Read Mizo Lushai Jeremia 35 Bible Online

Jeremia 35 - Mizo Lushai bible

Jeremia 35

¹Juda lal Josia fapa Jehoiakima lal laiin LALPA thu chu Jeremia hnênah hetiangin a lo thleng a.

²“Rekaba chhûngte hnênah kal la, LALPA in pindan chhûngah hruai la, anni chu uain in tûr pe rawh,” tiin.

³Tichuan, Habazinia fapa, Jeremia fa, Jaazania leh a unaute, a fa zawng zawngte leh Rekaba chhûngte zawng zawng chu ka hruai a.

⁴LALPA inah chuan anni chu ka hruai a, Pathian mi Igdalia fapa Hanana fate pindanah ka luhpui a, chu chu hotute pindan kiang, kawngkhâr vêngtu Saluma fapa Maaseia pindan chunga awm a ni.

⁵Tin, Rekaba chhûngte hmaah chuan chawhtawlh khat uain leh no ka dah a. “Uain hi in rawh u,” ka ti a.

⁶Anni chuan, “Uain kan in ngai lo, kan pa Rekaba fapa Jonadaba chuan, ‘Nangni leh in fate hian kumkhuain uain in reng reng suh u,’ tiin thu min chah a ni,” an ti a.

⁷“ ‘In pawh in sa tûr a ni lo, thlai in chîng tûr a ni lo va, grep huan pawh in siam tûr a ni hek lo. He in mikhualna ramah hian in dam rei theihna tûrin in dam chhûng nite chu puan inahte hmang zâwk ang che u,’ tiin thu min pe a ni.

⁸Tichuan, kan thlahtupa Rekaba fapa Jonadaba thu min pêk zawng zawng chu kan zâwm a, keini leh kan nupuite, kan fapate leh fanute chenin tu man uain kan in ngai lo.

⁹Kan awmna tûr in kan sa lo va, grep huan kan siam lo va, lo leh thlai kan nei hek lo.

¹⁰Puan inahte kan chêng a, min thlahtu Jonadaba thu min pêk chu a kip a kawiin kan zâwm a,

¹¹Babulon lal Nebukadnezaran he ram a rûn khân keini chuan, ‘Hawh u, Babulon sipai leh Suria sipai laka kan him nân Jerusalem-ah i chho vang u,’ kan ti a; tichuan, Jerusalem-ah hian kan awm ta a ni,” an ti a.

¹² LALPA thu chu Jeremia hnênah a lo thleng a.

¹³Israel-te Pathian, Engkim LALPA chuan heti hian a ti: “Juda mite leh Jerusalem-a chêngte hnênah kal la, hêng thu hi sawi rawh, ‘Ka thute ngaithla lovin ka zirtîrnate in pawm lo vang maw?’ LALPA chuan a ti.

¹⁴Rekaba fapa Jonadaba fate chuan an thlahtuten uain in lo tûra thu an pêk chu zâwmin tûn thlengin an in ta lo va. Kei erawh chuan in hnêna thu ka sawi ka sawi pawhin in ngaithla duh lo va.

¹⁵Ka rawngbâwltu, zâwlnei zawng zawngte in hnêna zing tak taka ka tirhten, ‘Mi tinin in awm dân sual hawisanin in thiltihte siam ṭha ula, pathian dangte rawng bâwl suh u; tichuan, nangni leh in thlahtute ka pêk ram hi in luah dâwn nia,’ an ti a. Mahse, min ngaihsak lo va, ka thu in ngaithla duh si lo.

¹⁶Rekaba fa, Jonadaba thlahte chuan an thlahtu thupêk an zâwm a, nangni erawh chuan ka thu in zâwm lo.

¹⁷Chuvângin, Engkim LALPA, Israel-te Pathian chuan heti hian a ti: “Ngai teh, Judai ram leh Jerusalem-a chêng zawng zawng chunga chhiatna lo thleng tûr ka sawite kha ka thlentîr dâwn e. An hnênah thu ka sawi a, an ngaithla si lo, ka ko va, min chhâng duh hek lo,” tiin.

¹⁸Jeremia chuan Rekaba chhûngte hnênah, “Engkim LALPA, Israel-te Pathian chuan heti hian a ti: In thlahtu Jonadaba thupêk leh a thu zirtîr zawng zawng in pawm a, a thupêk zawng zawng chu in zâwm a;

¹⁹chuvângin, Engkim LALPA, Israel-te Pathian chuan heti hian a ti: Rekaba fapa Jonadaba thlahte chu kumkhuain ka hmaa ding tûr an awm reng ang.”