Read Mizo Lushai Jeremia 51 Bible Online

Jeremia 51 - Mizo Lushai bible

Jeremia 51

¹ LALPA chuan heti hian a ti: “Babulon chungah leh Kaldai mite chungah thlichhia ka tlehtîr dâwn.

²Anmahni zâp bova, an ram tiruak vek tûr hnam dangte Babulon-ah chuan ka tîr ang. Chhiatniah chuan kil tin aṭangin an rawn bei ang,

³Thal kâptuin a thalngul kuai hman lovin A thir kawr pawh ha hman hek suh se. Tlangvâlte zuah sú, sipaite pawh tiboral vek rawh u.

⁴An ramah ngei Kaldai mite chu an that phung ang a, Kawtthlêrahte pawh râpthlâk takin an vit hlum ang.

⁵An ram chu Israel Mi Thianghlima hmaah lo sual hle ṭhîn mah se, An Pathian, Engkim LALPA chuan Israel leh Juda-te chu a thlahthlam ngai lo.

⁶Babulon tlân chhuahsan rú, in him theih nân tlân rawh u, An suahsualna avângin boral ve suh u. LALPA phuba lâk hun a thleng ta a, An phu tâwkin a thungrûl dâwn si a.

⁷Babulon chu LALPA kuta rangkachak no a ni, Lei pum pui a tirui a, Hnamten a uain an in a, an â zo ta.

⁸Babulon chu a tlu thut ang a, a kehsawm vek ang, Ṭah vak vak rawh u, A hliamah thinghnai damdawi hnawih ula, A lo dam mial mahna.

⁹Babulon chu tihdam ka tum a, a dam thei si lo, Ani chu hnuchhawn ila, mahni ram ṭheuh i pan ang u, A thiam lohnain vân a tawng a, chhûm anga sâng a ni.

¹⁰ LALPA chuan kan dikzia a târlang ta a, ‘Lo kal ula, kan Pathian LALPA thiltih hi, Zion-ah i hril ang u!

¹¹Thalte tât hriam ula, phawte chuh rawh u, LALPA chuan Media lalte a chawk tho va, Babulon tihchhiat a tum ta a ni. LALPA chuan phuba a la dâwn, a Tempul phuba chu.

¹²Babulon kulh bang epah puanzâr zâr rawh u, Vêngtu pawh chah belh ula, enthlatu dah ula, Chân rûkna siam rawh u. LALPA chuan a thiltum a hlen dâwn, Babulon mite chunga a lo sawi tawh chu.

¹³Nang, tui tam tak hmuna cheng, sum leh pai ngah êm êm, I tâwpna a lo thleng ta, i hun a liam ta e.”

¹⁴Engkim LALPA chuan a hming chhâlin heti hian a ti: “Khau rual anga tam mipui ka rawn hruai lût ang a, Hnehna hla an sak khum ang che.”

¹⁵A thiltihtheihnain lei a siam a, A finnain khawvêl a din, A hriatnain vân a kai pharh ta.

¹⁶Thu a pe a, tuite chu a ri hum hum a, Kâwlkil aṭangin chhûm a chhohtîr a, Ruah leh kâwlphe a siam a, A hmun aṭangin thli a tlehtîr ṭhîn.

¹⁷Mi tin an mâwl a, hriatna reng an nei lo, Rangkachak chhertuten an milem an zahpui ang a, An milem chhûnte chu a lem, nunna nei lo an ni si a.

¹⁸Hlutna nei lo, hmuhsitawm mai an ni, Hrem an nih hun chuan an boral vek ang.

¹⁹Jakoba Pathian chu hêng ang hi a ni ve lo, Ani zawng engkim siamtu a ni, Israel pawh a rochan hnam an ni, a hming chu Engkim LALPA a ni.

²⁰“Nang hi ka hreipui, indona hriamhrei i ni, Nangmah hmangin hnamte ka tidarh ang a, Nangmah hmangin lalramte ka tichhia ang.

²¹Nangmah hmangin sakawr leh a chungchuang ka tidarh ang a, Nangmah hmangin tawlailîr leh a chungchuang ka tichhia ang.

²²Nangmah hmangin mipa leh hmeichhia ka that ang a, Nangmah hmangin putarte leh ṭhalaite ka tihlum ang a, Nangmah hmangin nula leh tlangval ka that ang.

²³Nangmah hmangin berâmte leh a pute ka that ang a, Nangmah hmangin loneitu leh an bâwng chhawrte ka tihlum ang a, Nangmah hmangin ramawptute leh hotute ka tiboral ang.

²⁴Zion chunga an thil tihsual tâkte chu, in hmuh ngeiah Babulon leh a chhûnga Kaldai mite chungah Ka thungrûl dâwn,” Tih hi LALPA thuchhuak a ni.

²⁵“Nang, khawvêl tichhetu tlâng lian, ka ngaithei lo che a ni,” Tih hi LALPA thuchhuak a ni. “Bei tûr chein i chungah ka kut ka lek ta, Khâmah ka nam lum ang chia, Tlâng kâng ût kawlh angin ka siam ang che.

²⁶I hnên ata a kil lung tûr leh a lungphum tûr, Lâk a ni lo vang, Kumkhuain i ram hlen tawh ang,” Tih hi LALPA thuchhuak a ni.

²⁷Chu ramah chuan puanzâr zâr ula, Hnamte hriat tûrin tawtawrâwt hâm rawh u, Anni chu do tûrin hnamte chu inbuatsaihtîr ula, Bei tûrin Ararat te, Mini te, Askana ram te ko ula, An hotu tûr ruat bawk ula, Khau puang anga tam sakawr man khâwm rawh u.

²⁸Babulon bei tûrin hnamte chu inbuatsaihtîr rawh u, Media lalte, ramawptute, an hruaitute, An ram awp zawng zawng te nên.

²⁹Chu ram chu na tuarin a khûr hlawk hlawk a, Babulon ram tichhiaa, luahtu awm lova siam hi Babulon chunga LALPA thiltum, a hlen mêk chu a ni.

³⁰Babulon mi huaisente an râlbâng ta, kulh chhûngah an tawm tlat a, An dawih zo ta, hmeichhia ang mai an ni. An in te a kâng zo va, Kulh kawngkhâr kalhnate a bung zo ta,

³¹‘Babulon khawpui chu kil tin aṭangin an la ta,’ Tih thu hrilh tûrin lal hnênah Zualko an tlân zut zut mai.

³²Luikaite an la a, lui kam phairuangte an hâl fai, Sipaite chu an zâm zo ta.

³³Engkim LALPA, Israel-te Pathian chuan heti hian a ti: “Babulon mite chu hruihzâwla buh chîl ang hi an ni ang, Rei lo têah chîl hrep an ni dâwn.

³⁴Babulon lal Nebukadnezaran mi ei zo ta, Bêl ruak ang mai ka ni. Rûlpui angin min dawlh a, ka sa tui tui eiin a intipuar a, Tichuan, mi chhâk chhuak leh ta a ni.

³⁵Zion-a awmte chuan, ‘Min sawisak angin Babulon chu sawisak nek ni rawh se,’ ti sela, Jerusalem-a awmte pawhin, ‘Kan thisen mawh chu, Kaldai-hovin phur rawh se,’ ti teh se.”

³⁶ LALPA chuan heti hian a ti: “Ngai rawh, i lamah ka ṭang ang a, phuba ka laksak ang che Luipui chu ka ti kang ang a, a tuikhurte chu ka tikang vek ang.

³⁷Babulon chu thil chhe vawm khâwm, sihalte tualchaina, Mite hmuhsit leh endawng, Mi rêng rêng awm tawh lohnaah ka chantîr ang

³⁸A mite chu sakeibaknei vânglai angin an rûm ang a, Sakeibaknei note angin an hrâm bawk ang.

³⁹An râwp lai takin ruai ka buatsaihsak ang a, Ka hrai rui hnêp ang. An sa bual bual ang a, an muhîl hlen ang a, An harh leh tawh lo vang,” Tih hi LALPA thuchhuak a ni.

⁴⁰“Ran talhna hmuna berâmpa leh kêlpa talh tûr angin Anni chu ka hruai chhuak ang.

⁴¹Sesak chu man a ni ta, Lei pum pui chawimawi ṭhin chu a tlâwm ta. Hnam tinin Babulon chan chu rapthlâk an ti.

⁴²Babulon chu tuipuiin a chîm ang a, A fâwn nasa tak chuan a khuh vek ang.

⁴³A khawpuite chu a ram vek ang a, Thlalêr, mihring rêng awm lohna, Tu ma tlawh loh ram a ni ang.

⁴⁴Babulon pathian Bela chu ka hrem dâwn, A dawlh tawh chu ka luak chhuahtîr ang a, Hnamte chuan an bêl tawh lo vang a, Babulon kulh bangte pawh a chim ang.

⁴⁵Ka mite u, a chhûng ata lo chhuak rawh u, LALPA thinur nasa tak laka in him nân tlân chhuak rawh u.

⁴⁶Ram chhûnga thuthang in hriat hunah Zâm suh ula, hlau hek suh u, Kuminah thuthang pakhat a awm a, Kum lehah a dang. Ram chhûngah inpâwngnêkna thu a thang vêl, Rorêltu leh rorêltu insual thâwm chu.

⁴⁷Ngai teh, nite a lo thleng ngei dâwn, Babulon milem ka hrem ni leh a ram pum pui mualpho ni chu, Mi ṭhate chu an tlu phung ang.

⁴⁸Hmâr lam aṭangin tichhetuin Babulon chu a rawn tihchhiat hunah, Lei leh vân leh a chhûnga awm zawng zawng lâwmin an au vang,” Tih hi LALPA thuchhuak a ni.

⁴⁹Israel-te a thah chiam avângin Babulon chu a tlu ngei ang, Khawvel pum puia mi tam tak thihna thlentu a ni si a.

⁵⁰Nangni khandaih pumpelhtute u, kal ula, ding suh u, Hla takah pawh LALPA hre reng ula, Jerusalem theihnghilh suh u.

⁵¹Kan mualpho ta, min hmuhsitzia kan hriatin zahthlâk kan ti, LALPA ina hmun thianghlimahte hnam dang an luh tâk hi.

⁵²“Ngai teh, nite a lo thleng e,” Tih hi LALPA thuchhuak a ni. “An milemte ka sawisa ang a, ram pum puiah Hliam tuar an rûm chuah chuah ang.

⁵³Babulon chu vân tawngin sâng mah se, a kulhte pawh sâng hle mah sela, Tichhetu tûr a hnênah ka tîr ang,” Tih hi LALPA thuchhuak a ni.

⁵⁴Babulon aṭanga ṭap thâwm leh Kaldai ram aṭanga chhiatna nasa tak thâwm chu Ngaithla rawh u.

⁵⁵ LALPA chuan Babulon a tiboral dâwn, An thâwm ri mur mur chu a tireh ang a. An thâwm chu tuifâwn ri hum hum ang hi a ni, An au chu a khâwk rum rum mai.

⁵⁶Tichhetu chu Babulon-ah a lo kal ang a, An mi huaisente chu a man ang, An thalngulte chu a titliak vek ang a, LALPA chu thungrûl ṭhîntu Pathian a ni. A thungrûl ngei ngei ang.

⁵⁷“An hotute leh mi fing te, a ramawptu te chu, An hruaitute leh mi huaisente nên Ka hrai rui vek ang a, An muhîl hlen ang a, an harh leh tawh lo vang,” A hming Engkim LALPA chuan a ti.

⁵⁸Engkim LALPA chuan heti hian a ti: “Babulon lal kulh bang chhah tak chu a chim vek ang a, A kawngka sâng takte pawh a kâng ral vek ang. Mipui thawhrimna chu a thlâwn a, Hnamte pawh kâng ral leh mai tûr atân an buai.

⁵⁹Juda lal Zedekia lal kum linaa Babulon-a a kal laiin a hnêna kal ve, Seraia, Neria fapa, Maaseia tupa hnêna zâwlnei Jeremia thupêk chu: Seraia chu lal chhungkaw enkawltu a ni.

⁶⁰Jeremia chuan Babulon chunga chhiatna lo thleng tûr zawng zawng leh Babulon chungchâng lehkhabu-ah a ziak a.

⁶¹Jeremia chuan Seraia hnenah, “Babulon i thlen hunah hêng thu zawng zawng hi chhiar chhuak ang che.

⁶²Hetiangin sawi ang che, ‘Aw LALPA, he hnam hi tihchhiat i tum thu i lo sawi tawh a; chuvângin, tu mah, mihring leh ramsa pawh, a chhûngah an chêng tawh lo vang a, kumkhuain a ram dêr tawh ang,’ ti ang che.

⁶³He lehkhabu hi i chhiar chhuah zawhah, lungtum nên ṭâwn belhbawm la, Eufretis luiah paih ang che.

⁶⁴‘Babulon chu hetiang hian a pil ang a, a tho leh tawh lo vang. A chunga chhiatna ka thlentîr avângin a tlu dêr ang,’ tiin sawi rawh,” a ti a. Hei zawng hi Jeremia thute chu a ni.