Read Mizo Lushai Jeremia 40 Bible Online

Jeremia 40 - Mizo Lushai bible

Jeremia 40

¹Lal vêngtu hotu Nebuzaradana chuan Rama khua aṭanga Jeremia a chhuahtîr hnuin a hnênah LALPA thu a lo thleng a. Jeremia chu Judai ram leh Jerusalem aṭanga sal man, khaidiat bun chunga Babulon lama an hruai chhohte zîngah a tel ve a ni.

²Lal vêngtu hotu chuan Jeremia chu a hruai hrang a, a hnênah, “LALPA, i Pathian chuan he hmuna chhiatna lo thleng tûr hi a lo puang tawh a.

³Tûnah, a sawi ang ngeiin a thlentîr ta a nih hi. LALPA chungah thil in tisual a, a thu in awih loh avângin hêng hi a lo thleng ta a nih hi.

⁴Mahse, nang zawng, vawiin aṭangin i khaidiat bun hi ka phelhsak a che. I duh chuan ka hnênah Babulon-ah kal la, ka enkawl ang che. I duh loh leh lo kal lo mai la, i duh duhnaah i kal thei e,” a ti a.

⁵Jeremian a chhân hmain “Babulon lalin Juda khuate awp tûra a ruat, Safana fa, Ahikama fapa Gedalia hnênah kîr leh la, a hnênah awm ang che, a nih leh i duh duhnaah i kal dâwn nia,” a ti leh a. Tichuan, lal vêngtu hotu chuan ei tûr leh thilpêk a pe a, a kaltîr ta a.

⁶Jeremia chu Ahikama fa Gedalia hnênah Mizpa khuaah a kal a, an rama la châmbângte zîngah a awm ve ta a.

⁷Sipai hotute leh mi dang, ramhnuaia awm zawng zawng chuan Babulon lalin Ahikama fapa Gedalia chu ram awptu, ram chhûnga mi retheite leh hmeichhia te, naupang te, Babulon-a sala hruai ve loh te enkawltu atân a ruat tih an lo hria a.

⁸Mizpa khuaah Gedalia hmu tûrin hêng mi, Nethania fapa Ismaela te, Korea fapa Johanana te, Tanhumeta fapa Seraia te, Netofa mi Efaia fapa, Makath mi Jezania leh mi dang te an lo kal a.

⁹Safana fa Ahikama fapa Gedalia chuan an hnênah leh a mite hnênah chuan, “Kaldai-ho rawngbâwl chu hlau reng reng suh u, ram hi luah ula, Babulon lal rawng hi bâwl ula, in tân a ṭha ang.

¹⁰Kei pawh in aiawha Babulon mite hmaa ding tûrin Mizpa khuaah ka awm ang a, nangnin uain te, nipui thei te, hriak te la khâwm ula, in bêlahte khung ṭha ang che u; in khaw luahahte chuan chêng reng ang che u,” tiin an hnênah thu a chah a.

¹¹Chutiang bawkin, Moab rama Juda awm zawng zawng te, Edom rama awmte leh ram danga Juda awm zawng zawngte chuan Babulon lalin mi tlêm tê Judai rama a hnutchhiah thu leh Safana fa, Ahikama fapa Gedalia chu chûngho awptu atân a ruat tih an lo hria a.

¹²Tichuan, an darhna ram hrang hrang ata Juda-te chu Judai ramah an lo kîr a, Mizpa khuaa awm Gedalia hnênah an lo thleng a, uain leh nipui thei tam tak an kensak a.

¹³Korea fapa Johanana leh sipai hotu ramhnuaia la awmte pawh chu Mizpa khuaa Gedalia hnênah an lo kal a.

¹⁴A hnênah, “Amon mite lal Baalisa chuan Nethania fapa Ismaela chu nangmah that tûrin a tîr tih i hre na nge?” an ti a. Ahikama fapa Gedalia erawh chuan a ring lo va.

¹⁵Korea fapa Johanana chuan a rûk têin Mizpa khuaa awm Gedalia hnênah chuan “Nethania fapa Ismaela that tûr chuan min kaltîr mai teh, eng vângin nge i nunna a lâk ang? Nangmah bêla Juda mi awm zawng zawng leh Judai rama la châmbângte chu an darhin an boral vek dâwn asin,” a ti a.

¹⁶Ahikama fapa Gedalia erawh chuan Korea fapa Johanana hnênah chuan, “Chu thil chu ti suh, Ismaela chungchâng i sawi hi dâwt a ni,” a tihsan a.