Read Mizo Lushai Jeremia 50 Bible Online

Jeremia 50 - Mizo Lushai bible

Jeremia 50

¹Babulon chungchâng leh Kaldai mite chungchâng, Zâwlnei Jeremia hmanga LALPA sawi chu:

²Hnamte hnênah hril ula, puang rawh u, Puanzâr târ ula, puang rawh u, eng mah zêp suh u, ‘Babulon chu a tlâwm ta, An pathian Bela chu a mualpho va, Marduka chu a zâm a, An pathian limte a mualpho, An milemte a chhe zo ta,’ tiin.

³Ani chu hmâr lama hnam Pakhatin a rawn bei ang a, A ram chu a rawn tichhe vek ang. Tu mah an chêng tawh lo vang a, Mihring leh ramsa an tlân bo vek ang.

⁴A hun leh ni a lo thlen chuan Israel mite leh Juda mite chu an lo kal ho vang a, ṭap chungin LALPA an Pathian an rawn zawng ang.

⁵Zion kawng an zâwt ang a, a lam an pan ang. ‘Hawh u, kumkhaw thuthlung, theihnghilh tawh loh tûr chu LALPA nên i thlung ang u,’ an ti ang.

⁶Ka mite chu berâm bo ang an ni, an vêngtuten an hruai bo va, tlângahte an vâkvai a, tlâng leh mual dungte zawhin an huang pawh an hre tawh lo.

⁷A hmu apiangin an ei zêl a, an hmêlmate chuan, ‘Thil kan tisual hlei nêm, LALPA, anmahni vêngtu dik tak, an thlahtute innghahna LALPA lakah chuan thil an tisual a ni zâwk,’ an ti a.

⁸“Babulon khua tlânchhuahsan ula, Kaldai ram chu chhuahsan rawh u. A rual zînga kêlchal angin hma hruai rawh u.

⁹Ngai teh u, Babulon rawn bei tûrin hmâr lam ata hnam ropui tak pung khâwm chu ka chawktho vang a, amah chu do tûrin an insingsa ang. Chûng mite chuan an rawn hneh ang a, an thalte chu, râltuk thiam tak hlawhchham ngai lo ang a ni ang.

¹⁰Tichuan, Kaldai-ho chu an rawk ang a, a rawktute chu an hlawhtling hle ang,” tih hi LALPA thuchhuak a ni.

¹¹Nang ka hnam thlan rawktu, i hlimin i lâwm hle na a, Bâwngla, hnimno zînga tla melh melh ang leh, Sakawrpa hrâm nghur nghur ang hi ni mah la,

¹²I nu chu a zak hle ang a, Hringtu che chu a kun tlawk tlawk ang. Ngai teh, hnamte zîngah a tê ber ang a, Thlalêr ramro ang a ni ang.

¹³ LALPA thinurna avângin tu mah an awm lo vang a, A ram vek ang, Babulon-a kal tlang apiangin mak an ti ang a, A chhiat nasat avângin an chek tlawk tlawk ang.

¹⁴Thal kâp mi zawng zawngte u, Babulon hual rawh u, Kâp ula, in thalte ren suh u, LALPA lakah an sual si a.

¹⁵Kil tin aṭangin au khum ula: a inpe ta! A kulhte a chim a, a bangte a sawp ta, LALPA chuan phuba a la a ni. Nangni pawhin phuba la ula, A tih angin a chungah ti ve rawh u,

¹⁶Buh chi thehtu chu Babulon ata la bo ula, Buh seng laia favah kengtu nên chuan, Mi nunrâwng khandaih hlauvin Mi tinin mahni mite pan sela, Mahni ramah tlân ṭheuh rawh se.

¹⁷Israel chu berâm rual, sakeibaknei ûm darh ang hi a ni. Asuria lalin a han ei phawt a, Babulon lal Nebukadnezaran a ruh a ṭhei sawm a.

¹⁸Chuvângin, Engkim LALPA, Israel-te Pathian chuan heti hian a ti: ‘Ngai teh, Asuria ram ka hrem angin Babulon lal leh a ram chu ka hrem dâwn.

¹⁹Israel chu a chênna ramah ka hruai kîr ang a, Karmel leh Basan-ah an tân ei tûr a tam ang a, Efraim tlâng leh Gilead thlaite chu duh tâwkin an tlân ang.

²⁰A hun leh ni a lo thlen chuan Israel-te bawhchhiatna hmuh tumin an zawng ang a, an hmu lo vang; Juda-te sualna pawh hmuh tûr a awm tawh lo vang. Ka mi zuah, la dam chhunte chu, ka ngaidam dâwn si a,’ tih hi LALPA thuchhuak a ni.

²¹“Merathaim ram leh Pekod mite chu bei rawh u, That ula, tiboral vek rawh u. Thu ka pêk che u ang zêlin ti ang che u,” Tih hi LALPA thuchhuak a ni.

²²Chu ramah chuan indo thâwm a awm, Chhiatna nasa tak thâwm chu.

²³Khawvêl pum pui tidarhtu tuboh chu, a phel a, a kehdarh ta, Babulon chan chu hnamte chuan râpthlâk an ti.

²⁴Aw Babulon, i awh nân thang ka kam a, i âwk ta a, Chu chu i hre si lo, LALPA i dodâl hi an hre chhuak che a, An man ta che a nih hi.

²⁵ LALPA chuan a râlthuam bâwm a hawng a, A thinurna hriamhrei a la chhuak ta. LALPA, Engkim LALPA chuan Kaldai ramah Thil tih tûr a nei a ni.

²⁶Kil tin aṭanga bei tûrin lo kal rawh u, A thil dah khâwmna hawng ula, Buhpâwl angin tiang khâwm ula, tichhe vek rawh u, Eng mah rêng zuah suh u.

²⁷A sipaite chu tihlum vek rawh u, An chung a va pik êm! An ni a thleng ta si, Hrem an tuar hun chu.

²⁸Chu! Babulon ram aṭanga Tempul tichhetute chungah kan Pathian, LALPA chuan phuba a lâk tâk thu Zion-ah an puan tâk chu!

²⁹‘Babulon bei tûrin thal kâp mi, thal kâp thiam zawng zawng ko khâwm ula, tu mah chhuak thei lo tûrin hual tlat rawh u. A thil lo tih tawh ang zêlin thungrûl ula, a tih ang chiahin a chungah ti ang che u, LALPA, Israel Mi Thianghlima chu an pawisak loh avângin.

³⁰Chuvângin, an tlangvâlte chu kawtthlêrah an tlu ang a, an sipaite pawh chumi ni chuan an boral vek ang,’ tih hi LALPA thuchhuak a ni.

³¹‘Ngai teh, chapopa, ka ngaithei lo che a ni,’ Tih hi LALPA thuchhuak a ni. I ni a lo thleng ta, hrem i tuar hun chu,

³²Mi chapo chu a pai ang a, a tlu ang, Tu man an kaitho lo vang, A khawpuite ka hâl ang a, A vêla awm zawng zawng a kâng vek ang.

³³Engkim LALPA chuan heti hian a ti: “Israel-te leh Juda-te chu hnehchhiahin an awm a, mantuten an chelh tlat a, an thlah duh lo.

³⁴An tlantu erawh chu mi chak tak, a hming Engkim LALPA a ni. Ani chuan a ṭan tlat ang a, leiah remna a lêntîr ang a, Babulon mite chungah erawh chuan buaina a thlentîr ang.

³⁵‘Kaldai mite chungah khandaih a lêng e, Babulon mite, an hruaitu te, an mi fing te chungah nên,’ Tih hi LALPA thuchhuak a ni.

³⁶Zâwlnei derte chungah khandaih a lêng e, An lo va â tak êm! A sipaite chungah khandaih a thleng a, An va han hlau tak êm!

³⁷An sakawr leh tawlailîrte chungah pawh khandaih a lêng, Hnam dang sipai an rawihte chungah pawh Hmeichhia ang mai an ni ta, An sum leh pai chungah pawh khandaih a thleng, Rawk an tâwk dâwn a ni.

³⁸Khua a khêng a, tuite a kang zo ta, Milim tamna ram, milem âtchilhtute an ni si a.

³⁹Chuvângin, thlalêr sanghar leh chinghniate chutah chuan an chêng ang a, vanghâwngseite pawh an awm ang a, tu man an luah lo vang a, tu mah rêng an awm tawh lo vang.

⁴⁰Pathianin Sodom te, Gomora te leh a chhehvêl khua te a tiram ang khân, chutah chuan tu mah an awm lo vang a, mi tu mah an chêng tawh hek lo vang.

⁴¹Ngai teh, hmâr lam aṭangin mi an lo kal, Hnam chak tak leh lal tam tak, kâwlkil ata lo thawkte chu!

⁴²Thal leh fei an keng a, nunrâwng tak, lainatna nei lo an ni, An thâwm chu tuipui ri hum hum ang a ni, An sakawr chungahte an rawn chuang. Mite chu inrâlring sa vekin an lo kal, Aw Babulon mite u, an bei dâwn a che u.

⁴³Babulon lalin an chanchin a lo hriatin A kut a zâwi a, hmeichhe nau vei angin Natna leh manganna chuan a man ta.

⁴⁴Ngai teh, Jordan ngawa sakeibakneiin phûla berâm tla a ṭhâwng thut angin vawilehkhatah anni chu an ram ata ka ûm chhuak ang a; tichuan, an chunga thunei tûr ka duh duh ka dah ang. Kei ang hi tu nge awma, tu nge mi cho ngam le? Mi khing ngam berâmpu tu nge awm ang?

⁴⁵Chutichuan, LALPA thiltum, Babulon mite chunga a tih tum leh Kaldai mite chunga hlen a tum chu ngaithla rawh u; ran notête chu a hnûk bo vang a, anmahni angin an tlatna hmunte chu a ṭiau vek ang.

⁴⁶Babulon an lâk thâwmah lei hi a nghîng ang a, an ṭap thâwm chu hnamte chuan an hria ang.