Read Mizo Lushai Jeremia 43 Bible Online

Jeremia 43 - Mizo Lushai bible

Jeremia 43

¹ LALPA an Pathianin mi tin hnêna sawi tûra a tirh ang taka LALPA, an Pathian thu chu, mi zawng zawng hnêna Jeremian a sawi hnu chuan

²Hosaia fapa Azaria leh Korea fapa Johanana leh mi chapohote chuan, “Dâwt i sawi a ni, LALPA kan Pathianin, ‘Aigupta rama awm tûrin kal suh u,’ tia sawi tûrin a tîr lo che.

³Kaldai miten min mana min thah emaw, Babulon-a sala min hruai theihna tûrin emaw Neria fapa Baruka chuan a fuihpawrh che a nih zâwk hi,” an ti a.

⁴Tichuan, Korea fapa Johanana te, sipai hotute leh mipui zawng zawng chuan, ‘Judai rama awm tûr,’ tia LALPA thupêk chu an zâwm ta lo va.

⁵Korea fapa Johanana leh sipai hotu zawng zawng chuan Juda mi la dam chhun, hnam tin zînga an hnawhdarhna ata Judai rama awm tûra lo kîrte chu an hruai a.

⁶Chûngte chu mipa te, hmeichhia te, naupang te, lal fanu te, lal vêngtu hotu Nebuzaradanan Safana fa, Ahikama fapa Gedalia hova awm tûra a hnutchhiah te, zâwlnei Jeremia te, Neria fapa Baruka te an ni.

⁷Tichuan, LALPA thu zâwm lovin Aigupta ramah chuan an lût a, Tahfanes khua an thleng ta a.

⁸Tahfanes-ah chuan LALPA thu Jeremia hnênah a lo thleng a,

⁹“Juda mite hmuh lai ngeiin lung lian pui pui la la, Tahfanes hmuna Farawa in panna kawng rem sirah hlum chawhdiakah phûm rawh.

¹⁰An hnênah heti hian ti ang che, ‘Engkim LALPA, Israel-te Pathian chuan heti hian a ti: ka chhiahhlawh Babulon lal Nebukadnezara chu ka rawn tîr ang a, hêng lung; he laia ka phûmtîr che chungahte hian a lalṭhutthlêng a hûng ang a, a puan in a kaih bawk ang.

¹¹Ani chu a lo kal ang a, Aigupta ram chu a rawn la dâwn a ni. Thi tûra an ruat chu an thi ang a, sala hruai tûra a tihte salah a hruai ang a, khandaiha thah tûr a tihte chu a that ang.

¹²Aigupta mite pathian inte chu a hâl chhe vek ang a, an pathian chu a la bo vek bawk ang. Berâmpuin a kawr ata hrik a enfai angin Aigupta ram chu a thian fai vek ang a, ngaihngam takin a hâwnsan ang.

¹³Aigupta rama ni pathian an biakna in ban lung an cheite chu a titliak ang a, Aigupta mite pathian biak inte chu a hâl chhe vek ang,” a ti a.