Read Mizo Lushai Jeremia 48 Bible Online

Jeremia 48 - Mizo Lushai bible

Jeremia 48

¹Moab chungthu: Engkim LALPA, Israel-te Pathian chuan heti hian a ti: Nebo chung a pik e, a chhe zo ta si a, Kiriathaim chu a mualpho va, an hneh ta si a, kulhte a chhe rem rum a, a luahtute an mualpho zo ta.

²Moab hmingthanna a nêp ta, Babulon-ah a chhiatna tûr an rêl. “Hawh u, hnama chhiar tlâk loh khawpin i siam ang u,” an ti. Nangni Madmen khaw mite u, in reh ṭhiap ang, Khandaihin a ûmzui ang che u.

³Horonaim aṭanga au thâwm, Chhiatna nasa tak thâwm chu ngaithla rawh u.

⁴Moab a chhia a, a fate an ṭap chuah chuah mai.

⁵Luhit-ah ṭap chungin an chho va, Horonaim chhukah mangang au thâwm an hria.

⁶In him theih nân tlânchhe rawh u, Thlalêra ram sabengtung ang maia chakin.

⁷In kutkawih, in sum leh pai in rinchhan avângin, Nangni pawh an man ang che u; Khemosa chu a puithiamte leh a hotute nên Sala hruai an ni ang.

⁸Khawpui tinah tichhetu a lo thleng ang a, Khaw khat mahin an pumpelh lo vang. Phaizâwl chu a chhia ang a, Hmun zâwl zaute pawh a chhe vek ang, LALPA sawi tawh ang khân.

⁹A thlawh bo nân Moab chu thla pe ula, A khawpuite a chhe vek ang a, Tu mah an chêng tawh lo vang.

¹⁰Dâwngdah taka LALPA hna thawk chu ânchhe dawngin awm rawh se; Thisen chhuah nâna khandaih hmang duh lo chu ânchhe dawngin awm rawh e.

¹¹Moab chu a tleirâwl lai ata Nuamsa takin a awm ṭhîn a. Uain bun chhuah loh, a mawng nawi nêna inchiah, Bun chhuah ngai loh angin a awm a, Sala hruai a ni ngai lo. A thlum dân a pangngai reng a, A rim a chhe chuang lo.

¹²Chuvângin, ni chu a lo thleng ta, Tih hi LALPA thuchhuak a ni. A hnênah bun chhuaktu ka tîr ang a, A bêl ata a bun chhuak ang. A bêl chu a bun ruak ang a, a tikeh sawm vek ang.

¹³Israel chhûngten an innghahna Bethel an zahpui angin, Moab pawhin Khemosa an zahpui ang.

¹⁴‘Pasalṭha, râl laka huaisen kan nei,’ Engtin nge in tih theih le?

¹⁵Moab tichhetute chu, khawpuiah an chho va, An tlangvâl chhuanvâwrte thah tûrin an hruai chhuak ang. Tih hi, a hming Engkim LALPA thuchhuak a ni.

¹⁶Moab chhiatna tûr chu a lo thleng ṭêp, A tuar tûr chuan a rawn hnaih ta.

¹⁷A chhehvêla awm zawng zawngten ani chu ṭah rawh se, A hming hretu zawng zawngten, ‘Engtizia nge, tiang khauh leh tiang mawi chu a tliah tâk mai le!’ ti rawh se.

¹⁸Aw nangni, Dibon mite u, in khaw ropui tak ata lo chhuak ula, Ram rovah hian ṭhu rawh u. Bei tûr chein Moab tichhetu a lo thleng ta. I kulhte pawh a tichhe vek ang.

¹⁹Aroer mite u, kawngahte ding ula, Paho tlânchhia leh nuho relhrute chu lo châng ula, ‘Engtizia nge ni ta?’ lo ti rawh u.

²⁰Moab chu a mualpho va, a chhe zo ta, Lungchhe takin ṭap chiam rawh u. Arnon luiah, ‘Moab a chhe ta,’ tiin puang r’u.

²¹Tlâng chung zâwla khawpui, Holon te, Jahza te, Mefaat te,

²²Dibon te, Nebo te, Beth-diblataim te,

²³Kiriathaim te, Beth-gamul te, Beth-meon te,

²⁴Keriot te, Bozra te, Moab rama khua zawng zawng, kilkhâwr taka awm chenin an chungthu rêl a ni ta.

²⁵Moab ki chu râwtchhum a ni a, a bân pawh tihtliah a ni ta, tih hi LALPA thuchhuak a ni.

²⁶Moab chu hrai rui rawh, LALPA aia lian zâwkah a inngai a, mahse, Moab chu ama luakah a tâl ang a, nuihzatbûr a ni ang.

²⁷Israel chu i nuihzat ṭhîn a ni lâwm ni? Rûkru zînga tel em a niha, a chungchâng i sawi apianga i lu i thin ṭhin le?

²⁸Moab-a chêngte u, khawpui chhuahsan ula, Lungpui kârah tawm rawh u. Pûk kawngka sîra bu chhep ṭhîn ṭhuro angin awm rawh u.

²⁹Moab chapozia kan hria, chapo tak an ni, An induhzia te, mahni thu an duhzia te, An chaltlaizia te, an intihveizia te, An inlulinzia te ka hria, LALPA thuchhuak chuan a ti.

³⁰Mahse, eng mah a sâwt lo, A uang thlâwn mai a ni.

³¹Chuvângin, Moab ka tuarpui ang, Moab mi zawng zawng tân ka ṭap ang. Kir-heres mite pawh ka sûn bawk ang.

³²Aw Sibmah grep kûng, Jazer mite ṭap aia nasain ka ṭah ang che, I zârte chuan tuipui a thleng a, Jezer a thlen hial ṭhin kha. Ei chhetuin i thei leh grep rahte a ei chhe ta.

³³Moab ram ṭha tak aṭangin Hlimna leh lâwmna a reh zo ta, Uain sâwr tûr ka titâwp a, Tu man hlim takin an sâwr tawh lo vang. An au thâwm pawh hlim thâwm a ni tawh lo vang.

³⁴Hesbon leh Elealeh-a an au thâwm chu Jahaz aṭangin a hriat a, Zoar mite pawhin an lo hria a, Horonaim leh Eglath-selisia thlengin an hre phâk. Nimrim tuikhurte pawh a kang zo ta.

³⁵‘Moab rama an hmunsâng te, an pathian hnêna rimtui an hâl ṭhinnate chu ka tichhe vek ang,’ tih hi LALPA thuchhuak a ni.

³⁶‘Lusûnte tâna phênglâwng tum rîk angin Moab avângin ka lungngai a, Kir-heres mite tân pawh ka ngui zo ta. An sum leh pai chhêkkhâwl a ral zo ta si a.

³⁷An lu an mêt kawlh vek a, an khabehmul pawh an ziat kawlh vek a ni. An kutte an zai a, saiip puan an veng ṭheuh.

³⁸Moab-ho in chung zâwl zawng zawngah leh an khawlaiahte chuan an ṭap chuah chuah a, bêl chhe paih angin Moab chu a keh sawm ta,’ tih hi LALPA thuchhuak a ni.

³⁹A va han chhe hneh êm! An ṭap tlawk tlawk mai. Moab chu a mualpho va, Moab chu miten an nuihzat a, a vêla mi zawng zawngin râpthlâk an ti.

⁴⁰ LALPA chuan heti hian a ti: “Ngai teh, mupui angin a lo thlâwk ang, Moab chungah a lo bir ang.

⁴¹Keriot chu lâk a ni a, a kulhte pawh lâk vek a ni, Chumi ni-ah chuan Moab Pasalṭhate an zâm ang a, Hmeichhe nau vei thlaphâng ang mai an ni ang.

⁴²Moab a boral ta, hnama chhiar tlâk a ni ta lo, LALPA lakah a inluling êm a ni.

⁴³Hlauhawm te, khuarkhurum te, thang te chuan A châng reng che u a ni, Moab mite u,” Tih hi LALPA thuchhuak a ni.

⁴⁴“Hlauhawm tlânsantu chu khuarkhurumah a tla ang a, Khuarkhurum ata chhuak chu thangah a âwk ang. Moab ka hrem hun chu ka thlentîr dâwn,” Tih hi LALPA thuchhuak a ni.

⁴⁵“Hesbon phênah râltlânho chau takin an ding. Mahse, Hesbon aṭangin mei a lo chhuak a, Lal Sihona in aṭangin meipui a chhuak. Moab mite baksam a kâng a, Indo chak mite chhîpsam chu.

⁴⁶Moab mite u, in va khawngaihthlâk tak êm, Khemosa mite an ral zo ta, I fapate salah an hruai a, I fanute an man zo ta.

⁴⁷Ni hnuhnûngahte erawh chuan Moab dinhmun ka siam ṭha leh ang,” Tih hi LALPA thuchhuak a ni. Hei zawng hi Moab hremna tûr thu chu a ni.