Read Mizo Lushai Jeremia 37 Bible Online

Jeremia 37 - Mizo Lushai bible

Jeremia 37

¹Babulon lal Nebukadnezaran Judai ram lal atâna a dah Josia fapa Zedekia chu Jehoiakima fapa Konia aiah a lo lal ta a.

²Mahse, amah leh a ṭhuihruaite leh a rama mite chuan LALPA thu zâwlnei Jeremia sawi chu an pawisa lo va.

³Lal Zedekia chuan Selemia fapa Jehukala leh Maaseia fapa puithiam Zefania chu zâwlnei Jeremia hnênah, ‘khawngaih takin LALPA, kan Pathian hnênah min ṭawngṭaisak rawh,’ ti tûrin a tîr a.

⁴Jeremia chu vântlâng zîngah zalên takin a la vâk vêl thei a, tân inah an la khung lo va ni.

⁵Farawa sipaite chu Aigupta aṭangin an lo chhuak chho va. An thâwm chu Jerusalem hualtu, Kaldai-hoten an hriatin Jerusalem chu an ṭinsan a.

⁶LALPA thu chu zâwlnei Jeremia hnênah a lo thleng a:

⁷LALPA, Israel-te Pathian chuan heti hian a ti: “Juda lal, min râwn tûra rawn tîrtu che u hnênah chuan heti hian sawi rawh u: ‘Ngai teh, Farawa sipai, nangmah pui tûra lo chhuakte chu, an ram Aigupta-ah an kîr leh ta.

⁸Kaldai-ho chu an lo lêt leh ang a, he khawpui hi an bei ang a, an la ang a, an hâl chhe vek ang,’ tiin.

⁹LALPA chuan heti hian a ti: Kaldai-ho chuan min kalsan ngei ang tiin mahni inbum suh u. An kal bo hlen dâwn si lo.

¹⁰Nangmahni rawn beitu Kaldai sipai rual hi hneh vek mah ula, an zînga hliam tuar, an puan ina mute pawh chu, an lo tho leh ang a, he khawpui hi an hâl chhe vek ang, tiin hrilh rawh,” a ti a.

¹¹Farawa sipai rual an lo hnaih avânga Kaldai sipaite Jerusalem aṭanga an tawlh kîr lai khân,

¹²Jeremia chuan a chipuite zînga a ro chanpual la tûrin Jerusalem chhuahsanin Benjamin bialah a kal dâwn a,

¹³Benjamin kawngka chu a thlen chuan vêngtu zînga hotu, a hming Iriza, Selemia fapa, Hanania tupa ni bawk chuan zâwlnei Jeremia chu, “Kaldai-ho hnêna inpêk i tum a nih hi,” tiin a lo man a.

¹⁴Jeremia chuan “Tum lo ve, Kaldai-ho hnênah inpêk ka tum awzâwng lo,” a tih pawhin Iriza chuan a thu sawi chu a ngaithla duh lo va, Jeremia chu a man a, hotute hnênah a hruai ta a.

¹⁵Hotute chu Jeremia chungah chuan an thinur hle a, an vua a, ziaktu Jonathana inah an tântîr a, chu chu tân in atân an hmang a ni.

¹⁶Jeremia chu khur thim takah ni rei tak a awm a.

¹⁷Lal Zedekia chuan a ko chhuak a, ani chu an rawn hruai a. Lal chuan a rûk têin a inah chuan thu a zâwt a, “LALPA hnên ata thu eng emaw tal a awm em?” a ti a. Jeremia chuan, “Awm e, Babulon lal kutah i inpe tûr a ni,” a ti a.

¹⁸Jeremia chuan lal Zedekia hnênah chuan, “I lakah emaw, i ṭhuihruaite lakah emaw, mipui lakah emaw, eng nge ka tihsual, eng vângin nge tân ina min dah?” a ti a.

¹⁹“ ‘Babulon lal chu nangmah leh he ram do tûrin a lo kal lo vang’ tia thu puangtu i zâwlneite kha khawiah nge an awm tâk?

²⁰Tûnah, ka pu Lalber, khawngaih takin ngaithla teh, ka dîl che hi min phalsak hrâm rawh. Ziaktu Jonathana inah chuan min kîrtîr lul suh ang che, chumi hmunah zawng ka thi mai ang,” a ti a.

²¹Lal Zedekia chuan thu a pe a, Jeremia chu vêngtu hung chhûngah chuan a tântîr a, chhang siamtute hnên aṭangin ni tin chhang tlang khat khawpuia chhang a awm chhûng chu a pe a. Chutiang chuan Jeremia chu vêngtu hung chhûngah chuan a awm ta reng a.