Read Mizo Lushai Jeremia 5 Bible Online

Jeremia 5 - Mizo Lushai bible

Jeremia 5

¹Jerusalem kawtthlêrah tlân vêl ula, Hawi vêlin ngaihven rawh u; A tual zâwl zawng zawngte pawh zawng ula, Mi pakhat tal dik taka tia, Thu dik zawng rêng in hmuh chuan He khawpui hi ka ngaidam ang.

² LALPA, mi nung hming chu chhâl mah se, Dâwt an sawi a.

³Aw LALPA, thu dik chu i zawng a ni lâwm ni? Anni chu i vua a, an pawisa chuang si lo, Anni chu i chîl a, i thununna chu an zâwm duh chuang lo, An hmêl chu lung aiin a chang zâwk a, An sim duh hlawl lo.

⁴Tin, keiin, “Hêngho hi an â êm a, an rethei hle bawk a, LALPA kawng pawh an hre lo va ni, An Pathian remruat an hre hek lo.

⁵Miliante hnênah ka kal ang a, ka va bia ang, Anni chuan LALPA dân leh an Pathian remruat, An hriat ngei kha,” ka ti a. Nimahsela, anni pawh chu an inthurual a, An Pathian thu chu an hnâwl a, A phuarna hruite an tichat a.

⁶Chuvângin, ngawa sakeibakneiin anni chu a seh ang a, Thlalêr chinghniain a ei zo vang. Khawpuia mite chu keitein a châng ang a, A vâkchhuak apiang a lo pawt sawm ang.

⁷“An bawhchhe nasa a, an hnungtawlh thui êm avângin, Engtin nge ka ngaihdam theih ang che u? In faten min phatsan a, Pathian tak ni hlei lo hming an chhâl a. Puar taka ka hrai pawhin uire an chîng a, Nawhchizuar inahte an vir huai huai a.

⁸Sakawrpa châwm thau za chung angin Ṭhenawmte nupui îtin an za ruai mai.

⁹Hêng thil avâng hian ka hrem lo vang maw?” Tih hi LALPA thuchhuak a ni. Hetiang hi keimah ngeiin ka hrem lo vang em ni?

¹⁰An huanahte chuan lût ula, tichhe rawh u, Amaherawhchu, tichhe vek suh u. A zârte la bo ula, chûngte chu LALPA ta an ni si lo.

¹¹“Israel chhûngte leh Jakoba chhûngte chu Ka lakah an rinawm lo hle a ni,” Tih hi LALPA thuchhuak a ni.

¹² LALPA thu chu dâwtah an ngai a, “Chutin a ti lo vang, Kan chungah chhiatna a thlentîr lo vang, Ṭâm te, khandaih te kan tuar lo vang,” an ti a.

¹³“Zâwlneite pawh thli mai an ni a, Anmahniah thutak rêng a awm lo, An sawi ang chu an chungah thleng rawh se,” an ti bawk.

¹⁴Chuvângin, Engkim LALPA, Pathian chuan heti hian a ti: “Hetianga thu an sawi avângin ka thu i puante chu Meiah ka chantîr ang a, mite hi thingah ka chantîr bawk ang, Tichuan, an kâng ral vek ang.

¹⁵Aw Israel chhûngte u, nangmahni do tûrin ram hla taka hnam chu ka rawn hruai e,” LALPA thuchhuak chuan a ti; “Hmasâng ata hnam hlun chak tak, an ṭawng pawh i hriat loh, An thu sawi pawh i hriatthiam lohte chu.

¹⁶An thal bâwmte chu thlân inhawng a ni a, An za-in mi chak, huaisen an ni.

¹⁷I thlai te, i chaw te an ei zo vang a, I fanu leh fapate chu an that ang. I ran rual te, i berâm rual te an ei ang a, I grep te, i theipui te an ei zo vek ang a, I rinchhan, khawpui kulh neite chu Hmêlmate chuan an chhu chhe vek ang.”

¹⁸ LALPA chuan heti hian a ti: “Chûng ni-ah te chuan, Ka tiboral vek lo vang che u;

¹⁹‘Engtizia nge LALPA kan Pathianin kan chungah hêng thil hi a tih le?’ i miten an tih chuan. Hetiangin chhâng ang che: ‘Min phatsan a, in ramah ram dang pathian in bia a, Chuvângin, in ram ni lovah ram dang mite rawng in bâwl ang, a ti,’ tiin.”

²⁰“Jakoba thlahte chu hei hi hrilh ula, Judai ramah puangzâr rawh u.

²¹Nangni mi â, hriatthiamna nei lote u, Hei hi lo hre teh u: Mit in nei a, in hmu si lo, Beng in nei a, in hre thei si lo.

²²Mi hlau lo vang maw?” Tih hi LALPA thuchhuak a ni, “Ka hmaah in khûr lo vang maw? Tuipui chîm chin atân ṭiaupho ka dah a, A liam lohna tûra daidanna nghet chu, Tuifâwn chuan a chîmpil lo vang a, A fâwn chu ko bûr bûr mah se, A kuang a liam hek lo vang.

²³Mahse, hêng mite hi mi luhlul, hel hmang an ni, An pêng a, an kal bo ta.

²⁴“LALPA, kan Pathian chu i ṭih ang u, A hun takah ruah min pe a, Ruah hmasa leh ruah hnuhnûng a sûrtîr a, Buhseng hunbi min ruatsaktu a ni,” Thinlung takin an ti ngai lo.

²⁵Hêng thil hi in thil sual tih avângin a bo zo va, In sualna avângin thil ṭha in chân ta e.

²⁶Ka mite zîngah misual an awm, Thangkamtu angin mite an châng a, Thang an kam a, mite an âwk ṭhîn.

²⁷Savaa khat bâwm angin An inte pawh bumnain a khat, An lo hausa a, thil an tithei ta hle a ni.

²⁸An lo thau va, an lo mûm a, Tâwk chin nei lovin thil sual an ti. Fahrahte hmakhua an ngai lo va, Retheite chan ṭhatna tûr an ngaihtuah hek lo.

²⁹Hêng thil avâng hian ka hrem lo vang maw?” Tih hi LALPA thuchhuak a ni. “Hetiang hnam chungah hian phuba ka la lo vang em ni?

³⁰He ramah hian thil râpthlâk tak leh hlauhawm tak a lo thleng ta.

³¹Zâwlneiten dâwtin thu an hril a, Puithiamten an thu thuin ro an rêl a, Chutiang chu ka mite lawmzâwng tak a ni, Ni kin ni-ah chuan engtin nge in awm tâk ang?