Read Mizo Lushai Jeremia 46 Bible Online

Jeremia 46 - Mizo Lushai bible

Jeremia 46

¹Hnam dangte chungchânga zâwlnei Jeremia hnêna LALPA thu lo thleng chu:

²Aigupta chungthu: Juda lal Josia fapa, Jehoiakima lal kum lina Babulon lal Nebukadnezaran Eufretis lui kam Karkhemis hmuna a hneh tâk, Aigupta lal Neko Farawa sipai rual chungchâng chu.

³“Phaw lian leh phaw tê peih diamin Indo tûrin kal chhuak rawh u.

⁴Sakawrte thuam ula, a chungah chuang rawh u, Thîr lukhum khumin intlar ula, Feite tât hriam ula, thîr kawr ha rawh u.

⁵Engtizia nge ni le, an zâma an tawlhkîr tâk? An mi huaisente an tlu a, Hmanhmawh takin an tlânchhe zo ta, Hnung lam hawi lêk lovin baklêngin an tlân a, Ram tinah râl a ṭi,” LALPA thuchhuak chuan a ti.

⁶“Mi ṭuanṭha an tlânchhe hman lo va, Mi chak an him hek lo. Saw hmâr Eufretis lui kamah sâwn an pai a, an tlu zo ta.

⁷Nail lui anga lo lian ta hi tu nge ni? Luipui so bulh bulh ang hi?

⁸Aigupta chu Nail lui angin a lo lian a, Luipui tui so bulh bulh ang hian, Ka lian ang a, lei chung dâpin khawpuite chu a chhûnga chêngte nên ka tichhia ang,” a ti.

⁹Sakawrte u, tâwn ru, tawlailîrte u, tlân chiam rawh u, Nangni sipai huaisen, Ethiopia mite, Put mi, phaw kengtu te, Ludia mi, thal kâp thiamte u, tâwn zêl rawh u.

¹⁰Chu ni chu, Engkim LALPA, Pathian ta a ni. Phuba lâk ni, a hmêlmate chunga phuba a lâk ni chu; Khandaih chuan duh tâwkin a ei ang a, An thisen pawh tlai khawpin a in ang. Saw hmâr Eufretis lui kamah sâwn, Engkim LALPA, Pathian chuan Inthawi nân mi tam tak a hlân ta.

¹¹Aw Aigupta fanu, nula thianghlim, Gilead-ah chho la, thinghnai damdawi han la rawh,

¹²Hnamten i mualphona an hria a, ‘Mi hrâng leh mi hrâng an insu a, an tlu dûn reng mai,’ Ti-a i ṭap thâwm chu lei pum puiah a thang.

¹³Babulon lal Nebukadnezara a lo kal a, Aigupta ram a rawn nghaisak tûr thu zâwlnei Jeremian LALPA thu a sawi chu:

¹⁴Aigupta-ah puang ula, Migdol-ah hril rawh u, Nof-ah leh Tahfanes-ah puang ula, ‘Inring ula, invêng ṭha rawh u, Kan vêla mite chu khandaihin a eizo ta,’ tiin.

¹⁵Engati nge i mi chak chu a tlûk tâk? A ding thei ta lo, LALPA nam thlûk a ni,

¹⁶An tlu khâwm a, an indelh a, tichuan, an inrâwn ta, ‘Hmêlma khandaiha kan thih loh nân kan ram, Kan chhûngte hnênah i tlân haw ang u,’ an ti.

¹⁷‘Aigupta lal Farawa hi thâwm chang lian mai, A hun ṭha a hloh ta a nih hi’ ti ang che.

¹⁸‘Kei hi mi nung ka nih hi, Lalber,’ a hming Engkim LALPA thuchhuak chuan a ti; ‘Tlâng zînga Tabor a lawr ang leh Tuipui kama Karmel tlâng a awm luah angin A lo kal dâwn e.

¹⁹Nangni Aigupta mite u, saltâng tûrin in thawmhnaw têl rawh u, Nof khua chu a ṭiau vang a, a chhe vek ang. Luahtu rêng an awm lo vang.

²⁰Aigupta chu bâwngla nalh tak ang a ni, Mahse, hmâr lam ata tlip lo thlâwkin a rawn bâwm ang.

²¹An sipai rawihte pawh bâwng châwm thau ang an ni, A ni, an hnungtawlh a, an tlânchhia; ding lovin. An chhiatna ni chuan a rawn nang ta, hrem an tuarna ni chu.

²²An tlânchhe thâwm chu rûlpui tlânchhe ri ang a ni, An hmêlmate an lo hnai zêl, thingkittu angin Hreipui nên an lo thawk e.

²³A ngawpui chu an rawn ṭhiat ang, Kal tlang theih loh khawpa pik chu,’ LALPA thuchhuak chuan a ti. ‘Anni chu khau puang aiin an tam zâwk, Chhiar sên rual an ni lo.

²⁴Aigupta mite chu an mualpho ta, Hmâr lam mite kutah pêk an ni tawh si a.’

²⁵Engkim LALPA, Israel-te Pathian chuan heti hian a ti: “Ngai teh u, Thebes khaw pathian Amon te, Farawa te, Aigupta leh a pathian te, an lalte leh Farawa rinchhantu zawng zawngte chu ka hrem dâwn.

²⁶Anmahni thah tumtu Babulon lal Nebukadnezara leh a ṭhuihruaite kutah ka pe ang. Chumi hunah chuan Aigupta ramah, hmânlai ang khân an awm leh ang,” LALPA thuchhuak chuan a ti.

²⁷ “Ka chhiahhlawh Jakob, nang zawngin hlau suh, Aw Israel, zâm hek suh, Ram hla tak ata ka chhan chhuak ang che a, I thlahte pawh an saltânna ata ka hruai chhuak ang, Jakoba chu a lo hâwng ang a, Him tak leh thlamuang takin a awm ang; Tu man an tithlabâr tawh lo vang.

²⁸Aw Jakob, ka chhiahhlawh, hlau suh, I hnênah ka awm hi,” LALPA thuchhuak chuan a ti. Ka hnawhchhuahna che hnam zawng zawng ka tiboral ang a, Nangni zawng ka tiboral vek lo vang che u, Dik takin ka hrem ang che u, Hrem loh erawh chuan ka chhuah lo vang che u.