Read Mizo Lushai Jeremia 6 Bible Online

Jeremia 6 - Mizo Lushai bible

Jeremia 6

¹Benjamin mite u, Jerusalem chhûng ata himna zawngin Tekoa khuaah tawtawrâwt hâm ula, Beth-hakarem aṭangin hriattîrna phêt rawh u, Hmâr lam ata thil ṭha lo a lo thleng ṭêp Chhiatna râpthlâk tak chu.

²Zion fanu, hmêlṭha leh no tak chu ka tichhe dâwn e.

³Lalte, an sipai rualte nên an lo thawk ang a, Khawpui hualin an puan in an rawn kaih ang a, Mahni duhna hmun ṭheuhvah an awm ang.

⁴“Bei tûrin inpuahchah rawh u, Tho ula, chhûnah i bei ang u, E khai, ni a hniam ta a, khua a tlai ta, A thim mai dâwn alâwm le,

⁵Tho ula, i bei ang, kulhte i tichhe vek ang.”

⁶Engkim LALPA chuan heti hian a ti: “Thingte kit ula, Jerusalem-a luh nân lei chhûng pâwng rawh u, Hnehchhiahnaa khat khawpui hi tihchhiat vek tûr a ni.

⁷Tuikhurah tuihna a chhuak angin, Suahsualna a chhuak reng a ni. Tharum thawh leh inrawk a chhûngah a hluar a, Na tuar leh hliam tuar hmuh tûr an awm reng a ni.

⁸Aw Jerusalem, ka hawisan loh nân che leh I ram chu luahtu awm lova ka siam loh nân Zilhna hi pawisa teh.”

⁹Engkim LALPA chuan heti hian a ti: “Israel awm chhunte chu grep angin lo fai ula, Grep lotuin a rahte a vai nawn angin vai nawn rawh u.

¹⁰An awih theih nân tu nge ka hrilh ang a, Tu nge zilhna ka pêk ang? Ngai teh, an beng an chhungawng tlat a, Eng mah an hre thei lo.” LALPA thu chu an huatzâwng a ni a, an lâwm hek lo.

¹¹ LALPA thinurnain ka thinur êm êm a, Ka insûm zo lo a ni. “Naupang tualchaite chungah hrithla la, Tlangvâl awm khâwmte chungah pawh; A pasal rualin a nupui man ni rawh se, Upa leh tarchhiate pawh.

¹²An inte chu mi dang pêk a ni ang a, An ram leh an nupuite pawh, Chu rama chêngte chungah ka kut ka lek dâwn,” tih hi LALPA thuchhuak a ni.

¹³“A te ber aṭanga a lian ber thlengin duhâmnain an khat a, Zâwlneite leh puithiamte pawhin mi bum an chîng hle.

¹⁴Ka mite hliam chu duhdah takin an tuam a, “A ṭha e, a ṭha e,” an ti a, a ṭha hauh si lo.

¹⁵Thil tenawm an tih pawhin an zak lo va, Zah nachâng an hre rêng rêng lo. Chûng mite chu mi dang tlute zîngah an tlu ve ang a, Anni chu ka hrem hunah an thal dêr ang,” LALPA chuan a ti.

¹⁶ LALPA chuan heti hian a ti: “Kawng pengṭhuamahte ding ula, en vêl rawh u, Kawng hlun leh ṭha chu zâwt ula, Tah chuan, kal rawh u. Tichuan, in thla a muang ang,” a ti a. Anni erawh chuan, “Kan kal lo vang,” an ti a.

¹⁷“In tân râlvêngtu ka ruat a, An tawtawrâwt ri chu ngaithla rawh u,” ka ti a, Anni erawh chuan, “Kan ngaithla lo vang,” an ti a.

¹⁸Aw hnamte u, ngaithla ula, nangni, pungkhâwmhote u, An chunga thil lo thleng tûr chu lo hre rawh u.

¹⁹Aw leilung, ngaithla teh, Hêng mite chungah hian chhiatna ka thlentîr dâwn, Ka thute an ngaihthlâk lohva, ka dânte an hnâwl avângin An suangtuahna rah chu an seng ang.

²⁰Seba aṭanga beraw rimtui te, Ram hla tak aṭanga fu thlum tak mi rawn lâkte hi Eng atân nge ka tih ang? In hâlral thilhlante chu pawm tlâk a ni lo va, In inthawinate chuan min tilâwm hek lo.

²¹Chuvângin, LALPA chuan heti hian a ti: “Hêng mite hmaah hian tlûkna tûr ka dah ang a, Tah chuan, pate leh an fate chu an tlu za ang a, An ṭhenawmte leh an ṭhiante pawh an boral ang.”

²² LALPA chuan heti hian a ti: “Ngai teh, hmâr lam aṭangin mi an lo kal e, Kâwlkila hnam ropui chu chawhthawh a ni ta e.

²³Thal leh a ngul an keng a, Mi nunrâwng tak, lainatna nei lo an ni; an thâwm chu tuipui ri hum hum ang a ni, Sakawr chungahte an chuang a, Indo tûrin an intlar ṭhut mai, Aw Zion fanu, nangmah bei tûrin an lo thawk e.

²⁴An chanchin kan hriat chuan kan bânte a zawi zo va, Hrehawm chuan min nangchîng ta, Hmeichhe nau vei ang maiin.

²⁵Lo lamah kal suh ula, kawngah pawh kal hek suh u, Tah chuan hmêlma an awm a, kil tinah râl a ṭi.

²⁶Aw, ka mite u, saiip puan sin ula, Vaivutah tâl rawh u. Fapa mal sûn ang maiin lungchhe takin ṭap rawh u, Tichhetu chuan min rawn nang thut dâwn si a.

²⁷Kulh bangah leh râlvênbûkah ka siam a che, Ka mite hi fiah la, i thu an awih emaw chhin rawh.

²⁸An vaiin mi luhlul, hel hmang an ni, Mi rêlin an vâk ruai a, Dâr leh thîr anga sak an ni a, An za-in dik lo takin thil an ti.

²⁹Suan chu titui tûrin pûmin an zâp ṭhîn a, Mahse, a tithianghlim thei lo, Mi sualte chu lâk bo an nih loh avângin.

³⁰Anni chu tangkaraw êkchhia an ti ang, Kei, LALPA hian ka hnâwl tawh si a.”