Read Mizo Lushai Jeremia 36 Bible Online

Jeremia 36 - Mizo Lushai bible

Jeremia 36

¹Juda lal Josia fapa, Jehoiakima lal kum linaah LALPA thu Jeremia hnênah a lo thleng a.

²“Lehkhabu zial la la, Israel-te chungchâng te, Juda leh hnam dang chungchâng te i hnêna ka sawi zawng zawng chu ziak rawh. Josia lal laia i hnêna thu ka sawi ṭan ni aṭanga vawiin thlenga ka sawite kha ziak vek rawh.

³Juda mite chuan an chunga chhiatna thlentîr ka tumte chu hriain an awm dân sualte an sim mial mahna; an sim chuan an khawlohna leh an sualna chu ka lo ngaidam ang,” a ti a.

⁴Tichuan, Jeremia chuan Neria fapa Baruka chu a ko va, a hnêna LALPA thu sawi zawng zawng chu Jeremia chuan a sawi chhuak a, chu chu lehkhabu-ah Baruka chuan a lo ziak zêl a.

⁵Jeremia chuan Baruka hnênah, “LALPA ina kal thei lovin min khuahkhirh tlat si a;

⁶chuvângin, nang, chaw nghei ni-ah LALPA inah kal la, LALPA thu, lehkhabu ziala ka ziaktîr che kha, LALPA ina awmte hnênah chhiar chhuak rawh, Juda mi, an khua aṭanga lo kal zawng zawng hriatah pawh chhiar ang che.

⁷Mite chuan an awm dân sualte hawisanin LALPA hnênah ngaihdam an dil mial mahna. LALPA thupuan, a mite laka a thinur nasa tak hi a râpthlâk si a,” a ti a.

⁸Tichuan, Neria fapa Baruka chuan zâwlnei Jeremia hrilh ang zêl chuan LALPA thu chu LALPA inah chuan a chhiar chhuak ta a.

⁹Juda lal Josia fapa, Jehoiakima lal kum ngana, thla kuanaah chuan Jerusalem-a mi zawng zawng leh Judai ram khawpui aṭanga Jerusalem-a lo kal zawng zawngte chuan LALPA hmaa chaw nghei thu an puang a.

¹⁰Baruka chuan lehkhabu ziala Jeremia thute chu ziaktu Safana fapa Gemaria pindan, LALPA inah chuan mi zawng zawng hriatah a chhiar a. Chu hmun chu LALPA in chuanchung luhna kawngka thar bula awm a ni.

¹¹Safana fapa, Gemaria fapa Mikaia chuan lehkhabu ziala LALPA thu zawng zawng chu a lo hriatin,

¹²lal inah a chhuk a, ziaktu pindanah chuan a lût a; tah chuan hotu zawng zawng an lo ṭhu a. Chûng mite chu Elisama te, Semaia fapa Delaia te, Akbora fapa Elnathana te, Safana fapa Gemaria te, Hanania fapa Zedekia te leh hotu dang zawng zawngte an ni.

¹³Barukan mipui hnêna lehkhabu zial a chhiar aṭanga a thil hriat zawng zawng chu Mikaia chuan anni chu a hrilh a.

¹⁴Hotute chuan Nethania fapa Jehudia, Selemia tupa, Kusia tupa chu Baruka hnênah an tîr a, a hnênah, “Mite hmaa i chhiar chhuah lehkhabu zial chu rawn keng la, lo kal rawh,” an ti a. Neria fapa Baruka chu lehkhabu zial kengin an hnênah a lo kal a.

¹⁵A hnênah, “Ṭhu la, kan hriatah chhiar ve teh le,” an ti a. Tin, Baruka chuan an hnênah a chhiar a,

¹⁶Chûng thu chu an hriatin an inen a, Baruka hnênah chuan, “Hêng thu hi lal hnênah kan hrilh ngei ang,” an ti a.

¹⁷Baruka hnênah chuan, “Hêng thute hi engtin nge i ziak, Jeremia thuchhuak ngei a ni maw?” an ti a.

¹⁸Baruka chuan, “Hêng thute hi ka hnênah a sawi a, keiin lehkhabu zialah ka lo ziak chhâwng mai a ni,” a ti a.

¹⁹Tichuan, hotute chuan Baruka hnênah, “Chhuak la, Jeremia nên biru rawh u, tu man in awmna hre suh se,” an ti a.

²⁰Tin, lal in hung chhûngah an lût a, lehkhabu zial chu ziaktu Elisama pindanah an hnutchhiah a, lal hnênah an thu hriat zawng zawng chu an hrilh a.

²¹Lal chuan Jehudia chu lehkhabu zial la tûrin a tîr a, ziaktu Elisama pindan ata chu a va la chhuak a. Jehudia chuan lal leh a vêla hotu ding zawng zawng hriatah a chhiar a.

²²Thla kuana a ni a, lal chu a thlasik ina awm a ni a, meihawl thuk vâm huam chu a ai a.

²³Jehudia chuan lehkhabu zial thlûr thum emaw, thlûr li emaw a chhiar hnu chuan lal chuan chemtêin a zaibung a, thukah a paih lût a, lehkhabu zial chu a kâng ral ta a.

²⁴Lal leh a ṭhuihruaiho, hêng thu zawng zawng hretute chuan hlau hmêl an pu lo va, an puante an pawtthlêr hek lo.

²⁵Elnathana te, Delaia te, Gemaria ten lehkhabu zial hâl lo tûra lal chu an ngen chiam pawhin a sâwt chuang lo va ni.

²⁶Lal chuan, ziaktu Baruka leh zâwlnei Jeremia chu man tûrin lal fapa Jerameela te, Azriela fapa Seraia te, Abdeela fapa Selamia te chu thu a pe ta a; mahse, LALPA chuan anni chu a thukru a.

²⁷Lehkhabu zial, Jeremia sawi chhuah Barukan a ziak zawng zawng chu lalin a hâl ral hnu chuan LALPA thu chu Jeremia hnênah hetiang hian a lo thleng a.

²⁸“Lehkhabu zial dang la la, lehkhabu zial hmasaa thu zawng zawng, Juda lal Jehoiakiman a hâl ral tâkte kha, ziak leh vek rawh.

²⁹Juda lal Jehoiakima chungchâng thu-ah heti hian ti ang che: ‘Babulon lal a lo kal ang a, he ram hi a tichhia ang a, mihring leh rante a tiboral vek ang, tiin engati nge i ziak?’ tiin lehkhabu zial chu i hâl vei a.

³⁰Chuvângin, Juda lal Jehoiakima chungthuah LALPA chuan heti hian a ti: ‘Davida lalṭhutthlênga ṭhu tûr mi a nei lo vang, a ruang chu chhûn ni sa leh zân khaw vâwt tuar tûrin theh chhuah a ni ang.

³¹An sual avângin amah leh a thlahte leh a rawngbâwltute chu ka hrem ang. An chunga chhiatna lo thleng tûr ka sawi te, Jerusalem leh Judai ram mi tin chunga lo thleng tûr ka sawi te hi an pawisak loh avângin,” a ti a.

³²Tichuan, Jeremian lehkhabu zial dang a la a, Neria fapa Baruka, ziaktu hnênah a pe a, ani chuan Jeremia ṭawngka chhuak, lehkhabua ziak tawh zawng zawng, Jehoiakiman a hâl ral tâk thute leh a anpui thu dangte nên a ziak a.