Read Mizo Lushai Jeremia 49 Bible Online

Jeremia 49 - Mizo Lushai bible

Jeremia 49

¹ LALPA chuan Amon mite chungchâng heti hian a sawi: “Israelan fate a nei lo vem ni? Rokhâwmtu a nei na nge? Engati nge Gad-ho ram chu Milkoman a luaha, a mite pawh an khawpuiah an chên tâk le?

²Chuvângin, ngai teh, nite a lo thleng e,” Tih hi LALPA thuchhuak a ni. “Indo thâwm ri ka hriattîr ang, Amon mite khua Raba an bei thâwm chu! Bawlhhlawh vawm khâwm mai an ni ang a, A chhehvêl khuate pawh meiin a kâng ang. Israel-te chuan anmahni hnawt chhuaktute chu an hnawt chhuak ve thung ang,” Tih hi LALPA thuchhuak a ni.

³Aw Hesbon, chiau vak vak rawh, Ai khua chu a chhe zo ta si a. Raba mite u, ṭap chiam ula, saiip puan sin rawh u, Hung chhûngah chuan tlân kual rawh u, Milkoma chu a puithiamte leh a miliante nên Salah an hruai dâwn si a.

⁴Fa rinawm lote u, engtizia nge in phai ram ṭha in chhuan le? In sum leh paia innghatin, ‘Tu nge mi bei ang?’ i ti maw?

⁵Ngai teh, kil tin aṭangin I chungah hlauhawm ka rawn thlentîr dâwn, Tih hi Engkim LALPA thuchhuak a ni. Mi tin an tlân darh chum chum ang a, Tu man tlândarhte chu an ko khâwm lo vang.

⁶Chûng hnuah chuan Amon mite chu ka tungding leh ang, Tih hi LALPA thuchhuak a ni.

⁷Edom chungchâng: Engkim LALPA thu chu hei hi a ni: Teman-ah finna a awm ta na nge? In zîngah remhria an awm ta lo vem ni? An finna a bo zo ta em ni?

⁸Dedan mite u, lêt ula, tlânchhe rawh u, Khuarkhurumahte biru rawh u. Esauva chungah chhiatna ka thlentîr dâwn, Anmahni ka hrem hun a thleng ta si a.

⁹Grep rah sengtu i rawihte chuan A rah tlêm tal an zuah ṭhîn a. Zâna rûkrute pawhin An duhzâwng chauh an la ṭhîn a ni lâwm ni?

¹⁰Esauva erawh chu a neih zawng zawng ka lâksak ang a, A thil thuhrûkna hmun chu ka haihawng vek ang, Tichuan, a thukru thei tawh lo vang a, A fa te, a laichîn te, a ṭhenawm te nên an boral ang a, Tu mah ka zuah lo vang.

¹¹In zînga fahrah awmte chu ka hnênah hnutchhiah rawh u, Keiman ka enkawl ang. In hmeithaite pawhin mi ring rawh se.

¹² LALPA chuan heti hian a ti: “In lo tûrte pawhin no chu an in si chuan, Nang hi hrem lohvin i chhuak ang maw? Hrem lohvin i chhuak hauh lo vang. I in ngei tûr a ni.

¹³Keimah ngeiin thu ka tiam ta,” Tih hi LALPA thuchhuak a ni. Bozra chu mite hlauh, mak tih huai huai, Sawichhiat leh ânchhe dawng a ni ang, An khua zawng zawng pawh a ram hlen hlauh vang.

¹⁴ LALPA hnên ata thu ka dawng a, ‘Pung khâwm ula, anni chu bei tûrin lo kal ula, Indo tûrin lo thawk rawh u,’ tiin. Hnamte hnênah palai an tîr a.

¹⁵Ngai teh, mite hmuhsit atân, Hnamte zîngah ka titê ta che a ni.

¹⁶I vaupûm leh i chapona chuan a bum ta che a ni, Nang, lungpui keh kâra awm ṭhîn, Tlângchhîp sânga awmhmun khuar, Mupui angin sâng takah bu chhep mah la, Chuta ṭang chuan ka hnûk thla ang che, Tih hi LALPA thuchhuak a ni.

¹⁷Edom chan chu miten râpthlâk an ti ang a, mi veivâk apiangin an hlau vang, a chhiat nasat êm avângin an chek tlawk tlawk ang.

¹⁸Sodom leh Gomora leh a kianga khaw tihchhiatte ang khân, ‘Tu mah an chêng tawh lo vang a, tu man an luah tawh hek lo vang,’ LALPA chuan a ti.

¹⁹Ngai teh, Jordan ngawa sakeibakneiin phûla berâm tla a ṭhâwng thut angin vawilehkhatah anni chu an ram ata ka ûm chhuak ang a; tichuan, an chungah thu nei tûr ka duh duh ka dah ang. Kei ang hi tu nge awma, tu nge mi cho ngam le? Mi khing ngam berâmpu tu nge awm ang?

²⁰Chutichuan, LALPA thiltum, Edom chunga tih a tum leh Teman mite chunga hlen a tum hi ngaithla rawh u: ran notête chu a hnûk bo vang a, an tlatna hmunte chu a ṭiau vek ang.

²¹An tlu thâwmah lei a nghîng ang a, an ṭap thâwm pawh Tuipui Sen thlengin an hria ang.

²²En teh u, Bozra chungah a thlâwk a, mupui angin a lo bir dâwn. Chumi ni chuan Edom mi huaisente thinlung chu hmeichhe nau vei angin a zâm ang.

²³Damaska chungchâng: Hamat leh Arpat an mualpho ta, Chanchin lâwmawm lo an hria a, an zâm zo ta. Tuipui fâwn awm hle hle thei lo ang hian an buai zo ta si a.

²⁴Damaska a chau va, tlânchhiat tumin a lehhawi, Buainain a nangchîng a, lungngaihnain a tlâkbuak ta, Hmeichhe nau vei na tuar ang mai a ni.

²⁵Khawpui hmingthang, Mi tilâwmtu chu a chhe zo ta.

²⁶Chuta tlangvâlte chu kawtthlêrah an tlu ang a, Chumi ni chuan sipaite pawh an boral vek ang, Tih hi Engkim LALPA thuchhuak a ni.

²⁷Damaska kulh bang ka hâl ang a, An lal Ben-hadada inte a kâng vek ang.

²⁸Kedar leh Hazor ram, Babulon lal Nebukadnezaran a rûn thu: LALPA chuan heti hian a ti: “Tho la, Kedar mite bei la, Khawchhak mite tiboral vek rawh.

²⁹An puan in te, an ran rual te lâksak la, An puanzâr te, an bungrua te, An sanghâwngsei te nên la bo vek rawh. ‘Kil tinah râl a ṭi,’ tiin mite chu an au vang.

³⁰Hazor mite u, tlân sawk sawk ula, pûkahte tawm rawh u,” Tih hi LALPA thuchhuak a ni. “Babulon lal Nebukadnezaran a phiar che u a, Tihchhiat che u a tum a ni.

³¹Tho ula, râlmuang tak leh him taka awm ṭhîn, kulh kawngkhâr leh a kalhna pawh nei lo, Awm hle hle ṭhîn hnamte chu Bei rawh u,” LALPA thuchhuak chuan a ti.

³²“An sanghâwngseite râlin an man ang a, An ranrual pawh an kawisak ang a, Lumêthote chu kil tinah ka tidarh ang. Kil tin aṭangin an chhiatna tûr ka thlentîr dâwn,” Tih hi LALPA thuchhuak a ni.

³³Hazor chu sihalte tualchaina hmun a ni ang a, A ram kumkhua ang. Tah chuan tu mah an chêng tawh lo vang a, Tu mah an awm leh tawh lo vang.

³⁴Judai rama Zedekia a lal ṭan tirha Elam chungchânga LALPA thu, zâwlnei Jeremia hnêna lo thleng chu.

³⁵Engkim LALPA chuan heti hian a ti: “Ngai teh, Elam thalngul, an chakna thahrui ngei chu, ka titliak dâwn.

³⁶Kâwlkil li ata thli pali, Elam bei tûrin ka rawn tîr ang. Kil tinah ka tidarh ang a, Elam mi darhte chu an kal lohna ram rêng a awm lo vang.

³⁷An hmêlma, anmahni thah tumtute hmaah chuan Elam mite chu ka tizâm ang a, thinur takin an chungah thil ṭha lo ka thlentîr ang,” LALPA thuchhuak chuan a ti. “Ka tihral vek hma chu khandaihin ka ûm zêl ang.

³⁸An lalte leh hotute ka tiboral ang a, Elam-ah chuan ka lalṭhutthlêng ka hûng ang,” tih hi LALPA thuchhuak a ni.

³⁹“Mahse, ni hnuhnûngahte chuan Elam chu ka din thar leh ang a, ka siam ṭha leh ang,” tih hi LALPA thuchhuak a ni.