Read Mizo Lushai Jeremia 39 Bible Online

Jeremia 39 - Mizo Lushai bible

Jeremia 39

¹Judai lal Zedekia lal kum kuana, a thla sâwmnaah Babulon lal Nebukadnezara leh a sipai rualte chuan Jerusalem an rûn a, an hual tlat a.

²Zedekia lal kum sâwm leh kum khatna, thla lina, ni kua ni chuan kulh chu tihchim a ni ta a.

³Babulon lal milianhote chu an lo lût a, kawngka laita bulah chuan awmhmun an rem a. Chûng mite chu: Nergal-serezera te, Samgarneboa te, Sarsekima te, Rab-saria te, Nergal-sarezera te, Rabmaga te leh Babulon lal milian leh hotu dang te an ni.

⁴Juda lal Zedekia leh a sipai zawng zawngte chuan anni chu an hmuhin an tlânchhe ta a. Zânah lal huan kawng, kulh bang pahnih inkâr kawngah an relhru a, Arabah lam panna kawngah an tlân ta a.

⁵Babulon sipaite chuan anni chu an ûm a, Jordan phaiah Zedekia chu an ûm pha a, an man a, Babulon lal Nebukadnezara hnênah, Hamat rama Ribla khuaah an hruai a; chutah chuan a chungthu an rêl a.

⁶Babulon lal chuan Ribla hmunah Juda mi ṭha zawng zawng leh a fate chu Zedekia hmuh lai ngeiin a that a.

⁷Zedekia mitmu a kher chhuak a, thîr kawl a buntîr a, Babulon-ah a hruai ta a.

⁸Kaldai-ho chuan lal in leh in dang zawng zawng chu an hâl a, Jerusalem kulh bangte an tichim a.

⁹Lal vêngtu hotu, Nebuzaradana chuan khawpuia mipui la awmte, a hnêna inpete nên, an za vaiin Babulon-ah salah a hruai a.

¹⁰Lal vêngtu hotu Nebuzaradana chuan mi rethei, eng mah nei lote chu Judai ramah chuan a hnutchhiah a, grep huan leh lote a pe nghâl a.

¹¹Babulon lal Nebukadnezara chuan lal vêngtu hotu Nebuzaradana hnênah hetiangin thu a pe a:

¹²“Ani hi chu hruai la, ṭha takin enkawl rawh, tina rêng rêng suh, a ngen apiang tihsak zâwk ang che,” a ti a.

¹³Tichuan, lal vêngtu hotu Nebuzaradana te, sipai lal ber Nebusazbana te, aienthiam hotupa Nergel-Sarezara te leh Babulon hotu lian zawng zawngte chuan Jeremia chu vêngtu hung chhûng ata an hruai chhuak a,

¹⁴Safana fa, Ahikama fapa Gedalia hnênah, a ina hruai tûrin an hlân a; tichuan, mi dang zîngah a khawsa ve ta a.

¹⁵Vêngtu hung chhûnga Jeremia a awm lai chuan LALPA thu chu Jeremia hnênah a lo thleng a.

¹⁶“Kal la Ebedmeleka hrilh rawh, ‘Engkim LALPA, Israel-te Pathianin heti hian a ti: He khawpui ṭhatna tûr ni lovin a chhiatna tûr zâwkin ka thute ka hlen dâwn. Chutih hunah chuan, i mit hmuh ngeiah chung thil chu a lo thleng ang.

¹⁷Chumi hunah chuan, nang erawh chu ka hum ang che,’ tih hi LALPA thuchhuak a ni. I hlauhte kutah chuan pêk i ni lo vang.

¹⁸Ka chhan ang che a, khandaihah i thi lo vang a, i him zâwk ang, mi rin tlat avângin,” tih hi LALPA thuchhuak a ni.