Read Mizo Lushai Jeremia 38 Bible Online

Jeremia 38 - Mizo Lushai bible

Jeremia 38

¹Matana fapa Sefatia te, Pasura fapa Gedalia te, Selemia fapa Jukala te, Malakia fapa Pasura te chuan mi hnêna hetianga Jeremia thu sawi chu an hria a.

²LALPA chuan heti hian a ti, ‘He khawpuia awmte chu khandaih te, ṭâm te, hripuite tuarin an thi ang a, Kaldai-ho hnêna inpete erawh chu an him ang; an man ang a, an nung ang.’

³LALPA chuan heti hian a ti, ‘He khawpui hi Babulon lal sipaite kutah pêk a ni ngei ang a; tichuan, an la ang’ tiin.

⁴Tin, hotute chuan lal hnênah, “He mi hi tihhlum tûr a ni, he khawpuia sipai la awmte leh mipuite hi hêng thu a sawi avângte hian an zâm zo ta si a. He mi hian mipui ṭhatna zawng lovin an chhiatna tûr a zawng zâwk a ni,” an ti a.

⁵Lal Zedekia chuan, “Ngai teh u, ani chu in kuta awm alâwm, lal hi in duh loh zâwng ti thei a ni hlei nêm,” a ti a.

⁶Tichuan, Jeremia chu an hruai a, vêngtu hung chhûnga lal fapa Malkia tuichhunchhuah chhûngah an thlâk a; Jeremia chu hruizênin an thlâk a ni, a chhûngah chuan chirhdiak chauh lo chu tui rêng a tling lo va, chirhdiakah chuan Jeremia chu a tla ta a.

⁷Ethiopia mi, mi tilreh, lal ina awm ṭhîn Ebedmeleka chuan Jeremia chu tuichhunchhuah mawngah an thlâk tih a lo hria a. Chutih lai chuan lal chu Benjamin kawngkaah ro a rêl a.

⁸Ebedmeleka chu lal in ata a chhuak a, lal hnênah chuan,

⁹“Ka pu, lalber, hêng mite hian zâwlnei Jeremia chungah thil sual nasa tak an ti a ni. Tuichhunchhuah chhûngah an thlâk a, rilṭâmin chutah chuan a thi mai ang, khawpuiah chaw a awm tawh si lo,” a ti a.

¹⁰Lal chuan Ethiopia mi Ebedmeleka chu thu a pe a, “Heta ṭangin mi sawmthum hruai la, zâwlnei Jeremia chu a thih hmain tuichhunchhuah ata chu la chhuak rawh u,” tiin.

¹¹Ebedmeleka chuan mite chu a hruai a, lal tangka in hnuai, thawmhnaw hlui dahnaah chuan an lût a, chuta kawr leh puan chhiate chu an la a, tuichhunchhuah chhûnga Jeremia hnênah chuan hruizênin an thlâkthla a.

¹²Ethiopia mi, Ebedmeleka chuan Jeremia hnênah, “Hêng kawr hlui leh puan chhiate hi i zak damah hrên hnan rawh,” a ti a.

¹³Tichuan, Jeremia chu tuichhunchhuah ata chu hruizênin an khai chhuak a, vêngtu hung chhûngah chuan a awm ta a.

¹⁴Lal Zedekia chuan Jeremia chu a ko va, LALPA in luhna kawngkhâr pathumnaah an rawn hruai a. Lal chuan Jeremia hnênah, “Thil ka zâwt ang che a, ka hnênah eng mah sawi hreh suh ang che,” a ti a.

¹⁵Jeremia chuan Zedekia hnênah, “Ka hrilh vek che chuan min tihlum mai lo vang maw? Thu râwn che mah ila min ngaithla awm si lo va,” a ti a.

¹⁶Lal Zedekia chuan Jeremia hnênah: “LALPA, ka nunna siamtu hmingin ka tihlum tawp lo vang che, hêng tihhlum tumtu che hnênah pawh hian ka pe tawp lo vang che,” tiin a rûk têin thu a tiam a.

¹⁷Jeremia chuan Zedekia hnênah, “Engkim LALPA, Israel-te Pathian chuan heti hian a ti: ‘Babulon lal sipai kuta in inpêk chuan in him ang a, he khawpui hi hâl chhiat a ni lo vang a, nang leh i chhûngte pawh zuah in ni ang.

¹⁸Babulon lal sipai kuta in inpêk loh erawh chuan he khawpui hi Babulon mite kutah pêk a ni ang, an hâl chhe vek ang a, nang pawh an kut ata i chhuak lo vang,” a ti a.

¹⁹Lal Zedekia chuan Jeremia hnênah, “Babulon mite hnêna inpe Juda-hote hi ka hlau a ni. An kutah min pe ang a, min sawisa hrep mai ang,” a ti a.

²⁰Jeremia chuan, “An pe hauh lo vang che, LALPA thu ka hrilh che hi awih mai rawh; chu chu i tân a ṭha ang, i nun pawh zuah a ni ang.

²¹I inpêk duh loh erawh chuan hei hi LALPA thu min hriattîr chu a ni.

²²Juda lal ina hmeichhe la awm zawng zawng chu Babulon lal hotute hnênah an hruai ang a, chûng hmeichhiate chuan i hnênah heti hian an sawi ang: ‘I ṭhian ṭhaten an bum che a, an thuhnuaiah an dah ta che, chirhdiaka i ke a tân laiin an hawisan ta che,’ tiin.

²³“I nupui leh i fate chu Babulon-ah an hruai vek ang. Nang pawh an kut ata i chhuak lo vang; Babulon lalin a man ang che a, he khawpui hi a kâng chhe vek ang,” a ti a.

²⁴Zedekia chuan Jeremia hnênah: “Hêng thute hi tu man hre suh se; tichuan, i thi lo vang.

²⁵Hotuten ka bia che tih an hriat chuan i hnênah an lo kal ang a, ‘Lal hnênah eng nge i sawia, lalin i hnênah eng nge a sawi, min hrilh rawh, eng mah zêp suh, kan tihlum lo vang che,’ an tih chuan

²⁶nangin an hnênah, ‘Lal chu Jonathana ina min tîr kîr lo tûrin ka ngên a ni, i ti dâwn nia,’ a ti a.

²⁷An vaiin hotute chu Jeremia hnênah an lo kal a, an zâwt ta ngei a, lalin sawi tûra a tih angin anni chu a lo hrilh a. Tichuan, a hnênah eng mah an sawi zêl ta lo va, lal nêna an inbiakna thu pawh tu man an hre hek lo.

²⁸Jeremia chu Jerusalem an lâk ni thlengin vêngtu hung chhûngah chuan a awm ta reng a.