Read Mizo Lushai Jeremia 41 Bible Online

Jeremia 41 - Mizo Lushai bible

Jeremia 41

¹Thla sarihnaah chuan Elisama fa, Nethania fapa Ismaela, lal chi, lal khâwnbâwl zînga mi chu mi sâwm hruaiin Mizpa khuaah Ahikama fapa Gedalia hnênah a lo kal a, Mizpa khuaah chuan chaw an ei ho va.

²Nethania fapa Ismaela chu a mi hruai sâwmte nên chuan an tho thut a, Safana fapa Ahikama fa Gedalia, Babulon lalin ramawptua a dah chu, khandaihin an that a.

³Ismaela chuan Mizpa khuaa Gedalia hnêna Juda awm zawng zawng leh Babulon sipai, chumi hmuna awmte chu a that bawk a.

⁴Gedalia an thah tûkah, tu mahin an hriat hmain,

⁵Sekem aṭang te, Silo aṭang te, Samaria aṭang tein mi sawmriat an lo thleng a. An khabehmul an mêt a, an kawrte an tiṭet a, an inzai kak a, LALPA ina chhang leh rimtui hlân tûra lo kal an ni.

⁶Nethania fapa Ismaela chu Mizpa aṭangin anmahni lo hmuak tûrin a chhuak a, kawng tluanin a ṭap a. Anni chu a han hmuh chuan an hnênah, “Ahikama fapa Gedalia hnênah lo kal rawh u,” a ti a.

⁷Khawpui chhûng an lo luh chuan Nethania fapa Ismaela leh a ṭhuihruaite chuan an lo that a, khuarkhurumah an paih a.

⁸Chûng zînga mi sâwmte erawh chuan Ismaela hnênah, “Min that suh, buh te, barli te, hriak te, khawizu te lovah kan thukru ṭeuh a nia,” an ti a. Tichuan, anni chu a zuah a, an ṭhiante zîngah chuan an that ve ta lo va.

⁹Ismaelan a mi thahte ruang a paihna khuarkhurum chu lal Asa-an Israel lal Baasa laka invên nâna a laih a ni. Nethania fapa Ismaela chuan Gedalia leh a hote a thah ruangin a tikhat tlat a.

¹⁰Ismaela chuan Mizpah-a mi la awm zawng zawng, lal fanu te, lal vêngtu hotu Nebuzaradanan Gedalia enkawl tûra Mizpa khuaa a dah zawng zawngte chu salah a man a, Nethania fapa Ismaela chuan Amon ramah a hruai ta a.

¹¹Korea fapa Johanana leh sipai hotu, a hnêna awm zawng zawngte chuan Nethania fapa Ismaelan thil sual a tihte chu an hria a.

¹²Nethania fapa Ismaela bei tûrin an mite an khâwm a, an kal ta a. Gibeon khaw kianga dîl lian tak bulah chuan an va ûmphâk a.

¹³Ismaela hnêna mipui awm zawng zawngte chuan Korea fapa Johanana leh a hnêna sipai hotu awm zawng zawng chu an hmuhin an lâwm ta êm êm a.

¹⁴Ismaelan Mizpa aṭanga sala a hruai zawng zawng chu an lo kîr a, Korea fapa Johanana hnênah an pakai ta vek a.

¹⁵Nethania fapa Ismaela leh a hote pariat chu Johanana lak aṭangin an him hrâm a, Amon mite hnênah an tlânchhia a.

¹⁶Korea fapa Johanana leh a hnêna sipai hotu awmte chuan Nethania fapa Ismaelan Ahikama fapa Gedalia a thah hnua Mizpa aṭanga sala a man zawng zawng indo mi te, hmeichhia te, naupang te, mi tilreh te chu Gibeon aṭangin an hruai haw ta vek a.

¹⁷Tichuan, Aigupta rama kal tumin an kal zêl a, Bethlehem kiang Gerut chhim lam hmunah chuan an châwl a.

¹⁸Babulon lalin ram awptu atâna a dah Ahikama fapa Gedalia chu Nethania fapa Ismaelan a thah avângin Kaldai-ho chu an hlau hle a ni.