Read Mizo Lushai Jeremia 47 Bible Online

Jeremia 47 - Mizo Lushai bible

Jeremia 47

¹Faraw-an Gaza a beih hmaa Filistia mite chungchânga zâwlnei Jeremia hnêna LALPA thu lo thleng chu.

² LALPA chuan heti hian a ti: Ngai teh, hmâr lam aṭangin tui a lo lian a, A kuang a khat ang a, a luang liam ang a, Ram pum a chîm vek ang. Mangangin mi an au vang a, ram chhûnga mi tin an rûm ang.

³A sakawr per ri ṭuk ṭukah te, a tawlailîr tlan ri dur durahte leh A ke inkhak bur bur thâwmahte chuan Pate kut a zawi zo vang a, an fate pawh an ngaihsak thei lo vang.

⁴Ni chu a lo thleng ta, Filistia mi zawng zawng chhiatna ni chu, Tura leh Sidon ata ṭanpuitu an awm ta lo; Tuipuia thliarkâr, Kapthora Filistia mi la dam chhunte chu, LALPA chuan a tiboral dâwn si a.

⁵Gaza tân lu ziah kawlh a hun ta, Askelon a chhe zo va, Phaizâwla la dam chhunte u, eng chen nge in sûn dâwn le?

⁶Aw LALPA khandaih, eng hunah nge i chawlh dâwn? I paiah inkhung la, châwl la, awm hle hle rawh.

⁷ LALPAN tih tûr a tuk si chuan, Engtin nge a chawlh theih ang? Askelon leh tuipui kama chêngte bei tûrin thu a pe miau si a.