin thu ka pe ang. An rawn bei leh ang a, an la ang a, an hâl chhe vek ang. Juda khawpuite chu luahtu awm lovin ka tiram ang,” tih hi LALPA thuchhuak a ni.