Read Mizo Lushai Jeremia 52 Bible Online

Jeremia 52 - Mizo Lushai bible

Jeremia 52

¹Kum sawmhnih leh pakhat a nihin Zedekia chu a lal ṭan a, Jerusalem-ah kum sâwm leh pakhat ro a rêl a. A nu hming chu Hamutali a ni, Libna khaw mi Jeremia fanu a ni.

²Jehoiakima angin LALPA mit hmuhin thil sual a ti a.

³LALPA a thinur avângin hêng thilte hi Jerusalem leh Judai ram chungah a lo thleng ta a, a hma ata anni chu a paih chhuak ta nge nge a ni. Tichuan, Zedekia chu Babulon lal chungah a hel ta a,

⁴Zedekia lal kum kuana, a thla sâwmna, ni sâwm ni chuan Babulon lal Nebukadnezara chu, a sipai zawng zawng nên Jerusalem bei tûrin a lo thawk a. Khawpui chu an hual a, a vêlah ṭanhmun an khuar a.

⁵Zedekia lal kum sâwm leh pakhatna thlengin khawpui chu an hual a.

⁶Ṭâm chu a na ta hle a; thla lina, ni kua ni chuan ei tûr an nei ta lo va.

⁷Khawpui hungna bang chu an tipawp a, sipai pâwlho chu an tlânchhe ta a. Kaldai miten khawpui chu an hual chungin lal huan kiang bang pahnih inkâr kawngah an kal a.

⁸Mahse, Kaldai sipaite chuan an ûm a, Zedekia chu Jeriko phaiah an ûm phâk a, a sipai zawng zawng chuan an tlânsan a.

⁹Tichuan, ani chu an man a, Hamath rama Ribla khuaah Babulon lal hnênah an hruai a, ani chuan a chungthu a lo rêl a.

¹⁰Ribla khuaah chuan Babulon lal chuan a fate chu Zedekia hmuh lai ngeiin a thahsak a.

¹¹Zedekia pawh a mitmu a kher chhuahsak a, thîr kawl a buntîr a, Babulon-ah a hruai chho va, a thih ni thlengin lung inah a tântîr a.

¹²Babulon lal Nebukadnezara a lal kum sâwm leh pakuana, thla ngana, ni sâwm ni chuan lal vêngtu pâwl hotu Nebuzaradana, Babulon lal kianga ding ṭhîn chu Jerusalem-ah a lo lût a.

¹³LALPA in leh lal in a hâl a, Jerusalem-a in zawng zawng, in pawimawh dang zawng zawng nên a hâl chhe vek a.

¹⁴Kaldai sipai rual, lal vêngtu pâwl hotu hnuaia mite chuan Jerusalem hungna kulhte chu an tichhe vek a.

¹⁵Lal vêngtu pâwl hotu, Nebuzaradana chuan mipui rethei tak tak, khawpuia hnutchhiah te, Babulon lal kuta inpeho te, kut themthiam la awm zawng zawngte nên salah a hruai a.

¹⁶Lal vêngtu pâwl hotu Nebuzaradana chuan ram chhûng mi retheiho ṭhenkhat chu grep huan leh lo lama hnathawk atân a hnutchhiah a.

¹⁷Kaldai mite chuan LALPA ina dâr ban te, a nghahchhan te, LALPA ina dâr tuizêm te an tikeh vek a. Dâr zawng zawng chu Babulon-ah an phur chho va.

¹⁸Bêl te, vutlawh te, khâwnvâr tihmihna te, maihûn te, rimtui hâlna berhbute leh dâr bungrua zawng zawng chu an la vek a.

¹⁹Lal in vêngtu hotu chuan maihûn te, berhbu te, thlêng te, bêl te, khâwnvâr dahna te, thîrfian te, in tûr thilhlan dahna te, rangkachak leh tangkaruaa siam te chu a la vek a.

²⁰ LALPA in atâna Lal Solomona siam - dâr ban pahnih, tuizêm pakhat leh a hûnna dâra siam, bâwngpa sâwm leh pahnih leh bungbêl dang dâra siam zawng zawng chu bûk sên rual a ni lo.

²¹Bante chu tawng sâwm leh pariata sâng a ni, a len lam tawng sâwm leh pahnih bial a ni. A lai a kawrawng a, a chhah lam chu zungza bêng a ni.

²²A ban hmawrah chuan lu bâwk tawng ngaa sâng a awm, a vêl chuan dâr leh theibuhfaia chei mawi vek a ni. Ban pahnihna pawh chu theibuhfaia chei bawk a ni.

²³A pangah chuan theibuhfai sawmkua leh pahnih lai a awm a. A vêla chei mawina theibuhfai zawng zawng chu za zet a ni.

²⁴Lal vêngtu pâwl hotu chuan puithiam lal ber Seraia te, a puitu puithiam Zefania te leh kawngkhâr vêngtu pathum chu a man a.

²⁵Indo mite, hotute leh lal khâwnbâwl ṭhîn mi pasarih, khawpuia la awm a hmuhte chu a man a; ram chhûnga sipai latu hotu lal ber leh chumi rama mi sawmruk, khawpuia awmte chu a hruai bawk a.

²⁶Vêngtu hotu Nebuzaradana chuan an vaiin a man a, Ribla khuaa Babulon lal hnênah a rawn hruai a.

²⁷Babulon lal chuan Hamat ram Ribla khuaah chuan anni chu a sawisa a, a tihlum a. Tichuan, Juda mite chu an ram ata sala hruai an ni ta a.

²⁸Nebukadnezaran sala a hruai mipui zât chu hei hi a ni: kum sarihnaah Juda mi sângthum leh sawmhnih leh pathum a hruai a.

²⁹Nebukadnezara lal kum sâwm leh pariatnaah Jerusalem aṭangin mi zariat leh sawmthum leh pahnih a hruai leh a.

³⁰Kum sawmhnih leh pathumnaah vêngtu pâwl hotu Nebuzaradana chuan Juda mi zasarih leh sawmli leh panga a hruai leh a, an vaiin sângli leh zaruk an ni.

³¹Juda lal Jehoiakina chu kum sâwm thum leh pasarih sala a tân hnuin Evil-merodaka chu Babulon-ah a lo lal a. Chumi kum thla sâwm leh pahnihna, ni sawmhnih leh panga ni chuan Juda lal Jehoiakina chu lung in ata a chhuah a, zalên takin a awmtîr ta a.

³²Ani chu a tiṭha hle a, Babulon-a a hnêna awm ve lal dangte aia dinhmun ṭha zâwkin a siam a.

³³Tichuan, tân in kawrte chu a hlîp a, a dam chhûng zawng lal hnênah a eiin a in ṭhîn.

³⁴A ni tin mamawh chu Babulon lal chuan a pe a, chutiangin a dam chhûng zawng, a thih thlengin, ṭha takin a enkawl a.