Read Mizo Lushai Jeremia 4 Bible Online

Jeremia 4 - Mizo Lushai bible

Jeremia 4

¹ LALPA chuan heti hian a ti: “Israel-te u, lo kîr in duh chuan ka hnênah ngei in lo kîr tûr a ni. In milem tenawm takte kha ka hma ata in dah bo va, In vah bo tawh loh chuan,

²Rinawm taka in awma, dik tak leh fel faka ro in rêla, Mi nung LALPA hming in chhâl chuan, Hnamte chu mal ka sâwm ang a, Annin mi chawimawi ang.”

³Juda mite leh Jerusalem mite hnênah LALPA chuan heti hian a ti: “In lei khêkte let ula, Hlîng zîngahte chi theh suh u.

⁴Nangni Juda mite leh Jerusalem-a awmte u, LALPA tân serh tan ula, In thinlung serh tan rawh u. Chutilo chu, in thil sual tih avângin Ka thinur ang a, mei angin a alh chhuak ang a, Tu ma ṭhelh rual lohvin a alh dah ang e.”

⁵Judai ramah hril ula, Jerusalem-ah puang rawh u, Ram pumah tawtawrâwt hâm ula, lo tlân khâwm rawh u; ‘Kulh nei khawpuiahte i tlân lût ang u,’ tiin Ring takin au rawh u.

⁶Zion kâwkin chhinchhiahna târ rawh u, Himna zawngin tlân ula, muang suh u, Hmâr lam aṭangin thil ṭha lo ka rawn thlen dâwn, Chhiatna râpthlâk tak chu.

⁷A tawmbûk aṭangin sakeibaknei a lo chhuak e, Hnamte tichhetu chu a lo lang ta. I ram tichhe tûrin a bûk a rawn chhuahsan, I khawpuite luah tlâk lohvin a tichhe dâwn.

⁸Chuvângin, saiip puan sin ula, Lungchhe takin ṭap vak vak rawh u, LALPA thinur nasa tak chuan min kiansan si lo va.

⁹“Chumi ni-ah chuan heti hi a ni ang a, Lal leh hotute thinlung chu a zâm ang a, Puithiamte an buai hle ang a, Zâwlneite pawh an mangang hle ang,” LALPA thuchhuak chuan a ti.

¹⁰Kei chuan, “E heu! LALPA PATHIAN, he mite leh Jerusalem mite hi i bum let dêr a lo nih hi, ‘Muanna a awm ang,’ i ti a, Khandaih an hmachhawn tâk hi,” ka ti a.

¹¹Chumi hunah chuan he mite leh Jerusalem-a mite hi heti hian hrilh rawh: “Thlalêr tlâng kawlh vel vul aṭangin thli lum ka mite lamah a lo tleh ang a, a si chhêm lênga chhêm faitu mai ni lovin,

¹²thli na tak, ka thu pêkin a lo tleh dâwn; tûnah, kei pawhin an chungthu ka rêl dâwn,” tiin.

¹³En teh, chhûmpui angin hmêlmate an lo thawk e, An tawlailîrte chu thlipui ang, an sakawrte pawh mupui aiin an chak, Kan chung a va pik êm! Kan râlthûm a nih hi.

¹⁴Aw Jerusalem, i thinlung sual sil fai la, Chhan chhuah i ni dâwn nia, Eng chen nge thil sual i ngaihtuah dâwn le?

¹⁵Dan ram aṭangin thu a lo thang vêl, Chhiatna thleng tûr Efraim tlângram aṭangin an puang e,

¹⁶Hnamte hrilh ula, Jerusalem-ah puang rawh u, Ram hla tak ata hualtute an lo kal, Judai ram khawpuite beih tumin an au ve.

¹⁷Lo vêngtute ang maiin a vêlin an hual, “Ka laka an hel vâng a ni,” LALPA thuchhuak chuan a ti.

¹⁸I awm dân leh i thil tihten hêng hi i chungah a tithleng ta, I sual vang a ni, a na ngei mai. I thinhnûn a chhun ta a nih hi.

¹⁹A va na êm, a va na êm, a va na tak êm! Aw ka rilru a va na êm, ka thin a phu zawih zawih, Ka awm hle hle thei lo. Tawtawrâwt ri te, indo thâwm te ka hre ta si a.

²⁰Chhiatna a lo thleng zut zut a, Ram pum a chhe zo ta, Kan puan inte kârlovah a chhia a, Kan puanzârte a thlêr zo ta.

²¹Eng chen nge indo lai ka hmuh anga, Tawtawrâwt ri ka hriat ang?

²²Ka mite zawng an â êm a, min hre lo a ni, Naupang â ang maiin Thil sual tih zawng an thiam hle, Thil ṭha tih an thiam si lo.

²³Leilung ka han en vêl a, ngai teh, Eng mah a awm lo va, a ruak huai mai a ni, Vân lamah pawh êng rêng a awm lo.

²⁴Tlângte ka han en chuan, ngai teh, a nghîng dur dur a, Mual tinrêng pawh a insâwi hlawk hlawk.

²⁵Ka han hawi vêl chuan mihring rêng an awm lo va, Chunglêng sava zawng pawh an thlâwk bo zo ta.

²⁶Ka han hawi vêl a, ram ṭha tak chu thlalêr a chang zo ta, Khawpui zawng zawng pawh a chhe zo ta, LALPA thinurna nasa tak hmaah chuan.

²⁷(LALPA chuan heti hian a ti: “Ram pum a chhe nasa hle ang a; Mahse, ka tichhe vek lo vang.”)

²⁸Chumi avâng chuan lei hi a ngui ruai ang a, Chung lam vânte pawh a thim vek ang. Thu ka sawi tawh a, ka sût lo vang. Ka tiam tawh a, ka hlen ngei ang.

²⁹Sakawr chungchuang mite leh thal kengtute thâwmah Khawpuia mi zawng zawng an tlânchhia a, Ṭhenkhat ngawah an tlân lût a, A ṭhen lung hmunahte an lâwn a, Khawpui zawng zawng a ram zo va, Luahtu rêng an awm ta lo.

³⁰Nang, tihchhiata awm tawh hnu, Engtizia nge puan senlâr sina rangkachaka incheiin I mitte i hnawih dûr? I inchei thlâwn mai a ni, I ngaihzâwngten an hmusit che a, thah an tum che asin.

³¹Zion fanu thaw huam huam ri chu ka hria, Hmeichhe nau vei rûm thâwm, Fa tîr vei ṭê vawng vawng thâwm chu, A bân a phar a, “Ka chung a va pik êm! Tualthattuten min nang ta a nih hi,” a ti.