Read Mizo Lushai Jeremia 42 Bible Online

Jeremia 42 - Mizo Lushai bible

Jeremia 42

¹Korea fapa Johanana te, Hosaia fapa Jezania te, sipai hotu zawng zawng leh mipui, a tê ber aṭanga a lian ber thlengin an lo kal a,

²Zâwlnei Jeremia hnênah chuan, “Kan dîl hi min ngaihthlâksak la, LALPA kan Pathian hnênah mi la dam zawng zawng tân ṭawngṭai rawh. Min hmuh ang hian tam tak ni ṭhîn kha, tlêm tê chauh hnutchhiah kan ni ta si a.

³LALPA, i Pathianin kan kawng zawh tûr te, kan tih tûr te min kawhhmuh rawh se,” an ti a.

⁴Zâwlnei Jeremia chuan anni chu a chhâng a, “In thu chu ka hria e, tûnah, LALPA, in Pathian hnênah in ngen angin ka dîlsak ang che u, LALPA chuan in hnêna a sawi apiang ka hrilh ang che u a, in lakah eng mah ka zêp lo vang,” a ti a.

⁵Anni chuan Jeremia hnênah, “LALPA i Pathianin kan tâna thu a hrilh che anga kan tih loh chuan LALPA chu kan lakah hretu rinawm leh dik tak ni rawh se.

⁶Kan tirhna che LALPA thu chu a chhia a ṭha kan zâwm ang. LALPA, kan Pathian thu kan awih zêl chuan kan tân a ṭha dâwn si a,” an ti a.

⁷Ni sâwm hnuah Jeremia hnênah LALPA thu a lo thleng a.

⁸Korea fapa Johanana leh a hnêna sipai hotu awm zawng zawng te, mipui, a tê ber aṭanga a lian ber thlengin a ko khâwm a.

⁹An hnênah, “LALPA, Israel-te Pathian, a hnêna ṭawngṭai tûra min tirhna khân heti hian a ti:

¹⁰‘He rama in awm reng chuan ka tungding ang che u a, ka tidarh lo vang che u. Ka phun ang che u a, ka pawt chhuak lo vang che u. In chungah thil ṭha lo ka thlentîr avângin ka rilru a na a ni.

¹¹In hlauh Babulon lal hi hlau tawh suh u, ani chu hlau suh u,’ tih hi LALPA thuchhuak a ni. Chhan tûr che u leh a kut ata chhan chhuak tûr che uin kei in hnênah ka awm si a.

¹²Ka khawngaih ang che u a, ani pawhin a khawngaih ang che u; tichuan, in ramah hian in awm reng ang.

¹³“Amaherawhchu, LALPA in Pathian thu zâwm lova, ‘He ramah hian kan awm lo vang a,

¹⁴Aigupta ramah kan kal zâwk ang; tah chuan, indo thâwm te, tawtawrâwt ri te, ṭâm te hre lovin kan awm ang,’ in tih chuan

¹⁵Juda mi la dam chhunte u, LALPA thu hi hre rawh u; Engkim LALPA, Israel-te Pathian chuan heti hian a ti: ‘Aigupta rama lûta awm in tum tlat chuan

¹⁶khandaih in hlauh ngei khân Aigupta ramah a nangchîng ang che u, in hlauh ṭhin ṭâmin Aigupta ramah a ûmzui ang che u a; tah chuan, in thi ang.

¹⁷A ni, Aigupta rama kala awm tum lui apiangte chu khandaih te, ṭâm te, hrite tuarin an thi ang. Thil ṭha lo an chunga ka thlentîr tûr lak ata tu mah himin an chhuak lo vang.’

¹⁸“Engkim LALPA, Israel-te Pathian chuan heti hian a ti: ‘Ka thinurna nasa tak Jerusalem-a ka leihbua ang khân Aigupta-a kalte chungah pawh ka leihbua ang. Ânchhia te, hmusit te, sawichhiat te leh hau te in tuar ang a, he ram hi in hmu leh tawh lo vang.’

¹⁹Juda mi la dam chhunte u, LALPA chuan a hrilh che u hi, Aigupta-ah chuan lût suh u. Vawiina ka thu hrilh che u hi ngai pawimawh teh u.

²⁰Thihpui hial khawp thil sual lian tak in ti a ni. LALPA, in Pathian hnênah min tîr a, ‘LALPA, kan Pathian hnênah min ṭawngṭaisak la, a sawi apiang kan ti ang,’ in ti a.

²¹Tûnah, in hnêna ka puan, LALPA, in Pathianin min hrilh chu in zâwm leh si lo.

²²Tûnah, hre rawh u, in awm duhna hmun ngeiah chuan khandaih te, ṭâm te, hri te tuarin in thi ang,” a ti a.